Nehemiya 4 - Kinyarwanda Bibiliya Ntagatifu

¹ Sanabalati, Tobiya, Abarabu, Abahamoni n’Abashidodi bamaze kumenya ko isanwa ry’inkuta za Yeruzalemu rijya mbere, bumvise kandi ko dutangiye kuziba ibyuho, barushaho kurakara.

² Bahuza umugambi kugira ngo baze gutera Yeruzalemu maze bayivutsemo imidugararo.

³ Nuko, tumaze gutakambira Imana yacu, dushyiraho abantu ngo babaturinde umunsi n’ijoro.

⁴ Nyamara abo muri Yuda baravugaga bati «Imbaraga z’abubatsi zirakendereye, kandi amatongo ni menshi, birenze urugero! Izi nkike ntituzashobora kuzubaka!»!»

⁵ Naho abanzi bacu bo baravuga bati «Ntibazigera batubona cyangwa ngo babimenye, tuzabagwa gitumo, tubice maze ibyo batangiye birangirire aho.»

Nehemiya aha abubatsi intwaro

⁶ Abayahudi baturanye na bo baraza baratuburira, babigira nk’incuro cumi, batubwira bati «Barakorana, baturutse mu turere twose batuyemo, bagira ngo baze kudutera!»

⁷ Nuko nshyira rubanda inyuma y’inkike, nkabahagarika nkurikije amazu yabo, bitwaje inkota, amacumu n’imiheto byabo.

⁸ Maze kugenzura uko bahagaze, ndahaguruka mbwira abanyacyubahiro, abakuru n’imbaga yose, nti «Mwitinya bariya bantu! Nimwibuke Nyagasani n’imbaraga ze zikangaranya, maze murwanirire abavandimwe n’abahungu banyu, abakobwa n’abagore banyu, ndetse n’ingo zanyu.»

⁹ Nuko abanzi bacu bumvise ko twaburiwe, Imana ibatera kureka umugambi wabo, maze twese tugaruka kubaka inkike, buri wese ku murimo we.

¹⁰ Ariko guhera uwo munsi, igice kimwe gusa cy’abantu banjye barubakaga, naho abandi bagahorana amacumu, ingabo, imiheto n’imyambaro y’intambara, bahagaze inyuma y’abo muri Yuda bose bakoraga.

¹¹ Abikorezi bo, bakoreshaga akaboko kamwe, naho akandi gafashe intwaro.

¹² Buri wese mu bubatsi, na we yubakaga afite inkota mu rukenyerero. Uwavuzaga ihembe we, yagumaga iruhande rwanjye.

¹³ Nuko mbwira abanyacyubahiro, abajyanama, ndetse n’imbaga yose, nti «Aho dukwiye gukora haracyari henshi kandi ntihegeranye, bigatuma dutatana ku mpande zose z’urukuta.

¹⁴ None rero aho muzumva ihembe rivugiye, muzahadusange muhakoranire, ubundi Imana yacu izaturwanirira.»

¹⁵ Nuko abo mu gice kimwe bakajya ku mirimo naho abandi bagafata amacumu yabo, kuva igihe umuseke ukebye kugeza ubwo inyenyeri zimurika.

¹⁶ Ubwo kandi ndongera mbwira imbaga, nti «Buri muntu n’umugaragu we bajye barara muri Yeruzalemu, bityo tuzagire abarinzi nijoro, naho ku manywa bakore.»

¹⁷ Naho jyewe hamwe n’abavandimwe banjye n’abagaragu banjye, ndetse n’abarinzi twagendanaga, nta n’umwe wiyamburaga imyambaro ye, buri wese yabaga afite intwaro ye, ayitwariye iburyo.