Yobu 4 - Kinyarwanda Bibiliya Ntagatifu

Ijambo rya Elifazi

¹ Elifazi w’i Temani afata ijambo, agira ati

² «Ese uwagira icyo akubwira, wabyihanganira? Ariko se umuntu yamenya aceceka ate!

³ Dore, wajyaga uhanura benshi, ugahumuriza abari bagiye kudohoka,

⁴ Inama zawe zakomeje abendaga kwiheba, abacitse intege ukabarema umutima;

⁵ none, igihe utahiwe, unaniwe kwihangana, n’ibikubayeho ubwawe, bigukuye umutima!

⁶ Kuba wariringiye Imana se ntibikwiye kugukomeza, n’umurava wagize ukagutera amizero?

⁷ Ibuka neza: hari umuziranenge wigeze arimbuka? Ni hehe wumvise abanyamurava batsiratsizwa?

⁸ Jye nzi ko abahinga ikibi, bakabiba agahinda, ari byo basarura;

⁹ umwuka w’Imana urabarimbura, uburakari bwayo bukabatsemba.

¹⁰ Ari imitontomo y’intare, n’urusaku rw’ubukare bwayo, ari n’imikaka y’ibyana by’intare, byose birayoyoka.

¹¹ Intare yicwa no kubura umuhigo, n’ibyana by’intare y’ingore bikabuyera.

¹² Nanjye, hariho ijambo nongorewe, ugutwi kwanjye kurarisama.

¹³ Nijoro, nari mu nzozi ziteye ubwoba, igihe abantu bose baba baguye agacuho,

¹⁴ nuko ubwoba burantaha, mpinda umushyitsi amagufa yanjye yose arakomangana.

¹⁵ Numvise nishishe, umusatsi unyorosokaho;

¹⁶ mbona umeze nk’umuntu ampagaze imbere, murebye sinamumenya, ariko ishusho ye inguma mu maso, hashize umwanya numva ijwi rinyongorera riti

¹⁷ ’Umuntu waremewe gupfa yatunganira ate Imana? Yabura inenge ate mu maso y’Iyamuhanze?

¹⁸ Niba se itizera abagaragu bayo, ndetse n’abamalayika ntibaburemo inkumbi,

¹⁹ hacura iki ku batuye amazu y’ibyondo, na yo yubatswe ku musenyi? Babahonyora nk’igiheri,

²⁰ abariho mu gitondo bahinduka ivu butaranagoroba, bararimbuka bagashira nta n’umenye uko bigenze.

²¹ Bavanwaho, mbese nk’uko bashinguza umuganda w’ihema, nuko bagapfa bazize ubujiji bwabo.’