Umubwiriza 7 - Kinyarwanda Bibiliya Ntagatifu

Ibintu ni amabanga

¹ Kuvugwa neza biruta amavuta y’igiciro, kandi umunsi wo gupfa uruta uw’amavuko.

² Aho kujya mu nzu y’ibirori wajya mu nzu y’abapfushije, kuko ari yo maherezo ngombwa ya buri muntu, kandi uriho wese akwiye kubizirikana.

³ Agahinda karuta ibitwenge, kuko ijisho ribabaye ritera umutima kwibaza.

⁴ Umutima w’umunyabuhanga uba mu nzu irimo agahinda, naho uw’umupfayongo ukaba mu nzu y’ibirori.

⁵ Kumva umunyabuhanga agucyaha, biruta gutega amatwi indirimbo y’umupfayongo;

⁶ kuko ibitwenge bye biba bimeze nk’amahwa aturagurikira mu nsi y’inkono itetse. Na byo ni ukugokera ubusa.

⁷ Koko rero, inyota y’ubutegetsi ihinyuza umunyabuhanga, naho umutima uhawe iby’ubusa ugakurizaho guhemuka.

⁸ Iherezo ry’ikintu riruta intangiriro yacyo; kwihangana bikaruta kwirata.

⁹ Ntukihutire kurakara, kuko uburakari ari bwo buranga abapfayongo.

¹⁰ Ntukibaze ngo «Bishoboka bite ko kera nari merewe neza kuruta ubu?» kuko icyo kibazo kitaba gishingiye ku buhanga.

¹¹ Ubuhanga ni bwiza nk’umurage, kandi bufitiye akamaro abatuye kuri iyi si.

¹² Koko kandi, uwisunze ubuhanga angana uwisunze feza; kandi akamaro k’ubumenyi, ni uko ubuhanga bubeshaho nyirabwo.

¹³ Uzitegereze ibikorwa by’Imana: ni nde washobora kugorora icyo yahese?

¹⁴ Ku munsi w’umunezero ujye wishima, naho ku uw’amakuba utekereze uti «Imana yabiremye byombi, kugira ngo umuntu adahishura ikizaba nyuma y’urupfu rwe.»

¹⁵ Ibi byose nabibonye mu buzima bwanjye butagira shinge: hari intungane ikindukana n’ubutungane bwayo, nyamara ariko umugome akarambana n’ububisha bwe.

¹⁶ Ntukabe intungane ngo ukabye, kandi ntukifate nk’umunyabuhanga ngo urenze urugero: ese waba wiyangiza ushaka iki?

¹⁷ Ntugakabye ubugome cyangwa ngo usare: none se kuki warinda gupfa igihe kitaragera?

¹⁸ Ni byiza gufata ikintu ariko n’ikindi utakirekuye, kuko utinya Imana, abitunganya byombi.

¹⁹ Ubuhanga buha nyirabwo imbaraga ziruta iz’abatware cumi bari mu mugi.

²⁰ Koko rero, ku isi nta ntungane ihari ikora neza ntiyigere icumura.

²¹ Ubundi kandi, ntukite ku mabwire, hato utazumva ko umugaragu wawe akuvuma.

²² Ni koko, umutima wawe urabizi, nawe ubwawe kenshi wavumye abandi.

²³ Ibyo byose narabigerageje, mbigiranye ubuhanga. Naravuze nti «Ndifuza kuba umunyabuhanga!» ariko nasanze bindenze.

²⁴ Ibiriho biri kure, birahishe cyane; ni nde uzabihishura?

Kamere y’umugore

²⁵ Mu mutima wanjye, jyewe nahagurukiye gushakashaka no gucengera ubuhanga n’ukuri kw’ibintu, nsanga ubugome ari ubucucu, naho ubusazi ari uguhangwaho.

²⁶ Nasanze umugore atera agahinda kurusha urupfu, kuko ubwe ari umutego, umutima we ukaba urushundura, n’amaboko ye akaba ingoyi. Umuntu ushimisha Imana aramurokoka, naho umunyabyaha abura uko amwiyaka.

²⁷ Dore rero ibyo jyewe, Koheleti, nabonye, maze gusuzuma ibintu kimwe kimwe, ngira ngo menye ukuri kwabyo.

²⁸ Ariko icyo umutima wanjye ushaka, nkaba ntarakibona ni iki: mu bagabo igihumbi, nabonyemo umwe uhamye, ariko mu bagore bose uko bangana, nabuzemo n’umwe.

²⁹ Dore rero ibyo nashoboye kubona: Imana yaremye abantu ari abanyamurava, noneho bo bihangira inzira nyinshi zibayobya.