Yesaya 22 - Kinyarwanda Bibiliya Ntagatifu

Ab’i Yeruzalemu bakwiriye kurira aho kunezerwa

¹ Iteka ryaciriwe ku kibaya cy’ibonekerwa. Ubaye ute se, wa mugi we? Ni iki gitumye abagutuye bose bazamuka ahitaruye hejuru y’amazu?

² Ni kuki wuzuyemo urusaku n’umuvurungano, wa murwa we warangwagamo umunezero? Abantu bawe bapfuye ntibishwe n’inkota, yewe nta n’ubwo baguye ku rugamba.

³ Abagaba b’ingabo bawe bose barahunze, bagizwe imfungwa batarasanye. Abatahuwe bose bagizwe imbohe, ndetse n’abari barahungiye kure.

⁴ Ni cyo gitumye ngira nti «Nimuhindukire, mwindeba, mundeke niririre ayo kwarika, ntimwirushye mumpoza, kubera umubabaro ntewe n’ukurimburwa k’umuryango wanjye !»

⁵ Koko uwo munsi uteye ubwoba, ni umunsi w’uburimbuke n’ubuhahamuke, watejwe na Nyagasani Uhoraho, Umugaba w’ingabo. Inkike iratembye mu kibaya cy’ibonekerwa, n’induru zirarengera mu misozi.

⁶ Abo muri Elamu bitwaje imitana, bazamutse ku magare akururwa y’intambara, naho ab’i Kiri bitwaje ingabo zabo z’imitamenwa.

⁷ Ibibaya byawe byiza cyane, byuzuyemo amagare y’intambara, abanyamafarasi bashinze ibirindiro ku marembo yawe,

⁸ Yuda yabuze kirengera. Uwo munsi mwibutse gusuzuma intwaro zanyu, zibitswe mu nzu yitwa iy’Ishyamba,

⁹ mwibonera ukuntu ibyuho ari byinshi mu murwa wa Dawudi. Amazi muyakoranyiriza mu kigega cyo mu majyepfo,

¹⁰ mubarura amazu y’i Yeruzalemu, amwe murayasenya, ngo mubone ubukomeza inkike.

¹¹ Mufukura ikibumbiro hagati y’inkike zombi, kugira ngo muyoboremo amazi yo mu kigega cyari gisanzwe. Ariko ntimwazirikanye uwatumye ibyo byose bikorwa, ntimwita ku Uwabihanze, kuva kera na kare.

¹² Uwo munsi, Nyagasani Uhoraho, Umugaba w’ingabo, yabahamagariye kurira no kuganya, kwiyogoshesha no kwambara ibigunira,

¹³ none bo bibereye mu byishimo n’umunezero, barakinja ibimasa, bagasogota intama, bararya inyama, bakanywa na divayi, bavuga bati «Turye, tunywe, ejo tuzipfire!»

¹⁴ Nyamara, dore ibyo namenyeshejwe n’Uhoraho, Umugaba w’ingabo: «Noneho ubwo mutapfuye, icyo cyaha ntimuzakibabarirwa.» Nyagasani Uhoraho, Umugaba w’ingabo arabirahiriye.

Ibyaburiwe Shebuna, umutware w’ingoro y’umwami

¹⁵ Nyagasani Uhoraho, Umugaba w’ingabo avuze atya: Jya kureba uwo munyabintu Shebuna, umutware w’ingoro y’umwami, umubwire uti

¹⁶ «Ufite munani ki hano, cyangwa se ababyeyi uhafite ni abahe, kugira ngo wicukurire imva ndende imeze nk’inzu, witeganyirize ubushyinguro bwawe mu rutare?

¹⁷ Ni cyo gitumye Uhoraho agiye kukugaragura, wa gihangange we ! Agiye kugupfunyika,

¹⁸ akujugunye wizingazinze nk’umupira mu gihugu kigari. Aho ni ho uzapfira, wowe n’amagare yawe wiratana, kubera isoni wakojeje inzu ya shobuja !

¹⁹ Ngiye kukwirukana ku murimo wawe, nkunyage umwanya wawe.

²⁰ Uwo munsi kandi, nzahamagara Eliyakimu, mwene Hilikiyahu, umugaragu wanjye,

²¹ nzamwambike ikanzu yawe, mukenyeze umukandara wawe, mugabire ubutware bwawe, azabere umubyeyi abatuye Yeruzalemu n’abo mu nzu ya Yuda.

²² Nzashyira ku ntugu ze urufunguzo rw’inzu ya Dawudi, nakingura, he kugira ushobora gukinga, nakinga, he kugira ukingura.

²³ Nzamushyigikira akomere nk’inkingi ishinze ahantu hakomeye, azabe intebe y’ikuzo ry’inzu ya se.

²⁴ Amashami yose y’umuryango we, ayoroshye n’akomeye, azamujishweho, nk’uko bajisha ibikoresho byose byo mu gikoni : ibibindi, ibicuma, inzuho n’ibindi, ku giti kimwe.

²⁵ Uwo munsi, uwo ni Uhoraho, Umugaba w’ingabo ubivuga : icyo giti gishimangiye ahantu hakomeye kizashinguka, cyiture hasi, nuko ibizaba bikijisheho byose bimenagurike; kuko Uhoraho yabivuze.