Yesaya 49 - Kinyarwanda Bibiliya Ntagatifu

Indirimbo ya kabiri y’Umugaragu w’Uhoraho

¹ Birwa, nimunyumve; bihugu bya kure, muntege amatwi! Uhoraho yampamagaye ntaravuka; nkiri mu nda ya mama, izina ryanjye yararivugaga.

² Umunwa wanjye yawugize nk’inkota ityaye, ankinga mu gacucu k’ikiganza cye, angira nk’umwambi utyaye, ampisha mu mutana we.

³ Yarambwiye ati «Uri umugaragu wanjye, (Israheli,) ni wowe nzagaragarizamo ikuzo ryanjye.»

⁴ Ariko jye naribwiraga nti «Naruhiye ubusa, mvunwa n’ibidafite akamaro.» Nyamara Uhoraho ni we uzandenganura, igihembo nagiteguriwe iruhande rw’Imana yanjye.

⁵ None ngaha, Uhoraho yabyivugiye, we wandemeye kumubera umugaragu, kuva nkiri mu nda ya mama, kugira ngo mugarurire Yakobo, mukorakoranyirize Israheli; guhera ubu rero, mfite ubutoni kuri Uhoraho, ububasha bwanjye bukaba ari Imana yanjye.

⁶ Yarambwiye ati «Gusubiranya imiryango ya Yakobo, no kugarura abarokotse ba Israheli, ibyo ntibihagije ku mugaragu wanjye; ahubwo nakugeneye kuba urumuri rw’amahanga, kugira ngo umukiro wanjye usakare kugera mu mpera z’isi.»

⁷ Avuze atya Uhoraho, Umucunguzi; Nyir’ubutagatifu wa Israheli abwira umuntu w’insuzugurwa, uwo abantu bareba nk’agaterashozi, umucakara w’abategekesha igitugu, ati «Abami ndetse n’ibikomangoma bazareba bahaguruke, bapfukamire Uhoraho kuko ari indahemuka, akaba Nyir’ubutagatifu wa Israheli wakwihitiyemo.»

⁸ Uhoraho avuze atya: Igihe cy’ubutoneshwe naragusubije, ku munsi wo gukizwa naragutabaye, ndaguhanga, nkugenera kuvugurura isezerano nagiranye n’imbaga nyamwinshi, kugira ngo mbyutse igihugu, maze nsubize iminani abari barayinyazwe.

⁹ Imfungwa nzazibwire nti «Nimusohoke» n’abari mu mwijima nti «Nimujye ahabona.» Iruhande rw’inzira, bazahabona ubwatsi, ku misozi yose y’agasi, bazahagire urwuri.

Ukugaruka kw’abajyanywe bunyago

¹⁰ Inzara n’inyota ntibizabica, icyocyere cy’umusenyi cyangwa izuba ntibizabageraho; kuko ubakunda bihebuje azabayobora, akaberekeza ku masoko y’amazi afutse.

¹¹ Ku misozi yose nzahahanga inzira, n’imihanda yanjye nyabagendwa iringanizwe.

¹² Ngabo baraje, baturutse iyo bigwa, bamwe mu majyaruguru no mu burengerazuba, abandi baturutse mu gihugu cya Asuwani.

¹³ Ijuru nirivuze impundu, isi nisabagire, imisozi itere indirimbo z’ibyishimo, kuko Uhoraho yahumurije umuryango we, abakozwaga isoni, akabereka urukundo rwe.

Yeruzalemu yongera kubakwa, igaturwa

¹⁴ Siyoni yaravugaga iti «Uhoraho yarantereranye, Nyagasani yaranyibagiwe.»

¹⁵ Mbese ye, umugore yakwibagirwa umwana yonsa ? Ese yaburira impuhwe umwana yibyariye ? Kabone n’aho we yarengwaho, jyewe sinzigera nkwibagirwa.

¹⁶ Dore nakwanditse mu kiganza cyanjye, inkike zawe nzihozaho ijisho ubudahumbya.

¹⁷ Abubatsi bawe ngabo baraje, naho abagusenya n’abagusahura barahunze.

¹⁸ Raranganya amaso hirya no hino, maze urebe: bose bakoranye, baje bakugana. Ndahije ubuzima bwanjye, bose bazagutaka nk’umurimbo, ubakenyere nk’umweko w’umugeni. Uwo ni Uhoraho ubivuze.

¹⁹ Igihugu cyawe cyahindutse amatongo, cyari cyarasahuwe kandi kidatuwe, guhera ubu kizabana gito abaturage bawe, abakubuzaga uruhumekero bazaguhunge.

²⁰ Abana wari waranyazwe, bazakubwira bati «Hano habaye impatanwa! Duhe aho dutura! Nimwiyegeranye tubone aho dukwirwa.»

²¹ Nuko mu mutima wawe uzibaze uti «Aba se bo, nababyariwe na nde ? Jye ko nari naraciwe ku bana, naragumbashye, narajyanywe bunyago, nkaba n’igicibwa; aba bo bakujijwe na nde ? Ko naherutse nsigara jyenyine, bariya bo babaga he ?»

²² Nyagasani Uhoraho avuze atya : Ngiye kwerekeza ikiganza cyanjye ku mahanga, nzamure ibendera ryanjye, ibihugu biribone : bazane abahungu bawe babatwaye mu maboko, abakobwa bawe babahetse ku ntugu.

²³ Abami bazakurera, abagore babo bakonse. Bazakunamira bakoze uruhanga ku butaka, barigate umukungugu wo mu birenge byawe. Bityo uzamenye ko ndi Uhoraho, n’uko abanyiringira batazakorwa n’ikimwaro.

²⁴ Mbese intwari yakwamburwa umunyago wayo? Imfungwa yaboshywe n’igihangange yo se, yagobotorwa?

²⁵ Nyamara, dore uko Uhoraho yavuze : Uwaboshywe n’intwari azagobotorwa, n’umuryango wanyazwe n’igihangange uzagaruzwa. Uguteraho amahane, ni jye uzamurwanya, abahungu bawe, ni jye uzabakiza.

²⁶ Abagutegekesha igitugu, nzabagaburira imibiri yabo, bazasinde amaraso yabo bwite, boshye abasinze divayi nshya, maze ibinyamubiri byose bimenyereho ko Umukiza wawe ari jyewe Uhoraho, Umucunguzi wawe, Indatsimburwa ya Yakobo.