Yesaya 14 - Kinyarwanda Bibiliya Ntagatifu

Uhoraho azagirira impuhwe umuryango we

¹ Uhoraho azagirira impuhwe bene Yakobo, azatoranya bundi bushya umuryango wa Israheli, azabatuze mu gihugu cyabo. Abanyamahanga bazaza babagana, bifatanye n’inzu ya Yakobo.

² Abo mu bihugu bya kure bazajyana n’Abayisraheli, babasubize mu gihugu cyabo; nuko nibamara kugera ku butaka bw’Uhoraho, Israheli ibagire abacakara n’abaja bayo, itegeke abayishikamiraga, inabashyire ku ngoyi bari barashyizweho.

Amaherezo y’umwami w’i Babiloni

³ Umunsi Uhoraho azaba amaze kukugarura mu gihugu cyawe, nyuma y’imiruho, imibabaro n’ubucakara wari urimo,

⁴ uzabyinira hejuru y’umwami w’i Babiloni uti: Mbese wa munyagitugu, yaherera he? Ubwibone bwe se bwo bwazimiriye he?

⁵ Uhoraho yavunaguye inkoni z’abagome, kimwe n’ibiboko by’abanyagitugu,

⁶ bakubitanaga umujinya ibihugu badahwema, bakigarurira amahanga n’uburakari, bakayaburagiza batayasonera, bakigarurira amahanga n’uburakari.

⁷ None isi yose iratuje, abantu basabwe n’ibyishimo.

⁸ Ndetse n’imizonobari irakwishimaho, kandi kuva wagwa, amasederi yose ya Libani aravuga ati «Ntakizanzamutse ukundi, uwazanwaga no kudutsemba.»

⁹ Ab’ikuzimu bakimenya ko uje, biteguye kukwakira. Bakanguye abapfuye bose ku mpamvu yawe, abigeze kuba ibikomerezwa ku isi, abari abami b’amahanga bahagurutswa ku ntebe zabo.

¹⁰ Abo bose bafashe ijambo barakubwira bati «Nawe dore ubaye umunyantege nke nkatwe, usigaye warahindutse nkatwe!

¹¹ Ubukire bwawe bwamanukanye n’amajwi y’inanga ikuzimu, uzisasira umujagato w’inyo, uwiyorose.

¹² Mbese waba waramanutse ute mu ijuru, Nyenyeri yakirana, Mwana w’umuseke weya ? Waba se warahanutse ute ukagwa ku isi, wowe wayogozaga amahanga, uvuga uti

¹³ ’Nzazamuka mu ijuru, nshyire intebe yanjye hejuru y’inyenyeri z’Imana, nzature ku musozi imana zikoraniraho, aherekera mu majyaruguru.

¹⁴ Nzazamuka njye ku mpera z’ibicu, maze nzareshye n’Umusumbabyose.’

¹⁵ Ariko dore wamanutse kwa Nyirarupfu, mu muhenengero w’ikuzimu!»

¹⁶ Abakubona barakwitegereza ubudahwema, bakitonda bakakureba, bibaza bati «Mbese uyu yaba wa mugabo wahindishaga isi umushyitsi, agahungabanya abami n’ingoma zabo,

¹⁷ uwahinduraga isi ubutayu, agasenya imigi, ntarekure imbohe ngo zigaruke iwabo?»

¹⁸ Abami bose b’amahanga, udakuyemo n’umwe, buri wese mu mva ye baruhukiye mu mahoro.

¹⁹ Ariko wowe wajugunywe kure y’imva yawe, uteye ubwoba boshye uruhinja rwavutse rupfuye. Umeze nk’intumbi banyukanyutse; ukikijwe n’imirambo y’abahinguranyijwe n’inkota, ikaba igaramye ku mabuye ashashe mu rwobo.

²⁰ Ntuzabangikana na bo mu mva, kuko wayogoje igihugu cyawe, ukica umuryango wawe: inyoko y’abagome ntizongera kuvugwa ukundi.

²¹ Nimwitegure kwica abana, kubera icyaha cy’ababyeyi babo, hato batava aho baduhagurukana, bakigarurira isi, maze bakayubakaho imigi.

²² Uhoraho, Umugaba w’ingabo, avuze atya: Ngiye ubwanjye kubahagurukira. Nzatsembaho izina Babiloni n’ibiyiranga byose, abayikomokaho bose n’urubyaro rwabo. Uwo ni Uhoraho ubivuze.

²³ Nzahahindura ibidendezi by’amazi, n’intaho ya za nyirabarazana, mpakubuze umweyo ukumunzura byose. Uwo ni Uhoraho, Umugaba w’ingabo, ubivuze.

Uhoraho azavunagura Abanyashuru

²⁴ Uhoraho, Umugaba w’ingabo, ararahiye ati «Icyo natekereje kizaba, n’icyo nagambiriye kizarangira.

²⁵ Nzavunagurira Abanyashuru mu gihugu cyanjye, mbarimbure ku misozi yanjye. Abo bicishaga uburetwa nzabubakiza, n’umutwaro babakoreraga nywubature.»

²⁶ Uwo ni umugambi Uhoraho yafatiye isi yose, ni igihano yageneye amahanga yose.

²⁷ Niba se Uhoraho, Umugaba w’ingabo, yafashe umugambi, ni nde uzamugamburuza ? Niba se yamaze kubangura ukuboko kwe ngo ahane, ni nde uzamugeruza ?

Igihano cy’Abafilisiti

²⁸ Umwaka umwami Akhazi yatanzemo, hatangazwa aya magambo :

²⁹ Mwebwe mwese, Abafilisiti, ntimwishimire ko ikiboko mwakubitwaga cyacitsemo kabiri, kuko mu mwiyuburure w’inzoka hazasohokamo impiri, naho mu mpiri hakazasohokamo ikiyoka kiguruka.

³⁰ Imbabare zizagaburirwa, abakene babeho mu ituze; ariko abagukomokaho nzabisha inzara, abayirokotse mbasonge.

³¹ Mwe migi izitiwe, nimurire kandi muboroge ! Abafilisiti bose uko bangana bahwereye : kuko mu majyaruguru haturutse umwotsi, hakaba ari nta n’umwe ubuze muri icyo gitero.

³² Bazasubiza iki intumwa batumweho n’Abafilisiti ? Dore uko bazazisubiza: Ni Uhoraho ubwe washinze Siyoni, ni ho abakene b’umuryango we bafite ubuhungiro nyabwo.