Umubwiriza 10 - Kinyarwanda Bibiliya Ntagatifu

Izindi nama zinyuranye

¹ Isazi zapfuye zinutsa amavuta y’umubavu; kandi ubusazi, n’iyo ari buke, butesha ubuhanga agaciro.

² Umutima w’umunyabuhanga umuyobora inzira igororotse, naho uw’umupfayongo ukamuyobagiza.

³ Iyo umusazi agenda mu nzira, abura ubwenge akereka bose ko yasaze.

⁴ Umwami nakurakarira, ntugahindagane, kuko ubwitonzi buzakurinda kugwa mu byaha.

⁵ Hari ikintu kibi nabonye ku isi, gisa n’aho umwami yibeshya :

⁶ kubona umusazi ahabwa imirimo ihanitse, naho abashoboye bagasubizwa inyuma !

⁷ Nabonye abagaragu bari hejuru y’amafarasi, naho abatware bagendesha amaguru nk’abacakara.

⁸ Ucukura umwobo, azawugwamo, kandi usenya urukuta, inzoka izamuruma.

⁹ Ucukura amabuye, azamukomeretsa, naho uwasa inkwi yikururire icyago.

¹⁰ Iyo ishoka igimbye ntibayityaze, kuyitemesha bizasaba imbaraga; ariko ubuhanga bwo buhorana akamaro.

¹¹ Kumenya kuzinga inzoka byaba bimaze iki, niba umugombozi ari we ibanje kuruma ?

¹² Amagambo avuye mu munwa w’umunyabuhanga atera ubwuzu, naho akanwa k’umupfayongo karamuroha.

¹³ Iyo ateruye kuvuga ararogombwa, akarangiza avuga amateshwa.

¹⁴ Umusazi aravuga ntahora. Nyamara nta we umenya akazaza ejo; ni nde se washobora kumuhishurira ibizaba nyuma y’urupfu rwe ?

¹⁵ Umupfayongo avunikira ubusa, kubona atazi n’inzira imujyana mu mugi.

¹⁶ Uragowe, wowe gihugu gifite umwami ukiri umwana, n’abatware bazindukira ku mbehe!

¹⁷ Urahirwa, wowe gihugu gifite umwami w’imfura, n’abatware barira igihe, atari ukugira ngo basinde, ahubwo bashaka kunguka imbaraga.

¹⁸ Umunebwe agwirwa n’igisenge cy’inzu ye, naho umunyabute ikamuvira.

¹⁹ Mu birori, abakomeye barira kwinezeza, na divayi ikabahimbariza ubuzima; maze amafaranga akabakemurira ibibazo byose.

²⁰ Ntuzigere uvuma umwami, haba no mu bitekerezo; nuba unaryamye mu nzu yawe ntuzavume umukire, kuko n’akanyoni ko mu kirere kagutwara ijambo, rigatangira kuguruka nta mababa.