Yesaya 12 - Kinyarwanda Bibiliya Ntagatifu

Indirimbo ishimira Imana, Umukiza

¹ Uwo munsi uzavuga uti «Ndagushimira Uhoraho, kuko wandakariye, ariko uburakari bwawe bwacogora, ukampoza.

² Dore Imana, Umukiza wanjye, ndamwiringira kandi sinkigira ubwoba, kuko imbaraga zanjye n’indirimbo yanjye ari Uhoraho, wambereye agakiza.»

³ Muzavoma amazi ku masoko y’agakiza, mwishimye,

⁴ maze uwo munsi muvuge muti «Nimushimire Uhoraho, murate izina rye, nimwamamaze ibikorwa bye mu mahanga.

⁵ Nimuririmbe Uhoraho, kuko yakoze ibintu by’agatangaza, kandi mubyamamaze mu nsi hose.

⁶ Rangurura ijwi uvuze impundu, wowe utuye i Siyoni, kuko Nyirubutagatifu wa Israheli, utuye iwawe rwagati, ari Igihangange.»