Yobu 24 - Kinyarwanda Bibiliya Ntagatifu

Yobu avuga ko abagome bishyira bakizana

¹ «Kuki Imana Nyirububasha atagena igihe cy'urubanza ? Kuki abayoboke bayo batamenya uwo munsi ?

² Dore hariho abimura imbago z'amasambu yabo, hariho n'abaragiye amatungo bashimuse.

³ Hariho abahuguza impfubyi indogobe yayo, hariho n'abatwara ikimasa cy'umupfakazi ho ingwate.

⁴ Batoteza abatishoboye bakabayobya, abakene bo mu gihugu bakagomba kwihisha.

⁵ Bameze nk'indogobe mu butayu, bazindukira mu butayu gushaka ibyokurya, bajyayo gushaka ibyo gutunga abana babo.

⁶ Bahatirwa gutongora imirima y'abagome, bagahatirwa gusarura imizabibu yabo.

⁷ Bararira aho nta cyo biyoroshe, nta cyo bagira cyo kwikinga imbeho.

⁸ Imvura yo mu misozi ibacikiraho, babura ubwugamo bakikinga ku rutare.

⁹ Imfubyi bayinyaga n'ibyayibeshagaho, naho abana b’umukene bakabagira ingwate.

¹⁰ Bityo bagendera aho bambaye ubusa, bicwa n'inzara nyamara bikorereye abandi imiba y'ingano !

¹¹ Bakamura amavuta mu minzeze, babengera divayi mu mizabibu, nyamara bo bicwa n'inyota.

¹² "Mu mugi huzuye imiborogo y'abasamba, nyamara Imana ntiyita ku gutakamba kwabo ! babura ubwugamo, bakisunga urutare.

¹³ Abagome bazirana n'urumuri, ntibashaka kugendera mu mucyo, ntibaguma mu nzira zawo.

¹⁴ Umwicanyi abyuka mu rukerera, yica umukene n'utishoboye, iyo ijoro riguye ajya kwiba.

¹⁵ Umusambanyi ategereza ko bwira, agenda yipfutse mu maso, yibwira ati 'Nta wuri bumbone'.

¹⁶ Abajura bamena amazu nijoro, ku manywa bakihisha, bazirana n'umucyo.

¹⁷ Kuri bo igitondo kibabera nk'umwijima w'icuraburindi, koko rero bamenyereye ibitera ubwoba bya nijoro.

¹⁸ "Imibereho y'abagome ni nk'amazi ahita, aho batuye haravumwe, nta n'umwe muri bo ukigera mu mizabibu ye.

¹⁹ Uko icyokere n’ubushyuhe bishongesha urubura, ni ko umunyabyaha azimirira ikuzimu.

²⁰ Nyina wamubyaye aramwibagirwa, inyo ziramurya ntiyongere kwibukwa. Arimbuka nk'igiti kirimburanywe n'imizi.

²¹ Yagiriraga nabi abagore bagumbashye, yakandamizaga n'abapfakazi.

²² Imana Nyirimbaraga irimbura abanyagitugu, iyo ibahagurukiye ntibaba bakirusimbutse.

²³ Haba ubwo Imana ibareka bakiyumvamo amahoro, icyakora igahoza ijisho ku migenzereze yabo.

²⁴ Bagubwa neza akanya gato, nyuma bakarimbuka, bacishwa bugufi bakamera nk'abandi bose, bararabirana bakamera nk’ihundo batemye.

²⁵ Ni nde wanyomoza ko ibyo atari ko biri ? Nagaragaze ko ibyo mvuze ari amahomvu »