Tito 3 - Kinyarwanda Bibiliya Ntagatifu

Ibyo abayoboke bashinzwe

¹ Jya wibutsa bose ko bagomba kuyoboka abatware n’abategetsi, bakabumvira, bagahora bakereye gukora umurimo mwiza wose,

² ntibagire uwo batuka, bakirinda kurwana, bakaba abantu bagira neza, bakagaragariza abandi bose ubugwaneza budakemwa.

³ Koko rero natwe kera twari ibicucu, n’intumvira, n’ibirara; twari twaratwawe n’irari ry’ibibi bitagira ingano, tukibera mu bugizi bwa nabi n’ishyari, dufite n’icyangiro, kandi natwe ubwacu tuzirana.

⁴ Ariko igihe higaragaje ubuntu bw’Imana Umukiza wacu n’urukundo ifitiye abantu,

⁵ yaradukijije, itabitewe n’ibyiza twaba twarakoze, ahubwo ibitewe n’impuhwe igira, idukirisha icyuhagiro dukesha kuvuka bwa kabiri no guhinduka abantu bashya muri Roho Mutagatifu.

⁶ Kandi uwo Roho, yamudusakajemo ku bwa Yezu Kristu Umukiza wacu,

⁷ kugira ngo tube intungane, kandi twiringire kuzahabwa umurage w’ubugingo bw’iteka, tubikesha ubuntu bwayo.

⁸ Iryo jambo rikwiye kwizerwa, kandi ndashaka ko kuri izo ngingo wajya uvuga wihanukiriye, kugira ngo abemeye Imana barushanwe kugira umwete wo kugenza neza. Ibyo ni byo byiza bifitiye abantu akamaro.

⁹ Naho ibibazo bidafite ishingiro, n’ibyerekeye amasekuruza, intonganya n’impaka za ngo turwane zerekeye Amategeko, jya ubigendera kure, kuko ari nta cyo bimaze kandi bikaba iby’ubusa.

¹⁰ Nihagira umuntu uca ukubiri n’ukwemera, maze wamuburira ubwa mbere n’ubwa kabiri ntiyumve, uzatane na we;

¹¹ uzi yuko bene uwo muntu aba yarataye inzira, akaba n’umunyabyaha wicira ubwe urubanza rubi.

Gutashya abavandimwe

¹² Ninkoherereza Aritemasi na Tushiko, uzihutire kunsanga i Nikopoli, kuko ari ho nageneye kuzamara itumba.

¹³ Ugire umwete wo gutegura urugendo rwa Zenasi, impuguke mu by’amategeko, n’urwa Apolo, kugira ngo batazagira icyo babura.

¹⁴ Kandi n’abacu bitoze kurushanwa kugira umwete wo kugenza neza, bakenure ababikwiriye, kugira ngo batabura icyo bamarira abandi.

¹⁵ Abo turi kumwe bose baragutashya. Nawe utashye abadukunda dusangiye ukwemera. Ineza y’Imana ihorane namwe mwese.