Yeremiya 48 - Kinyarwanda Bibiliya Ntagatifu

Ibyo Uhoraho avuze kuri Mowabu

¹ Dore ibyo Uhoraho Umugaba w’ingabo, Imana ya Israheli, avuze kuri Mowabu: Nebo ibonye ishyano, irasenyutse! Kiriyatayimu yakozwe n’ikimwaro, irafashwe. Umurwa wakojejwe isoni, wasenyutse;

² ubwamamare bwa Mowabu burarangiye! Heshiboni barayigambanira, bagira bati «Tugende dutsembe kiriya gihugu!» Nawe Madimeni, wacecekeshejwe, inkota iragukurikiranye.

³ Induru z’impuruza ziturutse i Horonayimu, harimbutse kandi amakuba akomeye yahatashye!

⁴ Mowabu yasenyutse, abana bayo baraboroga.

⁵ Abazamuka i Luhiti baragenda barira, abamanuka i Horonayimu barataka ko bari mu kaga.

⁶ Nimuhunge biracitse! Mubaye aka Aroweri mu butayu!

⁷ Barakwigabije kuko wiringiye imbaraga zawe n’ubukungu bwawe. Kemoshi ajyanywe bunyago, n’abaherezabitambo be n’abatware be bose.

⁸ Umurimbuzi yinjiye mu migi yose, nta n’umwe muri yo uzarokoka. Ibibaya birayogozwa naho ibisiza babitsembe. Noneho rero Uhoraho avuze atya:

⁹ Nimwubake irimbi muri Mowabu kuko yabaye amatongo, imigi yayo igahinduka imbuga, abaturage bayo bakayicikamo.

¹⁰ Arakaba ikivume, umuntu ukorana ingononwa umurimo w’Uhoraho, arakavumwa umuntu urinda inkota ye amaraso.

¹¹ Mowabu kuva mu buto bwayo yari ituje, imeze nka divayi nziza itigeze icuranurwa, mbese ntiyigeze ijyanwa bunyago. Ni yo mpamvu itigeze ita uburyohe bwayo, n’impumuro yayo ntiyagabanuka.

¹² None rero, igihe kiregereje — uwo ni Uhoraho ubivuze — maze nzohereze abantu bayicuranure, bayivane mu bibindi byayo, maze babijanjagure.

¹³ Mowabu izarakarira Kemoshi, nk’uko abantu ba Israheli barakariye Beteli bizeraga.

¹⁴ Mutinyuka mute kuvuga ngo «Turi intwari, turi ingabo zavukiye urugamba»?

¹⁵ Umurimbuzi wa Mowabu arazamutse ateye imigi yayo; ab’intwari mu basore bayo ngabo baramanuka bajya mu ibagiro — uwo ni Umwami ubivuze, ari we Uhoraho Umugaba w’ingabo!

¹⁶ Mowabu iri hafi gutsiratsizwa, amakuba aje yihuta.

¹⁷ Abaturanyi bayo, namwe mwese abayikunda, nimuyiririre, mugira muti «Bishoboka bite ko igihugu gikomeye kandi kitagira uko gisa cyaganzwa!»

¹⁸ Bantu b’i Diboni, nimuve ku ikuzo ryanyu, mwicare mu mukungugu, umurimbuzi wa Mowabu arabateye, azasenya ibigo bikomeye byanyu.

¹⁹ Bantu b’i Aroweri, nimuhaguruke mube maso. Nimubaze abahunga n’abacitse ku icumu, muti «Habaye iki?»

²⁰ Mowabu yasenyutse none yakozwe n’ikimwaro. Nimutere hejuru, mutabaze! Mubitangaze muri Arunoni muti «Mowabu yarimbutse!»

²¹ Ibihugu byo mu bisiza byaciriwe urubanza, rucirwa kandi na Holoni, Yahasi, Mefati,

²² Diboni, Nebo, BetiDibilatayimu,

²³ Kiriyatayimu, Betigamuli, Betimewoni,

²⁴ Keriyoti na Bosora, mbese ni imigi yose y’igihugu cya Mowabu, ari iya kure ari n’iya hafi.

²⁵ Mowabu yacitse intege, nta maboko igifite — uwo ni Uhoraho ubivuze.

²⁶ Nimumusindishe kuko yihaye gusumba Uhoraho. Nguwo arigaragura mu birutsi bye, igihe cye cyo gusekwa cyageze!

