Yobu 22 - Kinyarwanda Bibiliya Ntagatifu

III. IKIGANIRO CYA GATATU Elifazi afata ijambo ubwa gatatu

¹ Elifazi w’i Temani afata ijambo, agira ati

² «Ese umuntu yagirira akamaro Imana? Oya, umuntu uzi gushishoza, ni we ubwe wigirira akamaro.

³ Nta cyo Nyir’ububasha yunguka iyo ubaye intungane, ubwo se wumva bimwungura iki iyo ubaye indakemwa?

⁴ None se kuba umukunze ni cyo aguhanira, bigatuma agucira urubanza?

⁵ Aho si ukubera ubugome bwawe bukabije, n’ibyaha byawe birenze urugero?

⁶ Wakaga abavandimwe bawe ingwate nta mpamvu, abakene ukabacuza utwambaro twabo.

⁷ Uwabaga afite inyota wamwimaga icyo anywa, n’ushonje ukamwima umugati.

⁸ Igihugu cyari icy’abafite amaboko, kandi kigaturwa n’abatoni bawe.

⁹ Wirukanaga abapfakazi bakagenda amara masa, imfubyi ukazivunagura amaboko.

¹⁰ Ni yo mpamvu rero waguye mu mutego, kandi ukaba wahiye ubwoba;

¹¹ urumuri rwacuze umwijima, ntiwaba ukibona, urengwaho n’ikizenga cy’amazi.

¹² Imana se ntiyibera mu bushorishori bw’ijuru? Itegereze inyenyeri, urebe ukuntu ziri hejuru cyane!

¹³ None waravuze ngo ’Imana se izi iki? Yamenya ibintu inyuze he ibicu?

¹⁴ Ibicu birayibambira, ntishobore kubona, ikagenda izenguruka ijuru.’

¹⁵ Urashaka se gukomeza ya nzira ya kera, imwe yanyuzwe n’abagome,

¹⁶ ba bandi bamizwe imburagihe, igihe umwuzure urenze hejuru y’ibyo bari bubatse?

¹⁷ Babwiraga Imana ngo ’Have igirayo; Nyir’ububasha se yashobora kudukoraho iki?’

¹⁸ Nyamara ni we wari warujuje umutungo mu mazu yabo, ariko inama zabo zigacisha ukubiri na we!

¹⁹ Ukugwa kwabo gushimisha intungane, maze abaziranenge bakabasekera.

²⁰ Umutungo wabo warayogojwe, n’ibyo basize umuriro urabitwika!

²¹ Ngaho nawe igorore na Nyir’ububasha, mubane mu mahoro, bityo umutekano uzakugarukira;

²² ujye wumva inyigisho ze, ubike amagambo ye ku mutima.

²³ Nugarukira Nyir’ububasha, ukicisha bugufi, ukiyama uburiganya mu nzu yawe,

²⁴ nusuzugura zahabu, ukayijugunya mu bishingwe, n’andi mabuye y’agaciro ukayata mu misitwe,

²⁵ ubwo ni we ubwe uzaba zahabu yawe, akakubera ikirundo cya feza.

²⁶ Koko rero, Nyir’ububasha ni we uzakunezeza, maze uzubure umutwe urangamire Imana;

²⁷ uyitakambire, ikubabarire, n’ibyo wifuza, ubigereho.

²⁸ Nugira umugambi ufata, uzaguhira, n’inzira zawe zirangwe n’umucyo,

²⁹ kuko, acubya uwikuza, agakiza uwiyoroheje;

³⁰ arokora ab’intungane, kandi wowe uzakizwa n’ibikorwa byawe biboneye!»