Yobu 29 - Kinyarwanda Bibiliya Ntagatifu

V. UMWANZURO W’ICYO KIGANIRO YOBU ARIREGURA AGANYA Yobu aribuka amahirwe yari afite kera

¹ Yobu akomeza umuvugo we, agira ati

² «Ni nde uzansubiza imibereho nk’iyo nahoranye mbere, igihe Imana yandindaga,

³ ubwo itara rye ryamurikiraga ku mutwe wanjye, maze urumuri rwe rukanyobora mu mwijima?

⁴ Uwansubiza uko nari meze, igihe nari ntengamaye, Nyir’ububasha ari we undinze,

⁵ Imana ikiri kumwe nanjye, igihe abana banjye bankikizaga,

⁶ niyuhagiza amata ibirenge, amavuta avubuka mu rutare, agatemba nk’imigezi!

⁷ Icyo gihe, nasohokeraga ku karubanda hafi y’umugi, nkahasanga intebe yangenewe,

⁸ urubyiruko rwambona rukihisha, naho abakambwe bagahaguruka banyubahiriza;

⁹ abatware birindaga kuvuga, iminwa yabo bakayipfuka,

¹⁰ ijwi ry’ibikomangoma rigacweza, ururimi rwabo bakaruca bakarumira.

²¹ Baracecekaga bakantega amatwi, bagategereza igitekerezo cyanjye.

²² Iyo narangizaga kuvuga, nta wasubizagayo, ahubwo ijambo ryanjye ryarabacengeraga,

²³ ugasanga bampanze amaso, nk’abategereje imvura, bakasama nk’abarangamiye iy’umuhindo.

²⁴ Iyo nabasekeraga, baratangaraga, bakitegereza uko nsa nta na hamwe basize.

²⁵ Ni jye wabayoboraga, nkabarangaza imbere, nkamera nk’umwami uri hagati y’imbaga ye, aho mbajyanye bakajya aho.

¹¹ Ni koko, uwanyumvaga wese yanyitaga umuhire, n’umbonye wese akanyamamaza,

¹² kuko nakizaga umukene untakambiye, cyangwa imfubyi yabuze kirengera.

¹³ Abihebye bose bapfaga bandamya, n’umutima w’umupfakazi nkawuha kwishima.

¹⁴ Narangwagaho ubutungane, kandi bunyizihiye, ubutabera ni bwo bwari igishura n’ikamba ryanjye.

¹⁵ Nareberaga impumyi, nkagendera igicumba,

¹⁶ nari umubyeyi w’abakene, kandi nkita ku magorwa ya ba nyakamwe.

¹⁷ Abagiranabi nabakuraga amenyo, nkabatesha abo bashakaga kurya.

¹⁸ Ubwo naribwiraga nti «Nzapfa nshaje, mfite imyaka itabarika nk’umusenyi;

¹⁹ imizi yanjye izashorera mu mazi, maze nijoro urume rutonde ku mashami yanjye;

²⁰ ikuzo ryanjye rizahora ari ryinshi, kandi umuheto wanjye uzasubirana umurego.»