Yesaya 47 - Kinyarwanda Bibiliya Ntagatifu

Igihano cya Babiloni

¹ Hanuka wikubite hasi, wigaragure mu mukungugu, mwari, mukobwa wa Babeli, mukobwa w’Abakalideya, va ku ntebe y’ubwami, wigaragure ku butaka, kuko utazongera ukundi kwitwa «Akataraboneka na Nyaguhirwa.»

² Fata urusyo maze usye ifu, pfukura imisatsi yawe, uhine ikanzu yawe, ugaragaze ibibero byawe, wambuke inzuzi;

³ ubwambure bwawe nibwitangaze, maze isoni zawe zigaragare !

⁴ Uducungura ni Uhoraho, izina rye ni Umugaba w’ingabo, Nyir’ubutagatifu wa Israheli.

⁵ Iyicarire mu mwijima winumire, mukobwa w’Abakalideya, kuko utazongera kwitwa ukundi «Umugabekazi».

⁶ Nari nararakariye umuryango wanjye, nsuzuguza umurage wanjye, mbagabiza ibiganza byawe; nyamara ntiwigeze ubagirira impuhwe, umusaza umushenguza imizigo yawe!

⁷ Waribwiraga uti «Nzabaho iteka, nzahora nganje!» Ntiwatekereje uko ibintu bizagenda, ngo uzirikane amaherezo yabyo.

⁸ Noneho rero, tega amatwi, wowe watengamaye, ukicara ku ntebe ya cyami nta cyo wishisha, wowe wibwiraga uti «Ni jye uriho, abandi ni ubusa ! Humura sinteze gupfakara, cyangwa ngo mpfushe abana.»

⁹ Umunsi umwe, ibyo byago byombi bizakugwirira : ari ugupfusha abana, ari no gupfakara. Icyo cyago kizakugeraho, n’ubwo amayeri y’abapfumu bawe yiyongera ubutitsa.

¹⁰ Wiringiye ubugome bwawe, uribwira uti «Nta we undeba.» Ariko «ubuhanga» bwawe ndetse n’ «ubwenge» bwawe, ni byo byagushutse, noneho ukibwira uti «Ni jye uriho, abandi ni ubusa !»

¹¹ Ngaho rero icyago kirakugarije, kandi ntuzamenya aho ugihungira; ugiye kugusha ishyano, utazashobora kwikiza. Ni koko, bidatinze ugiye kurimbuka, ku buryo udashobora kubyiyumvisha.

¹² Nuko rero komera ku mayeri y’ubupfumu bwawe no ku mafuti witoje kuva mu buto bwawe, ahari byazakugirira akamaro, bikaguha gutera ubwoba.

¹³ Wajijishijwe n’abakugira inama batabarika, none ngaho nibigaragaze, bagukize, abo bihaye kwigabanya ikirere, bitegereza inyenyeri, maze bakaguhanurira ibizaza bifashishije imboneko y’ukwezi !

¹⁴ Ngaha bagiye kumera nk’ibyatsi bitwikwa n’umuriro, ntibazashobora no kuwiyaruramo, kuko utazaba ari inkekwe yo kwisusurutsa, cyangwa se igishyito cyo kwicarwa imbere.

¹⁵ Nguko uko abo wahirimbaniye bazakumerera, abo waruhiye kuva mu buto bwawe bazigendera, umwe ace ukwe undi ukwe, nta n’umwe uzakurengera.