Yesaya 40 - Kinyarwanda Bibiliya Ntagatifu

IGICE CYA KABIRI IGITABO CY’IHUMURIZWA RYA ISRAHELI Imana izarokora umuryango wayo

¹ Nimuhumurize umuryango wanjye, nimuwuhumurize — ni ko Imana ivuze —

² nimukomeze Yeruzalemu; muyimenyeshe ko ubucakara bwayo burangiye, igihano cyayo kikaba gihanaguwe; Uhoraho yayihannye yihanukiriye, kubera amakosa yayo.

³ Ijwi rirarangurura riti «Nimutegure mu butayu inzira y’Uhoraho, muringanirize Imana yacu umuhanda ahantu h’amayaga.

⁴ Akabande kose gasibanganywe, umusozi wose n’akanunga kose bisizwe, n’imanga ihinduke ikibaya.

⁵ Nuko ikuzo ry’Uhoraho rizigaragaze, ibinyamubiri byose bizaribonere icyarimwe, bimenye ko Uhoraho yavuze.»

⁶ Ijwi riravuga riti «Ngaho vuga!» Nanjye ndabaza nti «Mvuge iki se? Ibinyamubiri byose ni ibyatsi, imikomerere yabyo ikaba nk’iy’ururabyo mu murima:

⁷ icyatsi kiruma, ururabyo rukarabirana, iyo umwuka w’Uhoraho ubinyuzeho. Ni byo koko, imbaga y’abantu ni icyatsi:

⁸ icyatsi kiruma, ururabyo rukarabirana, ariko ijambo ry’Imana yacu rizahoraho iteka!»

⁹ Naho wowe, zamuka ku musozi muremure, urangurure ijwi, wowe uzaniye Siyoni inkuru nziza, ntutinye, wowe ntumwa y’inkuru nziza igenewe Yeruzalemu ! Rangurura ijwi ubwire imigi ya Yuda uti «Dore Imana yanyu!»

¹⁰ Ni byo koko, dore Nyagasani Imana ! Araje n’imbaraga nyinshi, afite amaboko, aje gutegeka; dore azanye n’iminyago, abo yatabaye bamubanje imbere.

¹¹ Ameze nk’umushumba uragiye ubushyo, akabwegeranya n’ukuboko kwe; abana b’intama akabatwara mu gituza cye, intama z’imbyeyi akazemera mu rwuri rutoshye.

Ni iki cyagereranywa n’Uhoraho?

¹² Ni nde wapimisha ikiganza cye amazi y’inyanja, ikirere akakigeresha intambwe y’intoki, agashyira mu kebo ubutaka bw’isi, imisozi akayishyira ku gipimo, n’udusozi akadupimisha umunzani ?

¹³ Ni nde wigeze gucengera ibitekerezo by’Uhoraho, akamubera umujyanama w’ingirakamaro ?

¹⁴ Ni nde muntu Uhoraho yaba yaragishije inama, agashobora kumuyobora, akamwigisha guca imanza, akamuha ubumenyi, akamwereka inzira imugeza ku bwenge ?

¹⁵ Dore amahanga ameze nk’igitonyanga kiva mu nyanja, aragerwa ku mukungugu wafashe ku munzani ! Dore n’ibirwa bimeze nk’agafu ahushye !

¹⁶ Amashyamba ya Libani ntahagije mu gucana umuriro, n’inyamaswa zayo ntizihagije ku bitambo bitwikwa.

¹⁷ Amahanga yose nta cyo avuze imbere ye; kuri we yose ni ubusa, nta n’icyo amaze.

¹⁸ Imana mwayinganya na nde, ni ikihe se mwayigereranya?

¹⁹ Ikigirwamana se? Cyacuzwe n’umuntu ! Ukora amashusho agitakaho zahabu, akagishyiraho n’imikufi ya feza.

²⁰ Umutindi utabona ituro ringana rityo, ahitamo igiti kitamungwa, agashaka umubaji w’umuhanga, ushobora kumubariza ikigirwamana kitajegajega.

²¹ Ntimwari mubizi se ? Nta n’ubwo mwigeze kumva bivugwa ? Ntimwabimenyeshejwe se kuva mu ntangiriro ? Ntimwigeze mumenya Uwahanze isi ?

²² Aganje hejuru y’ikirere gitwikiriye isi, akabona abahatuye bameze nk’inzige ! Yakuruye ikirere arakikingira nk’umwenda, akibamba nk’ihema kugira ngo arituremo.

²³ Abategetsi b’igihugu abahindura amanjwe, n’abacamanza b’isi akabagira ubusabusa.

²⁴ Nta kamaro kuba bashinze imizi, nta kamaro ko bakwira hose, nta kamaro ko imizi yabo ifata mu butaka, none dore umwuka urabahushye, ngaho barumiranye, na serwakira irabagurukanye nk’ibyatsi.

²⁵ «Ni nde mwangereranya na we ? Ni nde twaba duhwanye ?» Uwo ni Nyir’ubutagatifu ubivuze.

²⁶ Nimwubure amaso yanyu murebe: ni nde waremye biriya binyarumuri mubona, akabizengurutsa ikirere nk’ingabo ziyereka, akabihamagara byose mu mazina yabyo ? Afite imbaraga nyinshi akagira n’umurego ukomeye, bigatuma nta na kimwe kibura.

²⁷ Yewe Yakobo, yewe Israheli, ni kuki wavuga uti «Inzira yanjye yihishe Uhoraho, Imana yayobewe ibyanjye !»

²⁸ Mbese ntiwari ubizi ? Nta n’ubwo wigeze kumva bivugwa ? Uhoraho ni Imana y’ibihe byose, yaremye isi kuva aho itangirira n’aho iherera. Ntiyigeze ananirwa, nta n’ubwo acogora, nta buryo wacengera ubwenge bwe.

²⁹ Umunyantege amuha imbaraga, agakomeza unaniwe.

³⁰ Abakiri bato bacika intege, bagacogora, ndetse n’abagabo b’intwari bakagwa rwose.

³¹ Ariko abiringira Uhoraho, bazongera kubona imbaraga: bazatumbagira mu kirere nka za kagoma, biruke ubutananirwa; bihute, nta kudohoka !