Yobu 3 - Kinyarwanda Bibiliya Ntagatifu

I. IKIGANIRO CYA MBERE Yobu avuma umunsi yavutseho

¹ Nyuma y’ibyo, Yobu abumbura umunwa, avuma umunsi yavutseho.

² Nuko afata ijambo, agira ati

³ «Umunsi navutseho ntukabeho, n’ijoro ryavuzwemo ngo ’Umwana w’umuhungu yasamwe!’

⁴ Uwo munsi uragahinduka umwijima w’igicuku; Imana Nyir’ijuru ntizongere kuwitaho, uzahore ari icuraburindi!

⁵ Uragahindanywa n’umwijima w’igicuku, ibihu biwubudikeho, maze biwukangaranye!

⁶ Iryo joro riragatahwa n’umwijima, kandi ntirikabarirwe mu yandi y’umwaka, ntirizongerwe ku yandi y’amezi!

⁷ Ni koko iryo joro rizahore ari ingumba, kandi ntihazagire impundu zirivugamo.

⁸ Koko abateramwaku barakarivuma, bo batinyuka gukangura cya Leviyatani!

⁹ Inyenyeri zo mu rukerera rwaryo zirakazima, rijye ritegereza ko bucya rihebe, ntirikabone umuseke weya!

¹⁰ Kuko ritamfungiraniye mu nda ibyara, ngo noye kuzahura n’imibabaro integereje.

¹¹ Ni kuki ntavutse ndi igihwereye, cyangwa ngo mbe narahwereye nkibona izuba.

¹² Ibibero bya mama byankikiriye iki? Amabere ye yanyonkereje iki?

¹³ Ubu none mba nibereye ikuzimu, niryamiye mu mahoro, kandi mba nsinziriye, niruhukira,

¹⁴ ndi kumwe n’abami n’ibikomangoma, bari bariyubakiye amazu bahambwemo,

¹⁵ cyangwa hamwe n’abatware bari batunze zahabu, amazu yabo barayahunitsemo feza.

¹⁶ Ubonye ahubwo iyaba mama yarakuyemo inda, sinigere mbaho nk’abandi bapfa batabonye izuba!

¹⁷ Ikuzimu, abagome bashira ubukaka, ni ho abananiwe bajya kuruhukira.

¹⁸ N’abahoze ari imbohe bagira ituze, ntibabe bacyumva ijwi ry’umurinzi.

¹⁹ Aho hantu, abakuru n’abato barareshya, maze umucakara agasubirana ubwigenge.

²⁰ Ni iki gituma Imana ireka imbabare zikavuka, igaha ubugingo ab’umutima wuzuye amaganya;

²¹ bamwe bifuza urupfu bakarubura, bakarushakashaka kurusha umukiro wundi!

²² Nuko bakishimira kubona aho bazahambwa, bakanezezwa no kugenerwa imva.

²³ Umuntu utazi iyo agana kandi akaba yibasiwe n’Imana, kubaho yabiherewe iki?

²⁴ Koko rero, mu kigwi cy’umugati, ntunzwe n’amaganya, kandi amarira yanjye atemba nk’umugezi.

²⁵ Icyanteraga ubwoba ni cyo kingwirira, icyo nishishaga ni cyo mbona.

²⁶ Nta gahenge, nta mahoro nkigira, habe emwe no kuruhuka, mpora ku nkeke.»