Yobu 17 - Kinyarwanda Bibiliya Ntagatifu

¹ Umwuka urenda kunshiramo, ndarembye, ndi uwo guhambwa!

² None se sinahindutse urw’amenyo, kandi ubugome bwabo si bwo bumbuza gusinzira?

³ Mana yanjye, unyiteho! Ni nde wundi wakwemera kunyishingira?

⁴ Koko rero, umutima wabo wawunyujije ukubiri n’ubwenge, ni yo mpamvu utazatuma bigamba.

⁵ Bameze nk’umuntu ugabiza ibye rubanda, kandi abana be bamuhanze amaso.

⁶ Wampinduye iciro ry’imigani, none nabaye uwo bavunderezaho amacandwe;

⁷ amaso yanjye yishwe n’agahinda, n’ingingo zanjye zose zaragagaye.

⁸ Abanyamurava byabateye ubwoba, uw’intungane arakarira umugiranabi,

⁹ kandi umunyakuri akomeza inzira ye, maze uw’umwere arushaho gukaza umurego.

¹⁰ Ngaho rero mwese nimuhaguruke munshinje; nyamara nta munyabwenge n’umwe mbasangamo!

¹¹ Ubuzima bwanjye n’imigambi yanjye, byose byabaye impfabusa, n’igihe kiranshirana.

¹² Ijoro bo baryita umunsi, bwakwira bati ’Burakeye.’

¹³ Icyo ndindiriye ni iki? Inyenga yatashye iwanjye, uburiri bwanjye buri mu mwijima;

¹⁴ imva nsigaye nyita ’data’, naho inyo nkazita ’mama’ na mushiki wanjye!’

¹⁵ Icyizere nari mfite kiri he? Ya mahirwe nahoranye ni nde ukiyabona?

¹⁶ Ese ibyo nzamanukana na byo tujyane ikuzimu, maze tuzimirire hamwe mu butaka?»