Yesaya 57 - Kinyarwanda Bibiliya Ntagatifu

¹ Intungane irapfa, ntihagire n’umwe bibabaza; abagiraneza barashimutwa, ntihagire ubarengera. Ni koko, intungane ziricwa zizira akarengane.

² Ariko rero, amahoro azaza, maze abakurikira inzira itunganye bazashobore kuruhukira mu ituze.

Uhoraho araburira abayobotse ibigirwamana

³ Naho mwebwe, nimwigire hino, bana b’umupfumukazi, bibyarirane by’uburaya n’ubwomanzi.

⁴ Uwo muriho museka ni nde? Uwo mwasamiye mukaba mumunegura, ni nde? Aho ntimuri abana b’ibyigomeke, n’inyoko y’abatekamutwe?

⁵ Mwebwe mwishimishiriza mu nsi y’imishishi, no mu nsi ya buri giti cyose gitoshye, mugatambira abana mu mikokwe, no mu masenga yo mu bitare.

⁶ Amabuye asennye yo mu mikokwe wiziritseho, ni yo mugabane wawe, ni yo uzegukana; kuko ari yo utura ibitambo, ukayazanira amaturo. Urabona se ibyo byatuma mererwa neza?

⁷ Mu mpinga y’umusozi muremure cyane, ni ho wibera n’abagore b’indaya, ni na ho uzamuka ujya gutura ibitambo.

⁸ Inyuma y’urugi n’inkomanizo, wahashyize impigi zawe. Ni koko, wagiye kure yanjye, wiyambika ubusa, udendura uburiri bwawe, uraryama, wihitiramo abo bantu, mwagiranye agakungu.

⁹ Wirukankanye amavuta uyashyira Meleki, umumarira imibavu yawe, wohereza intumwa zawe kugera kure, wisuzuguza utyo ukorera Sekuzimu.

¹⁰ Muri urwo rugendo rwose, warinanije, habe no kwibwira uti «Ibi nta cyo bimaze.» Ahubwo byaguteye kugira ishyaka, kuva ubwo ntiwongeye gucika intege.

¹¹ Mbese ni nde waguteye ubwoba, maze bigatuma umpemukaho? Wowe ntukirushya unyibuka, ntunanzirikana mu mutima wawe. Kuva kera nariyumanganyije sinakwakura, nuko bikuviramo kuntinyuka.

¹² Ariko jyewe nzagaya «ubuyoboke» bwawe n’ibikorwa byawe bitagira icyo bikumarira.

¹³ Nutakamba, ibyo bigirwamana byawe bizagutabare! Nyamara, umuyaga uzabitwara byose, serwakira ibyamukane. Ariko uzampungiraho wese azahabwa igihugu ho umunani, umusozi wanjye mutagatifu uzabe umugabane we.

Uhoraho akiza umuryango we

¹⁴ Bazavuga bati «Nimutunganye umuhanda, mwagure inzira, mukureho icyitwa inkomyi cyose, mu nzira y’umuryango wanjye.

¹⁵ Kuko avuze atya, Usumba byose, agahoraho iteka, n’izina rye rikaba ritagatifu: Jyewe ndi Nyir’ubutagatifu ngasumba byose, nkaba no hafi y’uwicuza n’uwiyoroshya, kugira ngo nsubize ubuzima abasuzuguwe, mpembure imitima yashengutse.

¹⁶ Nta bwo nshaka guhora njya impaka, cyangwa se guhora ndakaye, kuko ibiremwa naremye, byarimbukira imbere yanjye.

¹⁷ Narakariye Israheli kubera ubusambo n’ubujura bwayo, nyihanisha kuyitarura gato, kuko nari ndakaye: nuko irivumbura, iragenda inyura inzira yishakiye,

¹⁸ kandi izo nzira zayo narazibonye! Nyamara ariko, nzayikiza, nyiyobore, nyihumurize kimwe n’abayo bababaye,

¹⁹ nshyire ibinezaneza mu minwa yabo. Amahoro azaba yose ku uwahabye, kimwe no ku uri bugufi; ni byo rwose, nzayikiza! Uwo ni Uhoraho ubivuze.

²⁰ Ariko rero, abagome ni nk’inyanja yisimbiza ntishobore gutuza, amazi yayo akazamura ibyondo n’isayo.

²¹ Abagome ntibazagira amahoro! Uwo ni Uhoraho ubivuze.