Yesaya 2 - Kinyarwanda Bibiliya Ntagatifu

Amahanga yose azagana Yeruzalemu

¹ Ibyo Izayi mwene Amosi yabonye, byerekeye Yuda na Yeruzalemu.

² Mu bihe bizaza, hari ubwo umusozi w’Ingoro uzashyirwa ku kanunga usumbe imisozi yose. Nuko amahanga yose agende awugana.

³ Abantu b’ibihugu byinshi bahaguruke, bavuga bati «Nimuze tuzamuke, tujye ku musozi w’Uhoraho, ku Ngoro y’Imana ya Yakobo. Azatwereka inzira ze, tuzikurikire.» Ni byo koko, amategeko ava i Siyoni, i Yeruzalemu hagaturuka ijambo ry’Uhoraho.

⁴ Azacira amahanga imanza, akiranure abantu b’ibihugu byinshi. Inkota zabo bazazicuramo amasuka, amacumu yabo bayacuremo ibihabuzo. Ihanga ntirizongera gutera irindi inkota, ntibazongera ukundi kwiga kurwana.

⁵ Nzu ya Yakobo, nimuze, tugendere mu rumuri rw’Uhoraho.

Umunsi w’Uhoraho, umunsi w’imanza

⁶ Watereranye inzu ya Yakobo, umuryango wawe: abapfumu babo bariyongereye, bangana n’ab’Abafilisiti, n’abanyamahanga benshi babivanzemo.

⁷ Igihugu cyabo cyuzuye feza na zahabu, ubukungu bwabo ntibugereranywa, cyuzuye kandi n’amafarasi, amagare y’intambara ntagira umubare.

⁸ Igihugu cyabo cyuzuyemo ibigirwamana, bagapfukama imbere y’icyavuye mu biganza byabo, imbere y’icyakozwe n’intoki zabo.

⁹ Bazagomba kwiyoroshya, muntu acishwe bugufi, naho ubundi ntuzabababarira.

¹⁰ Jya mu masenga, wihishe mu mukungugu, utinye Uhoraho n’ububengerane bw’ikuzo rye.

¹¹ Ubwibone bw’abantu buzacogozwa, abikuza biyoroshye: uwo munsi hakuzwe Uhoraho wenyine.

¹² Kuko hazabaho umunsi, Uhoraho, Umugaba w’ingabo, yigeneye, wo gucira imanza umuntu wese w’umwirasi, umwibone n’uwikuza, maze bagacishwa bugufi.

¹³ Uwo munsi ukazaba no ku masederi yo muri Libani, yiboneje kandi akishyira ejuru, no ku mishishi y’i Bashani yose,

¹⁴ ku misozi yose miremire no ku tununga twose twishyize ejuru,

¹⁵ ku minara miremire yose no ku nkike yose icinyiye,

¹⁶ ku mato yose y’i Tarishishi no ku bwato bwose bw’agaciro gakomeye.

¹⁷ Ubwibone bw’abantu buzacogozwa, abikuza bacishwe bugufi: uwo munsi hakuzwe Uhoraho wenyine,

¹⁸ maze ibigirwamana byose bishirire icyarimwe.

¹⁹ Bazinjira mu masenga yo mu bitare no mu myobo y’ikuzimu, batinya Uhoraho, n’ububengerane bw’ikuzo rye, ubwo azaba aje gukangaranya isi.

²⁰ (Uwo munsi ibigirwamana byabo bya feza n’ibya zahabu, byari byarakorewe gusengwa, bazabijugunyira amafuku n’ubucurama.)

²¹ Bazajya kwihisha mu masenga no mu myobo yo mu bitare, batinya Uhoraho, n’ububengerane bw’ikuzo rye, ubwo azaba aje gukangaranya isi.

²² Nimureke rero kwishingikiriza muntu, ugizwe gusa n’akuka ko mu zuru! Hari akandi gaciro agira?