Yesaya 10 - Kinyarwanda Bibiliya Ntagatifu

¹ Baragowe! Abo bantu bashyiraho amategeko arenganya, bakandika amabwiriza akandamiza,

² birengagiza imanza za rubanda rugufi, barenganya abakene bo mu muryango wanjye, bagira abapfakazi iminyago yabo, kandi bagacuza imfubyi.

³ Muzamera mute ku munsi w’irimburwa, ubwo umuhengeri uzaba uturutse iyo bigwa? Ni nde muzahungiraho kugira ngo abatabare, muzahisha hehe ubwo bukungu bwanyu?

⁴ Ubwo muzagenza amavi rwagati mu mbohe, cyangwa se murambarare hagati mu ntumbi. Nyamara n’ubwo bimeze bityo bwose, uburakari bw’Uhoraho ntiburacogora, ukuboko kwe kuracyabanguye.

Iragowe Ashuru, kimwe n’umwami wayo

⁵ Uragowe, Ashuru! Wowe kiboko cy’ubukana bwanjye; n’inkoni witwaje ikaba iy’uburakari bwanjye.

⁶ Nyohereje kurwanya ihanga ry’abahemu, nyihutishirije gutera igihugu cyandakaje, bagisahure kandi bakinyage, bakiribate nk’icyondo cyo mu nzira.

⁷ Nyamara (umwami wa Ashuru) we si ko abyumva, aratekereza ukundi, kuko agamije gusa gusenya no kurimbura amahanga menshi.

⁸ Aravuga ati «Mbese, abagaba b’ingabo banjye bo si abami?

⁹ Mbese ye, umugi wa Kaluno ntiwahindutse nk’umugi wa Karikemishi, uwa Hamati ukaba nk’uwa Arupadi, cyangwa uwa Samariya ukamera nk’uwa Damasi ?

¹⁰ Niba se narashoboye ingoma z’ibigirwamana, kandi ibigirwamana byabo bikaba byararutaga ubwinshi iby’i Yeruzalemu n’i Samariya,

¹¹ ni iki cyambuza kugenzereza Yeruzalemu n’amashusho yayo, nk’uko nagenjeje Samariya n’ibigirwamana byayo ?»

¹² Ariko rero, igihe Uhoraho azaba arangije gukora icyo yagambiriye cyose ku musozi wa Siyoni no kuri Yeruzalemu, azahindukirira guhana umwami wa Ashuru kubera ubwirasi n’ubwibone bwe,

¹³ kuko yibwiye ati «Ibyo nakoze byose mbikesha imbaraga zanjye, n’ubuhanga bwanjye kuko ndi umunyabwenge. Navanyeho imipaka y’ibihugu mbasahura ibyabo, nabaye intwari, nkura abami ku ntebe zabo.

¹⁴ Nanyaze ubukungu bw’amahanga, nk’uko batwara amagi mu cyari, ntagire kirengera; nanjye ni ko nafashe isi yose, ntihagira n’umwe ukoma, wabumbura umunwa cyangwa se ngo atabaze.»

¹⁵ Mbese ye, intorezo yakwirata ku uyitemesha ? Urukero se rwo, rwakwibonekeza ku urukeresha ? Ibyo byaba nk’aho ikiboko cyagarukana ukibanguye, inkoni ikazungaguza uyitwaje!

¹⁶ Ni cyo gitumye Uhoraho, Imana Umugaba w’ingabo, azateza ab’imishishe kuzongwa, maze mu nsi y’ubwamamare, hagurumane nk’inkongi y’umuriro.

¹⁷ Urumuri rwa Israheli ruzahinduka umuriro, Nyirubutagatifu wayo ahinduke ikirimi cy’umuriro, kizatwike kandi kirimbure umunsi umwe, amahwa n’imifatangwe byayo.

¹⁸ Azatsembaho ubwiza bw’ishyamba rye n’ubw’umurima we, umuntu azamere nk’uwashegeshwe n’indwara izahaza.

¹⁹ Ibisigisigi by’ishyamba rye bizaba bike, mbese nk’ibyo umwana muto yashobora kubara.

Udusigisigi twa Israheli

²⁰ Uwo munsi, udusigisigi twa Israheli, n’abazaba barokotse bo mu nzu ya Yakobo, bazaherukire aho kwisunga uwabakandamizaga, ahubwo bisunge by’ukuri Uhoraho, Nyirubutagatifu wa Israheli.

²¹ Kandi ni koko, udusigisigi tuzagaruka, abacitse ku icumu bo mu nzu ya Yakobo, bazagarukira Imana Idahangarwa.

²² Israheli we! N’ubwo umuryango wawe wangana n’umusenyi wo ku nyanja, hazagaruka bake mu bacitse ku icumu, kuko ukurimburwa kwanyu kutagisibye, urubanza rukarangirira aho;

²³ maze Uhoraho, Imana Umugaba w’ingabo, akazasohoza atyo uwo mugambi we, mu gihugu cyose.

Uhoraho azahana Ashuru

²⁴ Ni cyo gitumye Uhoraho, Imana Umugaba w’ingabo avuze atya: Muryango wanjye, mwebwe abatuye Siyoni, ntimutinye Abanyashuru babakubita ibiboko, bakababangurira inkoni, nk’Abanyamisiri,

²⁵ kuko hasigaye igihe gito cyane, uburakari mbafitiye bugacogora, ahubwo bugahindukirira Abanyashuru.

²⁶ Nuko Uhoraho Umugaba w’ingabo akazabangura ikiboko, nk’uko yagenjereje Madiyani ku rutare rwa Orebu, kandi abangure inkoni ye ku nyanja, nk’uko yabigize mu Misiri.

²⁷ Uwo munsi, umutwaro wanyu uzururutswa ku ntugu zanyu, ubushikamirwe buvanwe ku ijosi ryanyu, bwimukire umudendezo.

Intambara yabereye hafi ya Yeruzalemu

²⁸ Umwanzi ageze i Ayati, yambukiranya Migoroni; i Mikimasi ahasiga ibintu bye.

²⁹ Anyura mu nzira y’impatanwa, aca ingando i Geba. Ubwo ab’i Rama bahinda umushyitsi, i Geba ya Sawuli barahunga.

³⁰ Bantu b’i Bati‐Galimu, nimutere hejuru! Mutege amatwi namwe, bantu b’i Layishi!

³¹ Anatoti ibonye ishyano, i Madimena barahunga, ab’i Gebimu bakijije amagara yabo!

³² Uwo munsi nyine ahagarara i Nobu, abangura ukuboko kwe, akangaranya umusozi w’umwari w’i Siyoni, n’umurenge wa Yeruzalemu.

Uhoraho atema ishyamba ry’inzitane

³³ Dore Uhoraho, Umugaba w’ingabo, amashami ayamariye hasi n’ingufu ze ziteye ubwoba, amaremare yayatemye, n’asumba ayandi yayakonkoboye.

³⁴ Ibiti byose by’ishyamba yabitsembesheje intorezo, n’amasederi atagira uko asa ya Libani yararitswe.