Yesaya 66 - Kinyarwanda Bibiliya Ntagatifu

Abayoboke b’ukuri n’abatari bo

¹ Uhoraho avuze atya: Ijuru ni intebe yanjye y’ubwami, isi ikaba akabaho nkandagizaho ibirenge byanjye. Mwanyubakira rero inzu nyabaki? Aho naruhukira, ni hehe?

² Ikindi kandi, ibi byose byakozwe n’ikiganza cyanjye, ibyaremwe byose ni ibyanjye, uwo ni Uhoraho ubivuze. Ariko uwo nitaho cyane ni umukene, ufite umutima ushavuye kandi akubaha ijambo ryanjye.

³ Kugira ngo bature igitambo, bica ikimasa, ariko kandi bakica n’umuntu! Basogota umwana w’intama, bagahotora n’imbwa! Bahereza ituro, rikaba ari amaraso . . . y’ingurube! Bagira urwibutso rw’ububani, nyamara bakosa . . . ikigirwamana ! Koko rero, abo bantu bihimbiye inzira zabo bwite, bishimira kuguma mu mahano yabo.

⁴ Nanjye nzashimishwa n’ingaruka mbi z’ibikorwa byabo, nzabateze ibibatera ubwoba, kuko nahamagaye, ntihagire unyumva. Bakoreye ikibi mu maso yanjye, bahitamo ibitanshimisha.

Uhoraho aje kubahumuriza no guca imanza

⁵ Nimutege amatwi ijambo ry’Uhoraho, mwebwe mwese, abahindishwa umushyitsi n’ijambo rye ! Abavandimwe banyu babanga, babaciye kubera izina ryanjye, baravuga bati «Ngaho Uhoraho niyerekane ikuzo rye, maze tubone ibyishimo byanyu.» Nyamara ni bo bazakorwa n’ikimwaro.

⁶ Nimwumve ahubwo urusaku ruvuye mu mugi, n’urwamo ruturutse mu Ngoro ! Ni ijwi ry’Uhoraho witura abanzi be, abaha igihembo kibakwiye.

⁷ Mbere y’iramukwa, Yeruzalemu yarabyaye, mbere y’uko igira ibise, ibyara umuhungu.

⁸ Ni nde wigeze kumva ibintu nk’ibyo ? Ni nde wigeze kubona ibintu bisa bityo ? Igihugu se cyabyarwa umunsi umwe gusa, cyangwa ihanga rikagira ritya rikavuka ? Nyamara ni ko byagendekeye Siyoni, yabaye ikiramukwa, ihita ibyara abahungu.

⁹ Ese ye, yaba ari jye utuma umubyeyi ajya ku nda, ngahindukira nkamubuza kubyara ? Uwo ni Uhoraho ubivuze. Niba kandi ari jyewe utanga ibyara, nahindukira nkabangamira ikivutse ? Uwo ni Uhoraho ubivuze.

¹⁰ Nimwishimane na Yeruzalemu; mwebwe mwese abayikunda, nimuhimbarwe. Nimusabe ibyishimo hamwe na yo, namwe mwese abayiririraga.

¹¹ Muzonke amashereka, kandi muhazwe n’ibere ryayo ribahumuriza, nimukomeze mwonke, kandi muryoherwe n’ibere ryayo ryarese.

¹² Uhoraho avuze atya: Dore ngiye kuyiyoboraho amahoro atemba nk’uruzi, n’ikuzo ry’amahanga ribasendereho nk’umugezi. Muzamera nk’abana bari ku ibere bahagatirwa, kandi bagasimbagirizwa ku bibero.

¹³ Uko umubyeyi ahumuriza umwana we, nanjye ni ko nzabahumuriza, maze muri Yeruzalemu muzahumurizwe.

¹⁴ Muzabibona, umutima wanyu uzasabagizwe n’ibyishimo, ingingo zanyu zizatohagire nk’ibyatsi. Ikiganza cy’Uhoraho kiziyereka abagaragu be, ariko abanzi be, azabarakarira.

¹⁵ Dore Uhoraho aje mu muriro rwagati; amagare ye ni nk’inkubi y’umuyaga, kugira ngo uburakari bwe abumarire mu mujinya, n’imiburo ye isimburwe n’indimi z’umuriro.

¹⁶ Uhoraho azitwaza umuriro n’inkota, kugira ngo acire abantu imanza: abenshi muri bo bakazicwa n’Uhoraho.

¹⁷ Abo ni abiyita «abaziranenge», bakihumanura kugira ngo binjizwe mu busitani buri ahirengeye, bakurikiye umukuru wabo ubayobora; ni na bo kandi barya inyama z’ingurube, bakarya inyamaswa zizira hamwe n’imbeba. Abo bose bazarimbukira icyarimwe, hamwe n’ibikorwa n’ibitekerezo byabo ! Uwo ni Uhoraho ubivuze.

Amahanga yose azakoranyirizwa i Yeruzalemu

¹⁸ Naho jyewe, nzanywe no gukoranyiriza hamwe amahanga y’indimi zose, kugira ngo azarebe ikuzo ryanjye.

¹⁹ Koko, nzashyira ikimenyetso rwagati muri yo, maze nzohereze mu mahanga abarokotse muri bo : i Tarishishi, i Puti n’i Ludi (mu bahanga b’umuheto), i Tubali, i Yabani no mu birwa bya kure bitigeze byumva bamvuga, bitanigeze bibona ikuzo ryanjye, bazamamaze ikuzo ryanjye mu mahanga.

²⁰ Nuko bazagarure abavandimwe banyu bo mu mahanga yose, bahetswe ku mafarasi no mu magare; mu ngobyi, ku nyumbu no ku ntebe nziza, babageze ku musozi wanjye mutagatifu, i Yeruzalemu, uwo ni Uhoraho ubivuze. Bazabampaho ituro, nk’uko Abayisraheli bazana ku nkoko zisukuye, ituro ryabo mu Ngoro y’Uhoraho.

²¹ Ndetse bamwe muri bo, nzabagira abaherezabitambo, uwo ni Uhoraho ubivuze.

²² Uko ijuru rishya n’isi nshya ndemye, bizakomera imbere yanjye, ni na ko urubyaro rwanyu n’izina ryanyu bizakomera, uwo ni Uhoraho ubivuze.

²³ Hazaza igihe ikinyamubiri cyose kizapfukama imbere yanjye, uhereye ku mboneko y’ukwezi, kugeza ku mboneko y’ukundi, kuva kuri sabato kugeza ku yindi, uwo ni Uhoraho ubivuze.

²⁴ Nuko nibasohoka, bazarebe intumbi z’abandwanyije, kuko urunyo ruzabamunga rutazapfa, n’umuriro uzabatwika ntuzazime. Bazatera ishozi icyitwa ikinyamubiri cyose.