Yobu 19 - Kinyarwanda Bibiliya Ntagatifu

Yobu asubiza Bilidadi

¹ Yobu afata ijambo, agira ati

² «Muzahereza he kunshengura umutima, munsukiranyaho ayo magambo yanyu?

³ Dore bubaye ubwa cumi munsagarira, mukankoza hirya no hino nta cyo mwishisha.

⁴ Kandi rero niba naranayobye, ibyo ni jye jyenyine bireba.

⁵ Mu by’ukuri, niba munyigambaho, kandi mukanshinja ibyo nzira,

⁶ mumenye ko Nyir’ububasha ari we wandenganyije amfatira mu mutego we.

⁷ Ndataka ko ndengana, ntihagire unyumva, natabaza, nkabura undenganura!

⁸ Inzira yanjye yarayizitiye, sinshobora guhita, aho nyura yahashyize umwijima;

⁹ anyambura ikuzo ryanjye, ancuza ikamba ryari rindi ku mutwe;

¹⁰ yambujije epfo na ruguru, ndabyina mvamo, amizero yanjye yayagushije hasi nk’igiti batsinze;

¹¹ uburakari bwe bwangurumaniyeho, angenzereza nk’umwanzi we;

¹² ingabo ze zantereye icyarimwe, zishakira inzira iziyobora iwanjye, maze zishinga ingando ahakikije ihema ryanjye.

¹³ Abavandimwe banjye barampunze, n’incuti zanjye zirantererana.

¹⁴ Abaturanyi n’abo twari tuziranye, barigendeye, ntibakinyibuka.

¹⁵ Ari abashyitsi baba mu rugo iwanjye, ari abaja banjye, bose bamfata nk’umuvantara; usanga mbateye imbogamizi.

¹⁶ Iyo mpamagaye umugaragu wanjye, ntiyitaba, n’aho nahatiriza nkamwinginga;

¹⁷ umwuka wanjye utera umugore wanjye ishozi, none n’urubyaro rwanjye rusigaye runyinuka.

¹⁸ Dore n’abana bato basigaye bansuzugura, naba ngize ngo ndavuga, bakiha inkwenene;

¹⁹ inkoramutima zanjye zose ziranyitaza, n’abo nakundaga, ubu barampindutse.

²⁰ Amagufa yanjye yumanye n’uruhu, nsigaye ngenda nshinyitse amenyo.

²¹ Mwebwe ab’incuti zanjye, ndabatakambiye, nimumbabarire, dore Nyir’ububasha yaranshegeshe!

²² Ni kuki munyibasiye nk’Imana? Ese ntimuzageza aho mumpa agahenge?

²³ Icyampa ngo amagambo yanjye azandikwe, bayashyire ku rubaho rw’umuringa,

²⁴ bakoreshe ikaramu y’icyuma, maze bayasharage ku rutare ubutazasibangana!

²⁵ Jyewe nzi ko umuvugizi wanjye ariho, amaherezo azatunguka ku isi, aze andengere;

²⁶ namara kunkangura, azampagarika iruhande rwe, maze mbonere Imana mu mubiri wanjye.

²⁷ Koko ni jyewe ubwanjye uzayirebera, nzayibonesha amaso yanjye bwite, atari ay’undi; ngiyo inyota inyuzuye umutima.

²⁸ Iyo mwibwira muti ’Tuzamuturuka he, tuzakura he icyo tumushinja mu rubanza?’

²⁹ mujye mutinya ko namwe inkota yabagwira, kuko uburakari buzibasira abagome, maze mukamenyereho ko urubanza ruzababaho.»