Yobu 35 - Kinyarwanda Bibiliya Ntagatifu

Ijambo rya gatatu rya Elihu

¹ Elihu afata ijambo, agira ati

² «Ubwo uribwira ngo ufite ukuri, ukeka ko wakwiregura imbere y’Imana,

³ uvuga uti ’Kuba indacumura bimariye iki? Hari akamaro bimfitiye?’

⁴ Ubu rero, ngiye kugusubiza, wowe n’incuti zawe.

⁵ Itegereze ijuru, urirebe, uhange amaso ibicu, urasanga biri hejuru yawe.

⁶ Ibyaha ukora wibwira se ko bishyikira Imana? Iyo wungikanya ibicumuro, wibwira ko hari icyo itakaza?

⁷ Iyo ubaye intungane se ho, hari icyo uyongerera? Hari icyo se uba uyihaye?

⁸ Abo ubugome bwawe bukoraho ni abantu nkawe, n’ubutungane bwawe bukarengera mwene muntu!

⁹ Iyo umuntu akandamijwe arataka, yahohoterwa n’abakomeye akavuza induru;

¹⁰ ariko nta we ugira ati ’Imana yaturemye iri he? Yo itera abantu kuyiramya nijoro,

¹¹ yo iduha ubwenge buruta ubw’inyamaswa zo ku isi, n’ubwitonzi burusha ubw’inyoni zo mu kirere?’

¹² Bigatuma rero abantu batakamba, ntibasubize, bitewe n’ubwirasi bw’abagome.

¹³ Nawe rero ugatera hejuru ngo Imana ntiyumva, ngo Nyir’ububasha ntabyitayeho!

¹⁴ Ubwo se yakumva ite, kandi uvuga ko utayibona, ko wayiregeye, none ukaba utegereje igisubizo;

¹⁵ ukemeza ko uburakari bwayo budahana, kandi ko ubwicanyi itakibwitaho!

¹⁶ Ngayo amagambo y’amahomvu Yobu avuga; ni ubwenge buke bumutera gusukagura amagambo.»