Nehemiya 3 - Kinyarwanda Bibiliya Ntagatifu

Abayahudi bongera kubaka inkike za Yeruzalemu

¹ Eliyashibu, umuherezabitambo mukuru arahaguruka, hamwe n’abavandimwe be b’abaherezabitambo, nuko bubaka Irembo ry’Intama; bashinga ibikingi byaryo, babiteraho ibizingiti n’inzugi. Hanyuma barakomeza barubaka, bageza ku munara wa Hananeli.

² Iruhande rwabo abantu b’i Yeriko na bo baratangira barubaka, bakurikiwe na Zakuru mwene Imuri.

³ Abahungu ba Hasena bubaka irembo ry’Amafi, bashinga ibikingi byaryo, babiteraho inzugi, hamwe n’ibyuma byazo n’amapata.

⁴ Iruhande rwabo hubatswe na Meremoti mwene Uriya, mwene Hakosi; akurikirwa na Meshulamu, mwene Berekiya, mwene Mashezabeli, na we arubaka. Iruhande rwabo hubakwa na Sadoki mwene Bana;

⁵ akurirwa n’abantu b’i Tekowa na bo barubaka, ariko abanyacyubahiro baho banze kutwitabira, twebwe abategetsi babo.

⁶ Irembo rya Yeshana ryubatswe na Yoyada mwene Paseya, na Meshulamu mwene Besodiya; ni bo bashinze ibikingi byaryo, babiteraho inzugi, hamwe n’ibyuma byazo n’amapata.

⁷ Iruhande rwabo hubatswe na Melatiya w’i Gibewoni, na Yadoni w’i Meroni, bafatanyije n’abantu b’i Gibewoni n’ab’i Misipa; aho bubatse ni ahateganye n’ingoro y’umutegeka w’ibihugu by’iburengerazuba bwa Efurati.

⁸ Uziyeli mwene Harihaya, umucuzi wa zahabu, na we arubaka, akurikirwa na Hananiya, umukozi w’imibavu; bombi basana inkike za Yeruzalemu, bageza ku nkike ngari.

⁹ Iruhande rwabo hubatswe na Refaya mwene Hiri, umutware w’igice cya kabiri cy’akarere ka Yeruzalemu.

¹⁰ Iruhande rwe hubaka Yedaya mwene Harumafu, yubatse aharebana n’inzu ye; akurikirwa na Hatushi mwene Hashabuneya, na we arubaka.

¹¹ Igice cyakurikiyeho cyubakwa na Malikiya mwene Harimu, afatanyije na Hashubi mwene Pahati‐Mowabu, bageza ku munara w’Amatanura.

¹² Uwakurikiyeho ni Shalumi mwene Haloheshi, wategekaga ikindi gice cya kabiri cy’akarere ka Yeruzalemu, yubaka afatanyije n’abakobwa be.

¹³ Irembo ryo ku Kibaya ryubakwa na Hanuni n’abaturage b’i Zanowahi; ni bo baryubatse kandi bariteraho inzugi, hamwe n’ibyuma byazo n’amapata; ndetse bubaka n’imikono igihumbi y’inkike, bageza ku Irembo ry’Imyanda.

¹⁴ Naho Irembo ry’Imyanda, ryo ryubakwa na Malikiya mwene Rekabu, umutware w’akarere ka Betikeremi; ni we waryubatse kandi ariteraho inzugi, hamwe n’ibyuma byazo n’amapata.

¹⁵ Shalumi mwene Kolihoze, umutware w’akarere ka Misipa, ni we wubatse Irembo ryo ku Iriba, ararisakara kandi ariteraho inzugi, hamwe n’ibyuma byazo n’amapata yazo; ndetse yubaka n’inkike ahateganye n’ikidendezi kiyoborera amazi mu busitani bw’umwami, kugeza ku madarajya amanuka mu Murwa wa Dawudi.

¹⁶ Yakurikiwe na Nehemiya mwene Azibuki, umutware w’igice cya kabiri cy’akarere ka Betisuri, aba ari we wubaka ahateganye n’imva za Dawudi, ageza ku kidendezi gicukuwe vuba, no ku nzu y’Intwari.

¹⁷ Abalevi bakurikiraho barubaka, barimo Rehumu mwene Bani; iruhande rwe hubakwa na Heshabiya, umutware w’igice cya kabiri cy’akarere ka Keyila, afatanyije n’abo mu karere ke.

