Yeremiya 27 - Kinyarwanda Bibiliya Ntagatifu

Umwami w’i Babiloni azaganza

¹ Sedekiya mwene Yoziya, umwami wa Yuda, amaze kwima, Uhoraho abwira Yeremiya iri jambo, agira ati

² «Shaka ibiziriko n’ingeri z’ibiti, ubyishyire ku ijosi;

³ maze ubyoherereze umwami wa Edomu, uwa Mowabu, uw’Abahamoni, uwa Tiri n’uwa Sidoni. Bizajyanwa n’intumwa zabo zaje i Yeruzalemu kwa Sedekiya, umwami wa Yuda.

⁴ Uzabatume kuri ba shebuja, uti ’Uhoraho, Umugaba w’ingabo, Imana ya Israheli avuze atya: Muzabwire ba shobuja, muti:

⁵ Ni jye waremye isi, n’abantu, n’inyamaswa ziyiriho, mbikesheje imbaraga zanjye n’ububasha bwanjye, maze nyiha uwo nihitiyemo.

⁶ Na n’ubu rero, ibi bihugu mbigabiye umugaragu wanjye Nebukadinetsari, umwami w’i Babiloni; ndetse n’inyamaswa zo mu ishyamba, ndazimweguriye zimukorere’.

⁷ (Amahanga yose azamuyoboka, umuhungu we, n’umwuzukuru we, ariko igihe cyagenwe nikimara kugera, amahanga akomeye n’abami b’ibihangange bazamutsinda.)

⁸ Igihugu cyangwa umuryango bizanga kuyoboka Nebukadinetsari, umwami w’i Babiloni, ngo byemere uburetwa bwe, nzabyahuramo inkota, inzara n’icyorezo, kugeza ubwo nzatuma abarimbura, uwo ni Uhoraho ubivuze.

⁹ Naho mwebwe, nimwime amatwi abahanuzi banyu, abapfumu banyu, ababasobanurira inzozi, abacunnyi n’abanyamayeri banyu, kuko bababeshya babizeza ko mutazagaragira umwami w’i Babiloni.

¹⁰ Ibyo babahanurira ni ibinyoma, bizatuma muva mu gihugu cyanyu. Ni koko, nzabatatanya maze murimbuke.

¹¹ Nyamara ariko, igihugu kizemera uburetwa bw’umwami w’i Babiloni, kikamukorera, nzakirekera ku butaka bwacyo kibeho mu mahoro, kizanabutureho. Uwo ni Uhoraho ubivuze!»

¹² Naho Sedekiya, umwami wa Yuda, mutangarije ibi bikurikira: «Emera uburetwa bw’umwami w’i Babiloni, umuyoboke n’abe bose, bityo uzabaho.

¹³ Ni kuki wakwemera gupfa, wowe n’umuryango wawe, mukarimburwa n’inkota, inzara n’icyorezo nk’uko Uhoraho yabyemeje ku gihugu kizanga kuyoboka umwami w’i Babiloni?

¹⁴ Nimwime amatwi abahanuzi babemeza ko mutazigera mugaragira umwami w’i Babiloni. Ibyo babahanurira ni ibinyoma.

¹⁵ Sinigeze mbohereza — uwo ni Uhoraho ubivuze — kandi ibyo bahanura mu izina ryanjye ni ibinyoma; ni yo mpamvu nzabatatanya, mukarimbuka, mwebwe n’abahanuzi babahanurira.»

¹⁶ Abaherezabitambo n’uwo muryango wose, ndababwiye nti «Uhoraho avuze atya: Nimwime amatwi abahanuzi babahanurira ngo ibikoresho by’Ingoro y’Uhoraho biri i Babiloni bizahita bigarurwa bidatinze. Ibyo babahanurira ni ibinyoma;

¹⁷ ntimukabumve na gato. Nimukorere umwami w’i Babiloni, bityo muzabaho. Ni kuki mwashaka ko uyu mugi wahinduka itongo?

¹⁸ Niba ari abahanuzi, bakaba bifitemo ijambo ry’Uhoraho, nibinginge Uhoraho Umugaba w’ingabo, kugira ngo ibikoresho bikiri mu Ngoro, mu gikari n’i Yeruzalemu bitajyanwa i Babiloni.

¹⁹ Ni koko, Uhoraho, afite ijambo ku byerekeye inkingi, ikizenga cy’amazi, ibitereko n’ibindi bikoresho bikiri muri uyu mugi,

²⁰ mbese ibikoresho byose Nebukadinetsari atatwaye igihe ajyanye bunyago Yekoniya mwene Yoyakimu, umwami wa Yuda, akamuvana i Yeruzalemu amujyana i Babiloni, hamwe n’abanyacyubahiro bose ba Yuda n’ab’i Yeruzalemu.

²¹ Ni koko, Uhoraho Umugaba w’ingabo avuze atya ku byerekeye ibikoresho bikiri mu Ngoro, mu gikari n’i Yeruzalemu:

²² bizajyanwa i Babiloni bihagume kugeza umunsi nzabyitaho — uwo ni Uhoraho ubivuze — icyo gihe ni ho nzabizamura, nkabigarura aha hantu.»