Yesaya 7 - Kinyarwanda Bibiliya Ntagatifu

Ubutumwa Uhoraho yoherereje Akhazi

¹ Ku ngoma ya Akhazi mwene Yotamu, mwene Oziya umwami wa Yuda, Rasoni umwami wa Aramu, na Peka mwene Remaliyahu, umwami wa Israheli, barazamutse batera Yeruzalemu, ariko ntibashobora kuyigarurira.

² Babimenyesha abo mu muryango wa Dawudi, bati «Aramu yashinze ibirindiro muri Efurayimu.» Nuko umwami na rubanda bakuka umutima, boshye ibiti by’ishyamba bihungabanywa n’umuyaga.

³ Uhoraho abwira Izayi ati «Sohoka, ujyane n’umuhungu wawe Sheyari‐Yashubi, musanganire Akhazi ku mpera y’umugende ujyana amazi mu kigega cya ruguru, ku muhanda ugana ku murima w’umumeshi;

⁴ maze umubwire uti ’Humura ! Witinya kandi ntugire ubwoba. Wihagarika umutima kubera buriya busabusa bw’amafumba abiri acumbeka, cyangwa se kubera uburakari bukaze bwa Rasoni, umwami wa Aramu, na mwene Remaliyahu.

⁵ Aramu yagiye inama na Efurayimu na mwene Remaliyahu, ngo bazakurimbure, bavuga bati

⁶ ’Tuzamuke dutere igihugu cya Yuda, tubakure umutima, tukinjiremo maze tukigarurire, twimike mwene Tebeyeli ahabere umwami.’

⁷ Nyamara Nyagasani Imana avuze atya: Ibyo ntibiteze guhama, ntibizigera bibaho!

⁸ Damasi ni umutwe wa Aramu, naho Rasoni akaba umutware wa Damasi, — hasigaye imyaka itarenga mirongo itandatu n’itanu, Efurayimu ikaneshwa, ntibe icyitwa igihugu.—

⁹ Samariya ni umutwe wa Efurayimu, naho mwene Remaliyahu akaba umutware wa Samariya. Nimudakomera ku Mana, ntimuzakomera.»

Umuhungu agiye kuvuka akazitwa Emanuweli

¹⁰ Uhoraho arongera abwira Akhazi, ati

¹¹ «Saba Uhoraho, Imana yawe, aguhe ikimenyetso cyaba icyo hasi ikuzimu, cyangwa se icyo hejuru mu kirere.»

¹² Akhazi arasubiza ati «Nta cyo nsabye, kandi sinshaka no kwinja Uhoraho.»

¹³ Nuko Izayi aravuga ati «Tega amatwi rero, muryango wa Dawudi! Mbese ntibibahagije kunaniza abantu, kugira ngo mube mutangiye no kunaniza Imana yanjye?

¹⁴ Noneho rero, ni Nyagasani ubwe uzabihera ikimenyetso: Dore ngaha umwari asamye inda, akazabyara umuhungu, maze akazamwita Emanuweli.

¹⁵ Azatungwa n’amata y’ikivuguto n’ubuki, kugira ngo azabashe kwanga ikibi, ahitemo icyiza.

¹⁶ Na mbere y’uko uwo mwana azabasha kwanga ikibi agahitamo icyiza, ibihugu by’abo bami bombi utinya, bizaba bitakivugwa.

¹⁷ Naho wowe, umuryango wawe n’inzu ya so, Uhoraho azabateza iminsi mibi, itarigeze ibaho, kuva igihe Efurayimu yitandukanyije na Yuda. (Yavugaga umwami wa Ashuru.)

¹⁸ Uwo munsi, Uhoraho azahamagara isazi zo ku mpera y’imigezi ya Misiri, n’inzuki zo mu gihugu cya Ashuru,

¹⁹ maze zose zize, zihumbike mu mikokwe yo ku misozi, no mu masenga yo mu bitare, mu bihuru byose no mu mirima hose.

²⁰ Uwo munsi, Uhoraho azakogosha umusatsi wo ku mutwe, n’ubwoya bwo ku birenge ndetse n’ubwanwa abumareho, akoresheje urwembe atiye hakurya y’uruzi rwa Efurati. (Yavugaga umwami wa Ashuru)

²¹ Uwo munsi kandi, buri muntu azaba atunze itungo rimwe mu matungo maremare, n’abiri mu matungo magufi,

²² maze kubera amata azaba ari menshi mu gihugu, bazanywe ikivuguto. Ni koko, abazaba basigaye mu gihugu, bazatungwa n’amata y’ikivuguto n’ubuki.

²³ Uwo munsi nanone, ahantu hari ingemwe igihumbi z’imizabibu, zikwiranye n’ibiceri igihumbi bya feza, hazahinduka ibihuru by’amahwa n’imifatangwe.

²⁴ Hazagerwa gusa n’uwitwaje umuheto n’imyambi, kuko igihugu cyose kizahinduka amahwa n’imifatangwe.

²⁵ Imisozi yahingishwaga amasuka ntibazayigarukamo, kubera gutinya amahwa n’imifatangwe, izahinduke urwuri rw’inka n’intama.