Rusi 3 - Kinyarwanda Bibiliya Ntagatifu

Ruta abona umugabo

¹ Nawomi abwira umukazana we, ati «Ni ko mwana wa, ese si jye ugomba kukurebera uburyo wabaho ngo ugubwe neza?

² None se uriya Bowozi, shebuja wa ba bakozi mwiriranywe, si mwene wacu? Dore kandi iri joro arajya kugosoza ingano ze ku mbuga aho bazihuriye.

³ Umva rero, nkubwire: wiyuhagire, wisige amavuta ahumura, wambare neza, maze umanuke ujye aho bagosorera. Ariko umenye ntumwiyereke atararangiza kurya no kunywa.

⁴ Najya kuryama, umenye aho aryamye, ugende worosore ku birenge bye maze uryame. Na we arakwereka uko ugomba kubigenza.»

⁵ Ruta aramusubiza ati «Ibyo umbwiye byose ndabikora.»

⁶ Nuko aramanuka ajya aho bagosorera, abigenza uko nyirabukwe yamubwiye.

⁷ Bowozi ararya, aranywa, amererwa neza, maze ajya kuryama hafi y’ikirundo cy’ingano. Ruta aromboka, amworosora ibirenge, araryama.

⁸ Nuko mu gicuku, Bowozi arashiguka, arebye imbere ye, abona umugore uryamye ku birenge bye.

⁹ Ati «Yewe, uri nde?» Undi ati «Erega ndi Ruta, umuja wawe.» Yungamo ati «Ese wancyuye ko ari wowe ugomba kugaruza ibyo mu muryango?»

¹⁰ Bowozi ati «Urakagira umugisha w’Uhoraho, mwana wanjye. Ubu rwose unyeretse ubupfura bwawe, kurusha uko wabwerekanye mbere hose. Ngushimye rwose ko utirutse ku basore, baba abakire cyangwa abakene.

¹¹ None rero, mwana wanjye, ushyire umutima hamwe: icyo uzansaba cyose nzakigukorera. Abantu b’ino bose bazi ko uri umugore w’intwari.

¹² Cyakora n’ubwo ndi mu bagomba kugaruza iby’umuryango, hari undi wa bugufi ubifitiye uburenganzira kundusha.

¹³ Iryamire; ejo nagutwara, ni byiza, azagutware. Ariko navuga ko adashaka kugucyura, jyewe nzagucyura. Ndahije Uhoraho Imana nzima! Ngaho iryamire, uzagenda hakeye.»

¹⁴ Nuko umugore arara aho ku birenge bye, burinda bucya. Ariko abyuka mu ruturuturu, igihe umuntu aba ataramenya undi. Bowozi yaribwiraga ati «Hatagira umenya ko uyu mugore yaraye aha bagosorera.»

¹⁵ Aramubwira ati «Zana uwo mwitero wawe, uwurambure neza.» Undi arawutega. Amusukiramo incuro makumyabiri z’ingano za bushoki, aramukorera. Nuko Ruta arataha, asubira mu mugi.

¹⁶ Agitunguka, nyirabukwe ati «Byagenze bite, mwana wa?» Amutekerereza ibyo uwo mugabo yamugiriye byose.

¹⁷ Ati «Yampaye n’uyu mutwaro w’ingano, arambwira ngo ’Ntiwasubira kwa nyokobukwe nta cyo ujyanye’!»

¹⁸ Nawomi aramubwira ati «Igumire aha, mwana wanjye, kugeza igihe umenyeye amaherezo yabyo. Uriya mugabo ntaruhuka atabitunganyije byose, uyu munsi ndetse!»