Yeremiya 8 - Kinyarwanda Bibiliya Ntagatifu

¹ Icyo gihe — Uwo ni Uhoraho ubivuze — bazataburura mu mva amagufa y’abami n’abatware ba Yuda, ay’abaherezabitambo n’abahanuzi, hamwe n’ay’abaturage ba Yeruzalemu.

² Bazayadendeza imbere y’izuba, y’ukwezi n’imbere y’ibindi binyarumuri byo mu kirere, byo bacuditse na byo, bakabigaragira, bakabikurikira, bakabigisha inama ndetse bakanabipfukama imbere. Ayo magufa, ntazarundarundwa ngo ahambwe; azahama aho afumbire ubutaka.

³ Naho abazasigara, abazarokoka muri iyo nyoko mbi n’abazacika ku icumu mu duce twose nzaba nabatatanyirijemo, bazifuza gupfa aho kubaho — uwo ni Uhoraho Umugaba w’ingabo ubivuze.

Umuryango wanangiye umutima

⁴ Uzababwire uti «Uhoraho avuze atya: Ese iyo umuntu aguye ntabyuka? Ese umuntu arayoba ntahindukire?

⁵ Ni iki gituma uyu muryango wa Yeruzalemu uyoba, ugakomeza kuzikama mu buhakanyi bwawo? Batsimbaraye ku binyoma byabo bibeshyeshya, bakanga kugaruka.

⁶ Naritonze ntega amatwi, nsanga amagambo yabo adafashije. Nta n’umwe ubabajwe n’ubugome bwe ngo agire ati «Ese ubu nakoze ibiki?» Buri wese ariruka akurikiye ubwomanzi bwe, mbese nk’ifarasi igiye ku rugamba.

⁷ N’ikiyongoyongo cyo mu kirere kimenya ubwacyo igihe kizasuhukira; inuma, intashya n’umusambi bikamenya igihe bizahindukirira. Ariko umuryango wanjye ntiwita ku mategeko y’Uhoraho!

Abigishamategeko bahindanya itegeko ry’Uhoraho

⁸ Mwashobora mute kuvuga ngo «Turi abahanga, kuko dutunze itegeko ry’Uhoraho?» Ni byo, ariko ryahindutse ibinyoma, kubera inyandiko y’abigishamategeko yuzuye ububeshyi.

⁹ Abahanga bazakorwa n’ikimwaro, bumirwe, kandi bafatirwe mu mutego; basuzugura ijambo ry’Uhoraho: ubwo se bavuga bate ko ari abahanga?

Abibwira ko byose bimeze neza (reba 6,12–15)

¹⁰ Nuko rero abagore babo ndabaha abandi, imirima yabo nyiteze abayigabiza; kuko bose, ari umuto n’umukuru, bararuwe n’inyungu zabo; abahanuzi n’abaherezabitambo bose, bakifata nabi.

¹¹ Bazinzika ishyano ry’umuryango wanjye, bavuga ngo «Ni amahoro, byose bimeze neza!» Nyamara ariko nta mahoro ariho.

¹² Mbese hari ikimwaro bagize kubera amarorerwa bakora? Oya, nta mpungenge bibatera, ngo bazirikane ko bitesheje agaciro! Kubera iyo mpamvu, bazarimbuka nk’abandi bose; bakazatemba, igihe nzaba mbibaryoza. Uwo ni Uhoraho ubivuze. (Uhoraho:)

Uhoraho azatsemba umuzabibu muri Yuda

¹³ Niyemeje kubatsemba — uwo ni Uhoraho ubivuze — nta mbuto zizarangwa ku muzabibu, kimwe no ku mutini, amababi na yo yarabiranye: nyateje abayanyukanyuka. (Rubanda:)

¹⁴ Ni kuki duhagaze nta cyo dukora? Nidukoranire hamwe, twinjire mu migi yacu ikomeye, twigumireyo, kuko Uhoraho Imana yacu atubuza kuhatirimuka, akatwuhira amazi mabi, kuko twamucumuyeho.

¹⁵ Twizeraga amahoro, none nta n’agahenge; twari dutegereje kuzanzamuka, none ahubwo dore igikuba kiracitse.

¹⁶ Kuva i Dani harumvikana induru y’amafarasi; isi yose irahinda umushyitsi kubera urusaku n’inkubiri byayo. Umwanzi aje kuyogoza isi n’ibiyiriho byose, ari umugi, ari n’abawutuye. (Uhoraho:)

¹⁷ Dore mbashumurije inzoka n’impiri zidashobora kugomborwa, maze zizabarume! Uwo ni Uhoraho ubivuze. (Yeremiya:)

Agahinda ka Yeremiya

¹⁸ Agahinda kanjye ntikagira umuti, amagara yanjye yose arakendera.

¹⁹ Induru ibabaje y’umuryango wanjye irumvikana iturutse mu gihugu cya kure: «Muri Siyoni se Uhoraho ntakibaho? Umwami wayo se ntakiyibamo?» (Uhoraho:) Ni kuki banshavuza n’ibigirwamana byabo, n’ariya manjwe yavuye ahandi? (Yeremiya:)

²⁰ Isarura ryararangiye, icyi cyarashize, ariko twebwe nta mukiro turabona!

²¹ Narashengutse kubera amahano y’umuryango wanjye! Ndi mu cyunamo, amakuba yancigatiye!

²² Ese nta muti ukirangwa muri Gilihadi? Nta muvuzi se uhaba? Ni kuki ibikomere by’umuryango wanjye bidakira?

²³ Ni nde uzahindura umutwe wanjye mo umugezi, amaso yanjye akayagira isoko y’amarira, kugira ngo ndirire umunsi n’ijoro, abapfuye bo mu muryango wanjye?