²⁷ Israheli se yo ntiwayihinduye urw’amenyo? Hari ubwo se wasanze ibarirwa mu bisambo ku buryo buri gihe uyivuga uzunguza umutwe?

²⁸ Baturage ba Mowabu, nimuhunge imigi, mwihishe mu masenga! Nimugenze nk’inuma zubaka ibyari byazo ahantu hatagerwa, mu mwinjiro w’ubuvumo!

²⁹ Twumvise ubwirasi bwa Mowabu! Mbega ukuntu yikuzaga, mbega agasuzuguro n’umwirato! Mbega ubwibone n’ukwiyemera kudafashe!

³⁰ Nzi neza ko yibeshya — uwo ni Uhoraho ubivuze‐namenye amagambo yayo adafashe, n’ibikorwa byayo bidafite ishingiro.

³¹ Ni yo mpamvu ndirira Mowabu, ngatabariza Mowabu yose uko yakabaye, nkaririra abantu b’i Kiri‐Heresi.

³² Wowe, muzabibu w’i Sibima, unteye agahinda kurusha Yazeri. Amashami yawe yageraga hakurya y’inyanja, agafata kuri Yazeri. None umurimbuzi yageze ku mbuto zawe, no ku musaruro wawe.

³³ Hehe n’ibyishimo bisesuye mu mizabibu yo mu misozi ya Mowabu! Nzakamya divayi mu mivure; hehe n’ibyishimo byarangaga urwengero.

³⁴ Induru z’impuruza zivuye i Heshiboni zageze n’i Eleyale; urusaku rwazo rurumvikanira i Yahasi h’i Sowari, i Horonayimu, i Egalati‐Shelishiya, kuko n’amazi y’i Nimurimu yakamye.

³⁵ Muri Mowabu — uwo ni Uhoraho ubivuze— nzatsemba abajya ahantu hirengeye, gutura ibitambo bitwikwa, bagatwikira n’andi maturo ibigirwamana byabo.

³⁶ Ni yo mpamvu umutima wanjye uririra Mowabu, ukaririra n’abantu b’i Kiri‐Heresi, uboroga nk’imyirongi, kubera ko ubukungu bwabo bwabashizeho.

³⁷ Imitwe yose iramyoye, ubwanwa bwose burogoshe; ibiganza byose birarasaze, n’abantu bose bakenyeye ibigunira.

³⁸ Hejuru y’amazu y’i Mowabu no ku bibuga baraboroga. Mowabu ndayivunaguye, nk’igikoresho kitanshimishije — uwo ni Uhoraho ubivuze.

³⁹ Bigenze bite! Ngiyo irarimbutse, nimuboroge! Mowabu yanteye umugongo kubera isoni! Mowabu yahindutse urw’amenyo, iba n’igiterashozi mu baturanyi bayo bose.

⁴⁰ Uhoraho avuze atya: Ni nka kagoma ije iguruka, ikaramburira amababa yayo kuri Mowabu.

⁴¹ Imigi yafashwe n’ibigo bikomeye birarimburwa. Uwo munsi, umutima w’intwari za Mowabu uzaba nk’uw’umugore uramutswe.

⁴² Mowabu yararimbutse ntikiri umuryango, kuko yashatse gusumba Uhoraho.

⁴³ Baturage ba Mowabu, muzazira iterabwoba, icyobo n’umutego — uwo ni Uhoraho ubivuze.

⁴⁴ Uzahunga iterabwoba azagwa mu rwobo, uvuye mu cyobo, agwe mu mutego. Ni koko, igihe kizaza, maze Mowabu iryozwe ibyo yakoze, — uwo ni Uhoraho ubivuze.

⁴⁵ Mu gacucu k’i Heshiboni hahagaze impunzi zananiwe, ariko umuriro uturutse mu ngoro ya Sihoni, utwitse imisaya ya Mowabu, ndetse n’agahanga k’iyo nyoko y’inyarusaku.

⁴⁶ Mowabu, mbega ngo uragira ibyago! Umuryango wa Kemoshi woretswe, abahungu bawe bajyanywe bunyago n’abakobwa bawe bajyanywe ari imbohe.

⁴⁷ Ariko mu bihe bizaza, nzasubiza Mowabu amahoro. Uwo ni Uhoraho ubivuze. Urubanza rwa Mowabu ruhagarariye aha.