Mika 5 - Kinyarwanda Bibiliya Ntagatifu

Betelehemu, umugi kavukire w’Umwami‐Mukiza

¹ Naho wowe, Betelehemu Efurata, uri mutoya cyane mu miryango ya Yuda, ariko iwawe nzahavana ugomba gutegeka Israheli; inkomoko ye ni iyo hambere, mu bihe bya kera cyane.

² Ni cyo gituma Uhoraho azabatererana kugeza igihe ugomba kubyara azabyarira, maze udusigisigi tw’abavandimwe be dusange Abayisraheli.

³ We rero azemarara, aragire ubushyo bwe, abikesheje ububasha bw’Uhoraho n’ubuhangange bw’izina ry’Imana ye. Icyo gihe bazashinga imizi, kuko azakomera, akanategeka kugera ku mpera z’isi.

⁴ Ni we ubwe uzazana amahoro! Abanyashuru nibadutera bagakanagira ku butaka bwacu, tuzabateza abashumba barindwi n’abatware umunani.

⁵ Igihugu cya Ashuru n’icya Nemurodi bazabitegekesha inkota, maze we ubwe azadukize Ashuru, niramuka iteye igihugu cyacu, ikarenga umupaka wacu.

Udusigisigi twa Israheli mu banyamahanga

⁶ Ubwo udusigisigi twa Yakobo tuzatura rwagati mu miryango myinshi; bamere nk’ikime cyangwa ibijojoba bigwa ku byatsi, biturutse kuri Uhoraho, atagize icyo asaba umuntu cyangwa se icyo amutezeho.

⁷ Nuko udusigisigi twa Yakobo tuzabe mu mahanga, rwagati mu miryango myinshi, mbese nk’intare mu nyamaswa z’ishyamba, cyangwa nk’icyana cy’intare mu mashyo y’intama; uko itambutse igakacanga, igashwanyaguza, kandi ntihagire uyitesha icyo ifashe.

⁸ Nawe rero, cyamurira ikiganza cyawe ku bakurwanya, maze abanzi bawe bose barimbuke!

Uhoraho atsemba ibyayobyaga umuryango we

⁹ Dore uko bizagenda kuri uwo munsi, uwo ni Uhoraho ubivuze! Nzakwambura amafarasi, ntsembe n’amagare yawe y’intambara.

¹⁰ Nzasenya imigi y’igihugu cyawe, ndimbure n’ibigo byawe bikomeye byose.

¹¹ Nzavana ibinyabapfumu mu kiganza cyawe, n’abacunnyi ntuzongera kubagira ukundi.

¹² Nzatsemba iwawe amashusho n’inkingi, uherukire aho gupfukamira ibyakozwe n’ibiganza byawe.

¹³ Nzarimbura iwawe ibiti weguriye ibigirwamana, n’imigi yawe nzayisenye.

¹⁴ Hanyuma nzihimure no ku mahanga atanyumviye, mbigiranye uburakari n’umujinya mwinshi.