Yeremiya 15 - Kinyarwanda Bibiliya Ntagatifu

Umuryango w’Imana ucirwa urubanza burundu

¹ Uhoraho arambwira ati «Kabone n’aho Musa na Samweli baba bampagaze imbere, nta bwo nagirira impuhwe bariya bantu. Bankure imbere bamvire aha!

² Nibakubaza bati ’None se ubu tujye he?’, uzabasubize uti ’Uhoraho avuze atya: abagenewe gupfa, bazapfa! abagenewe kwicishwa inkota, bazazira inkota! abagenewe kwicwa n’inzara, bazazira inzara! abagenewe kujyanwa bunyago, bazajyanwa bunyago!

³ Mbateganyirije ibi bintu bine — uwo ni Uhoraho ubivuze — : inkota izabica, imbwa zizabakurubana, inyoni zo mu kirere n’ibisimba byo mu ishyamba bizabatanyagura, bibatsembe.

⁴ Nzabatangaho urugero ruzakangaranya ibihugu byose byo ku isi kubera ibyo Manase mwene Hezekiya, umwami wa Yuda, yakoreye muri Yeruzalemu byose.»

Nta mbabazi zizongera kubaho

⁵ Yeruzalemu, ni nde wakugirira impuhwe, ni nde ugufitiye umutima ukwitayeho, ni nde wakwitera umwanya abaririza uko umerewe?

⁶ Ni wowe wanyanze, untera umugongo. Uwo ni Uhoraho ubivuze! Nakuramburiyeho ikiganza ngo nkurimbure, kuko narambiwe guhora nkugirira imbabazi!

⁷ Nabagoshoje intara, mbatatanyiriza mu midugudu yo mu gihugu. Umuryango wanjye ndawutsemba, nywuvutsa abana, ariko ntiwahinduye imyifatire.

⁸ Nagwije umubare w’abapfakazi, baruta ubwinshi umusenyi wo ku nkombe z’inyanja. Ku manywa y’ihangu, nazanye umurimbuzi, atera nyina w’umusore w’indwanyi, namuguye gitumo mugusha mu gihirahiro.

⁹ Uwabyaye abahungu barindwi yacitse intege, arahumekana impumu. Izuba rye ryarenze amanywa ava; yakozwe n’isoni, aramwaragurika. Ibyo bari basigaranye, ngiye kubigabiza inkota n’ibitero by’abanzi babo. Uwo ni Uhoraho ubivuze! (Yeremiya:)

Yeremiya yinuba, Imana ikamuhumuriza

¹⁰ Mbega ibyago, mawe, kubona warambyaye! None nkaba ndi umuntu igihugu cyose kinubira, kikanamvuguruza. Nta we nigeze nguza cyangwa ngo mugurize, ariko bose baramvuma!

¹¹ Mu by’ukuri, Uhoraho, ese sinagukoreye uko nshoboye? Ese sinakwinginze mu gihe cy’ibyago n’amakuba? Ni wowe ubizi! (Uhoraho:)

¹² Icyuma giturutse mu majyaruguru, cyangwa umuringa, hari ikindi cyuma se cyashobora kubicamo kabiri?

¹³ Ubukungu bwawe n’umutungo wawe, Yuda, byose mbigabije ababisahura. Icyo ni cyo gihembo cy’ibyaha byawe wakwije mu gihugu cyawe.

¹⁴ Nzakugira umucakara w’abanzi bawe mu gihugu utazi. Umuriro w’uburakari bwanjye uragurumanye, ugiye kubatwika. (Yeremiya:)

¹⁵ Uhoraho, nyibuka, unyiteho, maze umporere abantoteza; sinzarinde gupfa nzize ubwihangane bwawe. Ubimenye neza ko nihanganira ibitutsi kubera wowe.

¹⁶ Iyo numvise amagambo yawe, ndayamira: ijambo ryawe ryaranyuze, rinsendereza umunezero. Nitiriwe izina ryawe, Uhoraho Imana, Umugaba w’ingabo.

¹⁷ Sinshakira ibyishimo byanjye gushyikirana n’abikinira; ikiganza cyawe kintegeka kubitarura kuko wantegetse kuvugana ubukana.

¹⁸ Kuki akababaro kanjye kambayeho akaramata, igikomere cyanjye ntigikire, kikananira imiti? Rwose wambereye nk’isoko idashobora kwizerwa, ntigire amazi igihe cyose. (Uhoraho:)

¹⁹ None rero, Uhoraho avuze atya: Nungarukira ari jye ukugaruye, uzampagarara imbere. Nuvuga amagambo ashyira mu gaciro, ukareka amahomvu, umunwa wawe uzaba uwanjye. Bazakugarukira, ariko wowe ntugomba kubasanga.

²⁰ Imbere y’abo bantu, nkugize nk’inkike ikomeye y’umuringa. Bazakurwanya, ariko nta cyo bazagukoraho; humura turi kumwe, ndagutabara kandi nkurenganure. Uwo ni Uhoraho ubivuze!

²¹ Ndakuvana mu kiganza cy’abagome, nkugobotore mu nzara z’abanyarugomo.