Yeremiya 29 - Kinyarwanda Bibiliya Ntagatifu

Ibaruwa Yeremiya yandikiye aba mbere mu bajyanywe bunyago

¹ Dore amagambo akubiye mu ibaruwa umuhanuzi Yeremiya yanditse ari i Yeruzalemu, akayoherereza abakuru b’umuryango bose mu bajyanywe bunyago, abaherezabitambo, abahanuzi n’umuryango wose Nebukadinetsari yari yaranyaze i Yeruzalemu, akabajyana i Babiloni.

² Ibyo byabaye igihe umwami Yekoniya, umugabekazi n’ibyegera by’ibwami, abatware ba Yuda na Yeruzalemu, abacuzi n’abanyabukorikori bari bamaze kuva i Yeruzalemu.

³ Iyo baruwa yajyanywe na Eleyasa mwene Shafani na Gemariya mwene Hilikiya, ari bo Sedekiya, umwami wa Yuda yari yohereje i Babiloni, abatumye kuri Nebukadinetsari, umwami w’i Babiloni.

⁴ Yari iteye itya : «Dore ibyo Uhoraho, Umugaba w’ingabo, Imana ya Israheli abwiye abajyanye bunyago i Babiloni bose, bavuye i Yeruzalemu:

⁵ Nimwubake amazu muyaturemo, muhinge ubusitani murye imbuto zabwo,

⁶ nimushake abagore mubyare abahungu n’abakobwa, mushyingire abasore n’inkumi zanyu na bo bunguke abahungu n’abakobwa. Aho muri mwororoke, ntimukagabanuke bibaho!

⁷ Nimuharanire amahoro y’umugi mwajyanywemo bunyago, kandi muwusabire kuri Uhoraho kuko amahoro yawo ari ayanyu. (8–9)

¹⁰ Kuko Uhoraho avuze atya: Imyaka mirongo irindwi nishira muri i Babiloni, nzabitaho maze nuzuze amasezerano yanjye yo kubagarura aha hantu.

¹¹ Jyewe nzi imigambi nabagiriye — uwo ni Uhoraho ubivuze — ni imigambi y’amahoro itari iy’amakuba: nzabaha kugera ku bihe bizaza no kwizera.

¹² Nimunyiyambaza kandi mukaza kunsenga, nanjye nzabumva.

¹³ Nimunshakashaka muzambona. Nimunshakashake mubikuye ku mutima,

¹⁴ nzabareka mumbone — uwo ni Uhoraho ubivuze — nzabahumuriza, mbakoranye mbakuye mu mahanga n’ahantu hose nabatatanyirije — uwo ni Uhoraho ubivuze — mbagarure aho nabakuye nkabajyana bunyago.

¹⁵ Ni koko muravuga muti ’Uhoraho yadutumyeho abahanuzi i Babiloni.’

⁸ Nyamara Uhoraho, Umugaba w’ingabo, Imana ya Israheli, avuze atya: Ntimukemere ko abahanuzi n’abapfumu bari muri mwe bababeshya, ntimukite ku nzozi murota;

⁹ ibyo babahanurira mu izina ryanjye ni ibinyoma — uwo ni Uhoraho ubivuze — sinigeze mbatuma.

¹⁶ Ni koko, dore ibyo Uhoraho abwiye umwami wicaye ku ntebe ya Dawudi, n’abantu bose bagituye muri wa mugi, ari bo bavandimwe banyu batajyanywe bunyago hamwe namwe:

¹⁷ Uhoraho, Umugaba w’ingabo, avuze atya: Nzabahuramo inkota, inzara n’icyorezo, nzabagenzereza uko bagira imbuto z’imitini zaboze, zikaba mbi ku buryo zidashobora kuribwa.

¹⁸ Nzabakurikirana n’inkota, inzara n’icyorezo, mbagire urugero rw’abavumwe bose bo ku isi; nzabahindura itongo riteye ubwoba. Mu mahanga yose nzabatatanyirizamo bazahinduka iciro ry’imigani,

¹⁹ kuko banze kumva amagambo yanjye — uwo ni Uhoraho ubivuze — kandi ntarahwemye kubatumaho abagaragu banjye b’abahanuzi, nyamara bo, ntibanyumva — uwo ni Uhoraho ubivuze.

²⁰ Naho mwebwe, abajyanywe bunyago, nkabirukana i Yeruzalemu mukajya i Babiloni, nimwumve ijambo ry’Uhoraho!

²¹ Dore ibyo Uhoraho Umugaba w’ingabo, Imana ya Israheli, avuze kuri Akabu mwene Kolaya, no kuri Sedekiya mwene Maseya, bihaye kubahanurira ibinyoma mu izina ryanjye: Nzabagabiza Nebukadinetsari, umwami w’i Babiloni, abatsembere mu maso yanyu.

²² Abajyanywe bunyago bose bari i Babiloni bizabaviramo umuvumo, kuko bazavuga bati ’Uhoraho azakugenzereze uko yahannye Sedekiya na Akabu, batwitswe n’umwami w’i Babiloni!’

²³ Icyaha cyabo, ni uko bakoze ishyano muri Israheli: basambanije abagore ba bagenzi babo, biha guhanura ibinyoma mu izina ryanjye kandi ntarabibatumye. Jye ndabizi, mbibereye n’umuhamya. Uwo ni Uhoraho ubivuze!»

Shemayahu, umuhanuzi w’ibinyoma

²⁴ (Uhoraho abwira Yeremiya iri jambo:) Uzabwire Shemayahu w’i Nahalamu, uti

²⁵ «Uhoraho, Umugaba w’ingabo, Imana ya Israheli, avuze atya: Woherereje umuryango wose uri i Yeruzalemu, n’umuherezabitambo Sefaniya mwene Maseya, n’abaherezabitambo bose, amabaruwa wiyandikiye ubwawe uvuga ngo

²⁶ ’Uhoraho ni we wagushyize mu mwanya w’umuherezabitambo Yehoyada, kugira ngo ugenzure umuntu wese uvuga amahomvu n’uwiha guhanura mu Ngoro, maze umushyire ku ngoyi.

²⁷ None dore nturakarira Yeremiya w’i Anatoti wiha guhanurira muri mwe,

²⁸ kandi yaratwandikiye turi i Babiloni avuga ngo: Uburetwa buzashira kera! Nimwubake amazu muyaturemo, muhinge ubusitani, maze murye imbuto zabwo.’ . . . »

²⁹ Iyo baruwa ya Shemayahu, umuherezabitambo Sefaniya ayisomera umuhanuzi Yeremiya.

³⁰ Nuko Uhoraho abwira Yeremiya iri jambo, ati

³¹ «Oherereza abantu bose bajyanywe bunyago ubu butumwa Uhoraho avuze kuri Shemayahu w’i Nahalamu, ati ’Kubera ko uwo mugabo yihaye kubahanurira kandi ntaramwohereje, akiha kubabeshyeshya ibinyoma,

³² nzamuhagurukira, we n’abamukomokaho. Nta n’umwe muri bo uzagira umwanya muri uyu muryango wanjye kugira ngo anezezwe n’ibyiza nzawukorera. Uwo ni Uhoraho ubivuze! None se si we watoje abantu kwivumbura kuri Uhoraho?’»