Yobu 26 - Kinyarwanda Bibiliya Ntagatifu

Yobu asubiza Bilidadi

¹ Nuko Yobu arabasubiza ati ati

² «Mbega ngo uratera inkunga umunyantegenke ! mbega ngo uragoboka utishoboye !

³ Mbega ngo uragira inama ikiburabwenge ! Mbega ngo urangaragariza ubushishozi buhambaye !

⁴ Ariko se ayo magambo yose urayabwira nde ? Ni nde wakoheje kuvuga uryo ?

Ububasha bw'Imana ku byaremwe byose

⁵ Abapfuye barahindira umushyitsi ikuzimu, amazi n’ibiyabamo biradagadwa.

⁶ Imana ireba ibiri ikuzimu, aho ikuzimu ntihihisha amaso yayo.

⁷ Ni yo yahanitse ikirere, ni yo yatendetse isi ku busa busa.

⁸ Amazi iyabumbira mu bicu bibuditse, nyamara nubwo biremereye ntibihanuka.

⁹ Itwikira ukwezi, igutwikiriza ibicu byayo.

¹⁰ Ishyiraho ikirere cy'urugabano hejuru y’amazi, urugabano rutandukanya umucyo n’umwijima.

¹¹ Imana itigisa inkingi z’ijuru, irazitigisa zigakangarana.

¹² Ububasha bwayo bwatumye icubya inyanja, ubwenge bwayo bwatumye irimbura Rahabu.

¹³ Umwuka wayo wakenkemuye ijuru, ubwayo yivuganye cya gikoko kabutindi !

¹⁴ Niba ibi yakoze bidahambaye kuri yo, ibyo twe dushobora kumenya ni bike cyane ! Ese ubwo ni nde wasobanukirwa n’ububasha bwayo ?»