Yesaya 25 - Kinyarwanda Bibiliya Ntagatifu

Uhoraho, umurinzi w’abanyantegenke

¹ Ndagusingiza Uhoraho, uri Imana yanjye, ndamamaza izina ryawe, kuko wakoze ibitangaza bikomeye kandi bidahinduka, wagambiriye kuva kera na kare.

² Umugi wawugize igishyinga cy’amabuye, umurwa ukikijwe inkike uwuhindura amatongo. Ikigo gikomeye cy’abanyamahanga ntikitwa umugi, nta n’ubwo kizongera kubakwa ukundi.

³ Ni cyo gituma umuryango ukomeye uzagukuza, umurwa w’abatware b’amahanga ukagutinya,

⁴ kuko uri umurinzi w’abanyantegenke, umukene uri mu byago ukamubera ikiramiro. Uri ubuhungiro igihe cy’imvura y’impangukano, n’agacucu igihe cy’icyokere. Koko uburakari bw’ababisha ni nk’inkubi y’umuyaga,

⁵ cyangwa nk’icyokere ku butaka bwumiranye. Ucubya ubukana bw’abanyamahanga, boshye igicucu cy’igihu kizimya icyokere, ugacogoza n’imihigo y’ababisha.

Umunsi mukuru w’amahanga yose

⁶ Uhoraho azakorera amahanga yose umunsi mukuru kuri uyu musozi, abazimanire inyama z’ibinure, banywe divayi iryohereye, abahe inyama zoroshye na divayi imininnye neza.

⁷ Azatanyagurira kuri uyu musozi, umwenda wari ubambitse hejuru y’imiryango yose, n’igishura cyari cyoroshe amahanga yose.

⁸ Azatsemba burundu icyitwa urupfu, Uhoraho Imana, ahanagure amarira ku maso yose, avaneho ikimwaro cy’umuryango we, mu gihugu cyose. Ibyo ni Uhoraho ubwe wabivuze.

⁹ Uwo munsi bazavuga bati «Uhoraho ni we Mana yacu. Twaramwiringiye aratubohora, amizero yacu ari muri Uhoraho. Nitwishime, tunezerwe, kuko aducungura.»

Abamowabu bazakorwa n’isoni

¹⁰ Uhoraho agiye kuramburira ukuboko kwe kuri uyu musozi. Ariko Mowabu izaribatwa ihinduke inoge, imere nk’ibyatsi byaribatiwe mu kimpoteri cy’ifumbire.

¹¹ Aho ni ho azaramburira amaboko, nk’uko abagiye koga babigenza. Ubwibone bwabo buzacogora, kimwe n’ibikorwa by’ibiganza byabo.

¹² Inkuta zitamenwa z’inkike zawe, Uhoraho arazirimbuye, azisenye, azihirike hasi mu mukungugu.