Yesaya 34 - Kinyarwanda Bibiliya Ntagatifu

Uhoraho azacira isi yose imanza

¹ Mahanga, nimwegere kugira ngo mwumve, bihugu, namwe nimutege amatwi. Isi n’ibiyiriho byose, nibitege amatwi, kimwe n’ubutaka n’ibibumeraho byose.

² Uhoraho yarakariye amahanga yose, yagiriye umujinya ingabo zayo zose. Yagambiriye kubarimbura, yarabatanze ngo bicwe.

³ Abapfuye babo bazajugunywa ku gasozi, imirambo yabo izatungure umunuko, n’imisozi itembeho amaraso yabo.

⁴ Ingabo zose z’ijuru zizayagara, ijuru ryizingazinge boshye umuzinge w’igitabo, ingabo zaryo zihanantuke nk’amababi y’umuzabibu, cyangwa se ay’umutini.

Icyorezo mu gihugu cya Edomu

⁵ Uhoraho avuze atya : Inkota yanjye yo mu ijuru, narayuhiye irahaga, none ngiyo imanukiye kuri Edomu, kuri icyo gihugu natanze ngo kirimburwe.

⁶ Inkota y’Uhoraho yuzuye amaraso, yahaze urugimbu, n’amaraso y’intama n’ay’amasekurume, ibinure by’impyiko za rugeyo, kuko Uhoraho agiye gutambirwa igitambo i Bosira, ari cyo rupfu rw’icyorezo muri Edomu.

⁷ Imbogo, ibimasa n’amapfizi bizicirwa icyarimwe : igihugu cyabo gisindishwe n’amaraso, naho ubutaka buhage urugimbu.

⁸ Kuko ari umunsi w’ukwihorera k’Uhoraho, akaba ari umwaka wo kubitura ibibi bakoreye Siyoni.

⁹ Imigezi yo muri Edomu izahinduka ubujeni, naho umukungugu uhinduke ubumara. Icyo gihugu cyose kizahinduka ubujeni bugurumana,

¹⁰ butazigera buzima, haba nijoro cyangwa se ku manywa, umwotsi wabwo uzacumbeka ubudahwema; uko ibihe biha ibindi, kizagumya kuba ubutayu, ntikizongera kugendwa ukundi.

¹¹ Kizaba intaho y’ibihunyira n’ibinyogote, giturwe n’ibyanira n’ibikona. Uhoraho azakigeresha inago y’icyorezo, agipime cyose akiringanize, maze gihinduke ubusa.

¹² Abanyacyubahiro ntibazongera kuhimika abami ukundi, nta n’abatware bazongera kuharangwa.

¹³ Ingoro zabo zizameramo amahwa, ibigo bikomeye bimeremo ibisura n’ibitovu, habe indiri y’ingunzu, n’imbuga ya za mbuni.

¹⁴ Inturo zizahahurira n’impyisi, hahinduke ibonaniro ry’ibikoko. Hazaba kandi intaho ya Liliti, ikazahabona uburuhukiro.

¹⁵ Ni ho inzoka izashyira icyari cyayo, ihatere amagi, iyararire, iyarinde kandi iyaturage. Ni na ho inkongoro zizakoranira, ingabo n’ingore zazo.

¹⁶ Nimushakashake mu gitabo cy’Uhoraho, musome aya magambo : «Nta n’imwe izabura muri zo, nta n’imwe izazimiza mugenzi wayo, kuko zitegekwa n’ijambo ry’Uhoraho, umwuka we ukazikoranyiriza hamwe.

¹⁷ Buri yose muri zo yayikoreyeho ubufindo, azigabanya igihugu akoresheje inago, zikazagitunga ubuziraherezo, zikazagituramo ingoma ibihumbi.»