Yobu 27 - Kinyarwanda Bibiliya Ntagatifu

Yobu yongera kuvuga ko ari umwere

¹ Nuko Yobu yongera gufata ijambo aravuga ati

² «Ndahiye Imana yanze kundenganura, ndahiye Nyirububasha unshavuza,

³ igihe cyose ngihumeka, igihe cyose Imana ikimpaye umwuka,

⁴ sinzigera ngira ikibi mvuga, nta n'ubwo nzigera mbeshya.

⁵ Sinshobora kwemera na rimwe ko muvuga ukuri, nzarinda nipfira nkivuga ko ndi umwere !

⁶ Nzakomeza kuba intungane sinzabireka, igihe cyose nkiriho nta cyo nishinja.

⁷ «Unyanga azapfe urw’abagome, umpagurukiye apfe urw'inkozi z'ibibi !

⁸ Umuhakanamana agira cyizere ki ? Agira cyizere ki iyo yambuwe ubuzima bwe ?

⁹ Dore amakuba azamwugariza, mbese namwugariza Imana izumva ugutakamba kwe ?

¹⁰ Umuntu nk’uwo ntiyakwishimira Nyirububasha, ntiyata igihe cye atakambira Imana.

¹¹ Jyeweho nzabamenyesha ububasha bw’Imana, sinzabahisha imigambi ya Nyirububasha.

¹² Erega namwe mwese mwarabyiboneye ! None se ni iki gituma muvuga amagambo y'amahomvu ?

Sofari avuga ubwa gatatu

¹³ «Dore ibihembo Imana igenera umugome, dore igihano Nyirububasha agenera abanyagitugu :

¹⁴ abana abyara bazicwa n'inkota, abamukomokaho bazicwa n'inzara.

¹⁵ Abe barokotse bazatsembwa n'icyorezo, abapfakazi babo ntibazabaririra.

¹⁶ Nubwo yarunda ifeza nyinshi, nubwo yarunda imyambaro,

¹⁷ iyo myambaro izambarwa n'intungane, ifeza na yo izajyanwa n'abere !

¹⁸ «Inzu y'umugome idigadiga nk’iy’igitagangurirwa, idigadiga nk'akaruri k'umurinzi w'umurima.

¹⁹ Aryama akungahaye, akabyuka atindahaye, iyo akangutse asanga ibyo atunze byayoyotse.

²⁰ Ibitera ubwoba bimwisukiranyaho nk'amazi, nijoro serwakira ikamwamurukana.

²¹ Umuyaga w’iburasirazuba uramutwara, uramutumukana akava aho yari atuye.

²² Umuyaga umutumura nta mpuhwe, nta bwo abasha guhunga ubukana bwawo.

²³ Ababonye ibimubayeho baramukwena, aho agannye hose bamuha urw'amenyo !»