Yesaya 42 - Kinyarwanda Bibiliya Ntagatifu

Indirimbo ya mbere y’Umugaragu w’Imana

¹ Dore umugaragu wanjye nshyigikiye, intore yanjye inyizihira. Namushyizeho umwuka wanjye; azagaragariza amahanga ubutabera,

² ntazasakuza kandi ntazatera ijwi hejuru, ntazumvikanisha ijwi rye mu mayira.

³ Ntazavuna urubingo rwarabiranye, ntazazimya ifumba igicumbeka, kandi nta kabuza, azagaragaza ubutabera.

⁴ We ntazigera acogora, cyangwa ngo acike intege, kugeza ubwo azaba yamaze gukwiza ubutabera ku isi, n’ibirwa bitegereje amategeko ye.

⁵ Nguko uko avuze Uhoraho, Imana, we waremye ijuru akaribambika, akarambura isi n’ibiyiriho byose, ibiyimeraho akabiha guhumeka, agaha n’umwuka abayigendaho bose.

⁶ Ni jye Uhoraho, wakwihamagariye, nkurikije umugambi wanjye, ngufata ikiganza, ndakwizigamira, nkugenera kwemararira isezerano ry’imbaga, no kuba urumuri rw’amahanga,

⁷ kugira ngo uhumure amaso y’impumyi, uvane imfungwa mu nzu y’imbohe, kandi ukure mu munyururu abari mu mwijima.

Uhoraho agiye kurangiza imigambi ye

⁸ Ni jye, Uhoraho, iryo ni ryo zina ryanjye, ikuzo ryanjye nkaba ntazagira undi ndiha, cyangwa ibigirwamana ngo mbihe ibisingizo bingenewe.

⁹ Dore ibyabaye mbere byarahise, jye kandi mbamenyesheje ibishya, ndabiberetse ngo mubimenye mbere y’uko biba.

¹⁰ Nimuririmbire Uhoraho indirimbo nshya, kuva ku mpera z’isi, muririmbe ibisingizo bye, mwebwe bantu bo ku nyanja n’ibiyirimo byose, namwe birwa kimwe n’ababituye.

¹¹ Ubutayu buhanike amajwi, kimwe n’imigi yabwo, hamwe n’imidugudu Kedari atuyemo; abaturage b’i Sela bamusingize, abo mu tununga tw’imisozi basabagizwe n’ibyishimo.

¹² Nibakuze Uhoraho, bamamarize mu birwa ibisingizo bye !

¹³ Uhoraho agiye gusohoka nk’intwari, azinze umunya nk’ingabo iri ku rugamba, avugije akamo k’impuruza, aratontomye, kandi ateye abanzi be nk’umurwanyi w’intwari.

¹⁴ «Namaze igihe kirekire nicecekeye, ndiyumanganya sinagira icyo mvuga; narashinyirije ndetse umwuka urahera, boshye umugore uri ku nda.

¹⁵ Noneho ngiye kurimbura imisozi n’udusozi, ibyayimezeho byose mbyumishe; inzuzi nzazihindura ibirwa, ibizenga by’amazi mbyumutse.

¹⁶ Nzayobora impumyi mu nzira zitamenyereye, nzinyuze mu tuyira zitazi. Nzahindura umwijima mo urumuri imbere yabo, n’inzira ziyobaguritse, zigororwe. Iyo migambi ngiye kuyirangiza, kandi sinteze kuyireka na rimwe.»

¹⁷ Ngabo basubiranye inyuma ikimwaro, abashyira amiringiro yabo mu bigirwamana, bakabwira ubutare bushongeshejwe bati «Imana zacu ni mwebwe !»

Umuryango udashaka kumva

¹⁸ Mwe bipfamatwi, nimwumve, impumyi namwe nimwitegereze, mubone!

¹⁹ Ni nde mpumyi, uretse umugaragu wanjye ? Ni nde gipfamatwi atari intumwa ngiye kohereza ? Ni nde mpumyi atari icyegera cyanjye ? Ni nde gipfamatwi atari umugaragu w’Uhoraho ?

²⁰ Wabonye byinshi, ariko nta cyo wafashe; ufite amatwi azibutse, ariko ntiwumva!

²¹ Kubera ukudahemuka k’umugambi we, Uhoraho yashatse ko amategeko ye akomera, akaba akataraboneka.

²² Ariko dore imbaga yanyazwe ibyayo, irasenyerwa, bose babaroshye mu myobo, babahisha no mu mazu y’imbohe; babaye abo kujyanwa bunyago, babuze n’umwe wabarengera, barashimutwa, habura n’uwagira ati «Bangarurire !»

²³ Ni nde muri mwe uri butege amatwi aya magambo, akitondera kumva icyo asobanura?

²⁴ Ni nde watanze Yakobo ngo anyagwe ibye, Israheli ngo ijyanwe bunyago? Aho ntiyaba ari Uhoraho twacumuyeho, ntidushake gukurikira inzira ye, kandi ntitwite ku mategeko ye ?

²⁵ Ni yo mpamvu yaroshye kuri Israheli umujinya w’uburakari bwe, ayiteza n’intambara ikomeye, iyokera impande zose, ariko yo ntiyabyumva, igeza n’aho ishya irakongoka, ariko ntiyagira icyo yitaho.