Umubwiriza 1 - Kinyarwanda Bibiliya Ntagatifu

¹ Dore amagambo ya Koheleti, mwene Dawudi, umwami w’i Yeruzalemu.

² Koheleti yaravugaga ati: Ibintu ni ubusa, ni ubusabusa koko, byose ni ubusa!

³ Ni iyihe nyungu umuntu akura mu miruho yose imushengurira kuri iyi si?

Ibintu bihora ari bya bindi

⁴ Igisekuru kirahita, ikindi kigataha, nyamara isi yo ikomeza kubaho.

⁵ Izuba rirarasa, nyuma rikarenga, maze rikihutira gusubira aho rizongera kurasira.

⁶ Umuyaga uhuhira mu majyepfo, ugahindukirira mu majyaruguru, nyuma ukazenga ukazenguruka, amaherezo ugakomeza inzira yawo.

⁷ Inzuzi zose zisuka mu nyanja, ariko inyanja ntijya yuzura. Nyamara na zo ntizihwema kujya iyo zijya.

⁸ Ibintu byose ugasanga birambiranye, ku buryo umuntu atabona uko abivuga; nyamara ariko ijisho ntirihaga kubireba, n’ugutwi ntikurambirwa kubyumva.

⁹ Ibyahozeho, ni byo bizakomeza kubaho; ibyakozwe ni byo bizakomeza gukorwa, ugasanga nta kintu gishyashya cyaduka ku isi.

¹⁰ Hari ubwo haba ikintu bakavuga ngo «Dore kiriya ni gishya!» burya na cyo kiba cyarabayeho mu binyejana byahise.

¹¹ Gusa nta rwibutso rw’ibyakera dusigarana, nk’uko n’iby’ubu nta rwo bizasigira ibihe bizaza.

Akumiro ka Salomoni

¹² Jyewe, Koheleti, nabaye umwami wa Israheli, nganje i Yeruzalemu.

¹³ Nashatse gushishozanya ubuhanga ibikorerwa mu nsi y’ijuru byose, nsanga umurimo Imana yashinze abantu utoroshye.

¹⁴ Nitegereje ibikorerwa ku isi, nsanga byose ari ubusabusa, bikaba ari ukwiruka inyuma y’umuyaga.

¹⁵ Icyagoramye ntigishobora kugororoka, kandi ibibuze ntibigira ingano.

¹⁶ Ubwo nahise nibwira mu mutima, nti «Dore mfite ubushishozi busumbye ubw’abambanjirije i Yeruzalemu bose, n’umutima wanjye nawutoje ubumenyi n’ubuhanga.

¹⁷ Nitondeye gusobanukirwa ubumenyi n’ubuhanga, kumenya ubugoryi n’ubusazi; ibyo na byo nasanze ari ukwiruka inyuma y’umuyaga.

¹⁸ Koko rero, ubuhanga bwinshi bubyara agahinda kenshi, naho ubumenyi bukabije bugakurura imibabaro.»