Yesaya 23 - Kinyarwanda Bibiliya Ntagatifu

Ibyahanuwe kuri Tiri

¹ Iteka ryaciriwe kuri Tiri. Mato y’i Tarishishi nimworome, kuko i Tiri harimbutse; ntihagire inzu n’imwe isigara. Iyo nkuru bakaba bayimenye baturutse mu kirwa cya Shipure.

² Nimuceceke, mwebwe abatuye ku nkombe z’inyanja, namwe, bacuruzi b’i Sidoni, mwanyuzaga ibintu byanyu mu nyanja, mukoresheje intumwa zanyu.

³ Imyaka yabibwaga kuri Nili n’umusaruro w’aho, n’ibyanyuzwaga mu mazi magari, ni wowe byaramiraga: wari isoko ry’amahanga.

⁴ Mbega ngo urakorwa n’ikimwaro, Sidoni, umugi ukomeye wo ku nyanja! Nuko Inyanja ifata ijambo, iravuga iti “Sinigeze ndamukwa kandi sinabyaye, nta bahungu nareze, nta n’abakobwa nabyiruye.”

⁵ Misiri niramuka ibimenye izababara, nk’imaze kumva inkuru y’i Tiri.

⁶ Nimwambuke inyanja mugere i Tarishishi, nimurire mwebwe, abatuye ku nkombe z’inyanja!

⁷ Mbese uyu ni wo murwa wanyu, warangwaga n’umunezero, umurwa wahozeho kera na kare, woherezaga abawo gutura mu bihugu bya kure?

⁸ Ni nde waba yarafatiye Tiri uyu mugambi, yo yahoze yambika abami amakamba? Abacuruzi bayo bari ibikomangoma, abahashyi bayo bakaba ibikomerezwa byo ku isi!

⁹ Ni uhoraho, Umugaba w’ingabo, wabigambiriye, kugira ngo asuzugure ubwibone bw’abubahwaga, ahinyuze ibikomerezwa byose by’isi.

¹⁰ Hinga ubutaka bwawe, mwari w’i Tarishishi, nk’uko abaturiye Nili babigira, kuko nta cyambu kigihari.

¹¹ Uhoraho yabanguye ukuboko kwe ku nyanja, ahindisha umushyitsi ibihugu; yategetse ab’i Kanahani gutsemba inkike zayo zikomeye.

¹² Yaravuze ati “Ntuzongere kwishima ukundi, mwari w’i Sidoni, kuko bakwigabije ku gahato kandi wari isugi. Haguruka ugende unyuze i Shipure, naho kandi ntuzahabona uburuhukiro.”

¹³ Witegereze igihugu cy’Abakarideya: uwo muryango ntukibaho. Abanyashuru bahahinduye icyanya cy’inturo; bari bahubatse iminara y’ubutasi n’amazu akomeye, ariko byose babihinduye amatongo.

¹⁴ Nimworome, mato y’i Tarishishi, kuko inkike zanyu zikomeye zaridutse.

¹⁵ Guhera uwo munsi, Tiri izibagirana igihe cy’imyaka mirongo irindwi, mbese iminsi ihwanye n’iy’ubuzima bw’umwami umwe gusa. Ariko, iyo myaka mirongo irindwi nishira, i Tiri hazaboneke ibivugwa muri iyi ndirimbo ku mugore w’indaya:

¹⁶ “Fata inanga, uzenguruke umugi, wa ndaya we yibagiranye! Ucurange uko ubishoboye, usubire mu ndirimbo yawe, kugira ngo babone ubukwibuka.”

¹⁷ Imyaka mirongo irindwi nishira, Uhoraho azagenderera ab’i Tiri, bongere babe indaya z’ibihugu byose biri ku isi, bisubirane inyungu zabo.

¹⁸ Ariko noneho ibicuruzwa n’urwunguko rwabo, bizegurirwe Uhoraho. Ntibizarundwa cyangwa ngo bizahunikwe ukundi, ahubwo bizahabwa abahora imbere y’Uhoraho, kugira ngo barye bijute kandi bambare n’imyambaro ikomeye.