Yobu 16 - Kinyarwanda Bibiliya Ntagatifu

Yobu asubiza Elifazi

¹ Yobu afata ijambo, agira ati

² «Amagambo nk’ayo nayumvise kenshi, mwese murantera agahinda aho kumpoza!

³ Muravuga ngo ’Amahomvu yawe azashira ryari?’ cyangwa ngo ’Ni iki kiguteye gushyanukira gusubiza?’

⁴ Nanjye mba mvuga nkamwe, iyo muba mu kaga ndimo; nabahimbiraho amagambo, nkabannyega,

⁵ nkabatera inkunga y’akarimi gusa, amagambo meza akabahoza akababaro.

⁶ Ariko kuvuga, si byo binkiza ububabare, guceceka na byo, ntibinyorohereza.

⁷ Noneho Imana ingejeje kure kubi, ibitero byayo birankuranwaho.

⁸ Yanyibasiye, iranshinja nabi, n’ukunanuka kwanjye kurabigaragaza.

⁹ Umujinya wayo urandya, uranyikomye, ari na ko impekenyera amenyo; umwanzi wanjye arampigisha ijisho.

¹⁰ Baranyanjamye, baransebya, bakankubita inshyi, bose bahagurukiye kundwanya.

¹¹ Koko Imana yantegeje abagizi ba nabi, inta mu maboko y’abagome.

¹² Nari nibereye mu mahoro, iranturumbanya, imfata ku gakanu, inkubita hasi; impindura imashiro ryayo.

¹³ Iranyuza imyambi impande zose, impinguranya impyiko itambabariye, indurwe yanjye iyisesa hasi.

¹⁴ Iransumira nk’umurwanyi, ingwizaho inguma zayo.

¹⁵ Niboheraho ikigunira, nkurunga uruhanga rwanjye mu mukungugu,

¹⁶ amaso yanjye yatukujwe no kurira, none ibigohe byanjye byuzuyeho ibihu.

¹⁷ Nyamara ariko nta nabi indangwaho, n’isengesho ryanjye ni iry’umwere!

¹⁸ Wa si we, wipfukirana amaraso yanjye, hatagira ikintangirira induru!

¹⁹ Kuva ubu, uwo nzatangaho umugabo ari mu ijuru, uzanyishingira ari hejuru hariya.

²⁰ Icyampa ngo induru yanjye igere ku Mana, mu gihe amarira yanjye yisesa imbere yayo.

²¹ Iyaba yashoboraga gukemura urubanza umuntu afitanye na yo, nk’uko ikemura urw’umuntu na mugenzi we!

²² Koko rero imyaka nshigaje kubaho irabaze, none ngiye kuzimira ubutazagaruka.