Nahumu 3 - Kinyarwanda Bibiliya Ntagatifu

Umugi wamenaga amaraso ugabijwe abawurimbura

¹ Ugushije ishyano, mugi umena amaraso, ukaba wuzuye ubujura n’urugomo, ntunahweme kunyaga iby’abandi!

² Nimwumve urusaku rw’ikiboko n’urw’inziga zikocagurana, imirindi y’amafarasi n’umuvuduko w’amagare y’intambara.

³ Abanyamafarasi biteguye kurasa, inkota ziragurumana nk’amafumba, amacumu ararabya nk’umurabyo. Abapfuye ni benshi, imirambo irandagaye hose, intumbi ntizibarika, baragenda bazisitaraho!

⁴ Ibyo byose ubitewe n’uburaya bwawe bukabije, wowe, mupfumukazi wabuhiriye ukagira n’uburanga butangaje, ugashikamira amahanga n’ubwo buhabara bwawe, n’ibihugu ukabyicisha uburetwa kubera ubupfumu bwawe.

⁵ Noneho dore ndakwibasiye, uwo ni Uhoraho, Umugaba w’ingabo ubivuze, nzazamura ingutiya yawe kugera ku gahanga, kugira ngo nkwambike ubusa imbere y’amahanga, n’ibihugu mbyereke ubwambure bwawe.

⁶ Nzakujugunyaho imyanda, nkugire akarorero, kugira ngo ukorwe n’ikimwaro,

⁷ maze ugukubise amaso wese, ahunge avuza induru, agira ati «Ninivi yarimbutse!» Ni nde uzayigirira impuhwe? Ni ko se, uzavana he abaguhumuriza?

Ninivi izaba aka Tebesi

⁸ Waba se hari icyo urusha Tebesi, wa mugi wubatse hagati y’imiyoboro ya Nili, ugakikizwa n’amazi impande zose, uruzi rukawubera inkike iwurinda?

⁹ Kushi na Misiri ni byo wishingikirizaga buri gihe, Puti n’Abanyalibiya baragiranye na wo amasezerano.

¹⁰ Nyamara abaturage bawo barafashwe, bajyanwa bunyago; abana bawo b’ibitambambuga bicirwa mu mayira yose, abanyacyubahiro bawo bagabanywa ababatsinze, hakoreshejwe ubufindo, n’abatware bawo bose baboheshwa iminyururu.

¹¹ Nawe rero uramukiwe no gusinda ukarohama! Uzahatirwa gushakira hose ubuhungiro kugira ngo ucike umwanzi!

Ninivi ntizashobora kwirwanaho

¹² Ibigo byawe bikomeye byose bimeze nk’imitini iriho imbuto zihishije; iyo bayinyeganyeje na gatoya, imbuto zihungukira mu kanwa k’uzirya.

¹³ Reba abantu usigaranye: bifashe rwose nk’abagore! Amarembo y’igihugu cyawe yugururiwe abanzi, umuriro watwitse ibihindizo byawe.

¹⁴ Nimuvome amazi, uyabikire igihe uzaba ugoswe; komeza inkike zikuzitiye, jya gushaka ibumba, urikate maze ubumbe amatafari.

¹⁵ Nyamara ni ho umuriro uzagutwikira, inkota igutsembe, kabone n’iyo waba imbaga nyamwinshi ingana n’isanane cyangwa n’inzige.

Abatuye i Ninivi bose bazatatana

¹⁶ Wigwijeho abacuruzi baruta inyenyeri zo mu kirere, none bose barayoyotse nk’inzige zigurutse.

¹⁷ Abarinzi bawe bari benshi nk’inzige, abagenzuzi bawe ari nk’irumbo ry’isanane; zihumbitse ku gihuru kubera ubukonje, nyamara iyo izuba rirashe, zose ziraguruka, ntihagire umenya n’aho zihungiye.

Amakuba atagira igaruriro

¹⁸ Mbe, mwami wa Ashuru, abatware bawe ko bahunyiza, intwari zawe zikaba zisinziriye! Imbaga yawe yatataniye mu misozi, kandi nta muntu n’umwe uri bubakoranyirize hamwe!

¹⁹ Amakuba yawe ntagira igaruriro, ibikomere byawe ntibishobora gukira. Uwumvise akaga urimo wese aravuza impundu, ariko kandi ni mu gihe: none se ni nde utigeze ugirira nabi?