¹⁸ Nyuma yabo hubakwa n’abavandimwe babo, barimo Binuwi mwene Henadadi, umutware w’igice cya kabiri cy’akarere ka Keyila.

¹⁹ Akurikirwa na Ezeri mwene Yeshuwa, umutware w’i Misipa, aba ari we wubaka ikindi gice cy’ahazamuka hagana ku nzu babikagamo ibikoresho by’intambara, mu mfuruka y’inkike.

²⁰ Iruhande rwe, Baruki mwene Zabayi, yubakana umwete ikindi gice ahereye ku mfuruka y’inkike, ageza ku muryango w’inzu ya Eliyashibu, umuherezabitambo mukuru.

²¹ Akurikirwa na Meremoti mwene Uriya, mwene Hakosi, aba ari we wubaka ikindi gice, ahereye ku muryango w’inzu ya Eliyashibu, ageza aho igarukira.

²² Abaherezabitambo bo mu turere dukikije Yeruzalemu bakurikiraho, na bo barubaka.

²³ Bakurikirwa na Benyamini na Hashubi, bubaka ahateganye n’amazu yabo; Azariya mwene Maseya, mwene Ananiya na we akurikiraho, yubaka iruhande rw’inzu ye.

²⁴ Binuwi mwene Henadadi yubaka ku kindi gice, kuva ku nzu ya Azariya kugeza ku iguni ry’inkike.

²⁵ Hakurikiraho Palali mwene Uzayi, aba ari we wubaka hagati y’iguni n’umunara wo hejuru, wometse ku nzu y’umwami, bugufi y’ikibuga cy’abarinzi. Pedaya mwene Perewoshi,

²⁶ afatanyije n’abahereza bari batuye i Ofeli, yubaka agana mu burasirazuba, ageza imbere y’Irembo ry’Amazi no ku munara wo hejuru.

²⁷ Hakurikiraho abantu b’i Tekowa, baba ari bo bubaka ikindi gice, bahereye ahateganye n’umunara munini wo mu iguni, bageza ku nkike ya Ofeli.

²⁸ Kuva hejuru y’Irembo ry’Amafarasi, hubakwa n’abaherezabitambo, buri muntu imbere y’inzu ye.

²⁹ Abakurikiyeho ni Sadoki mwene Imeri, wubatse ahateganye n’inzu ye, na Shemaya mwene Shekaniya, umurinzi w’Irembo ry’iburasirazuba.

³⁰ Hananiya mwene Sheramiya, na Hanuni, ari we wa gatandatu muri bene Asafu, bubaka ikindi gice; bakurikirwa na Meshulamu, mwene Berekiya, wubatse imbere y’inzu ye.

³¹ Malikiya, umucuzi wa zahabu, yubaka kugeza ku mazu y’abahereza n’ay’abacuruzi, ahateganye n’Irembo ry’Abagenzuzi, kugeza ku cyumba cyo hejuru y’iguni.

³² Maze hagati y’icyumba cyo hejuru y’iguni n’Irembo ry’Intama, hubakwa n’abacuzi ba zahabu hamwe n’abacuruzi.

Abanzi bashaka kudindiza imirimo y’ubwubatsi

³³ Aho Sanabalati yumviye ko twubaka inkike, ararakara maze arabisha. Ahinyura Abayahudi

³⁴ kandi avugira mu ruhame rw’abavandimwe be n’ingabo zari i Samariya, ati «Mbese bariya batindi b’Abayahudi bari mu biki? Aho ntibibwira ko biriya ari igikorwa cy’umunsi umwe? Mbese ye, ariya mabuye yahiye bariho batoragura mu matongo, ni yo agenewe kubaka?»

³⁵ Na Tobiya w’Umuhamoni, wari iruhande rwe, ararisongera ati «Ngaho nibubake da! Ruriya rukuta rwabo, n’ingunzu imwe irwuriye, rwahita rutengagurika!»

³⁶ Twumve, Mana yacu, kuko twasuzuguwe, maze ibitutsi badututse bibe ari bo bihama, kandi bazakorwe n’ikimwaro mu gihugu cy’ubucakara!

³⁷ Wibababarira igicumuro cyabo cyangwa ngo ubahanagureho icyaha bakugiriye, kuko basuzuguye abubatsi.

³⁸ Nuko turakomeza twubaka inkike, maze bidatinze ziba zigeze hagati, kuko imbaga yakoranaga umwete.