Yobu 37 - Kinyarwanda Bibiliya Ntagatifu

¹ Ngicyo igitera umutima wanjye kunsimbuka, maze ukava mu gitereko cyawo.

² Nimwumve urwamo rw’ijwi ry’Imana, mwumve n’urusaku ruyiva mu kanwa!

³ Ashumurira inkuba ze ku isi yose, umurabyo we ukagarukira aho ijuru riterwa inkingi.

⁴ Umurabyo uza ukurikiwe n’ijwi ryayo, ijwi ritontoma ry’Imana, maze igihe iryo ricyumvikana, igashumura inkuba zayo.

⁵ Ni koko Imana itwereka ibitangaza byayo, igakora ibintu bihambaye biturenze!

⁶ Ni yo ibwira urubura, iti ’Genda ugwe ku isi’ igategeka umuvumbi, iti ’Gwa umusubizo.’

⁷ Nuko igahagarika ityo imirimo y’amaboko y’abantu, kugira ngo bose bamenyereho ibikorwa byayo.

⁸ Inyamaswa zitaha mu ndiri zazo, zikihisha mu myobo yazo.

⁹ Inkubi y’imiyaga ituruka mu majyepfo, imbeho igaturuka mu majyaruguru.

¹⁰ Imana iyo ihushye, amazi ahinduka amahindu, inyanja zigahinduka nk’urutare.

¹¹ Ni yo ituma ibicu bicumbeka, ikabikwirakwiza hose byuzuye imirabyo.

¹² Ngibyo birazenguruka hose bikurikije uko yabigeneye, kugira ngo birangirize ku isi ugushaka kwayo;

¹³ nuko ikabituma mu mahanga yose, kugira ngo byice cyangwa bikize.

¹⁴ Yobu, tega amatwi ibyo nkubwira, itonde, uzirikane ibitangaza by’Imana.

¹⁵ Ibyo se uzi uko Imana yabigennye, n’uburyo ituma igicu kirabagirana?

¹⁶ Ubwo se wumva ukuntu ibicu bigenda hejuru nta kibifashe, bikagaragaza ubumenyi butangaje bw’Imana?

¹⁷ Wowe, imyambaro itangira kotsa, iyo isi igeze ku manywa y’ihangu,

¹⁸ washobora nka yo kubambika ibicu, maze bikarabagirana nk’umushonge w’icyuma?

¹⁹ Ngaho nyigisha icyo twabwira Imana, cyahe cyo kajya, ko turi mu mwijima!

²⁰ Ese amagambo yanjye hari icyo ayibwiye? Hari ubwo se ihugukira ko umuntu agiye kuvuga?

²¹ Urumuri rugeza aho rukazimira, kubera ibicu birukingirije, nyamara ntibitinda umuyaga urabihuha, bikayoyoka,

²² urumuri rukamurikira mu majyaruguru nka zahabu. Imana yisesuyeho icyezezi kidasanzwe,

²³ ni yo Nyir’ububasha, ntawayigerera, irahebuje mu mbaraga no mu butabera; irangwa n’ubutungane bwinshi, kandi nta we yarenganya.

²⁴ Ni yo mpamvu abantu bayitinya, nta n’umwe yitaho mu bibwira ko ari abahanga!