Matayo 8 - Kinyarwanda Bibiliya Ntagatifu

Yezu akiza umubembe

¹ Igihe Yezu amanutse umusozi, abantu benshi baramukurikira.

² Nuko haza umubembe amupfukama imbere, aramubwira ati «Nyagasani, ubishatse wankiza.»

³ Yezu arambura ukuboko, amukoraho, avuga ati «Ndabishatse, kira.» Ako kanya ibibembe bye birakira.

⁴ Nuko Yezu aramubwira ati «Uramenye ntugire uwo ubibwira, ahubwo genda, wiyereke umuherezabitambo kandi utange ituro ryategetswe na Musa ngo ribabere icyemezo cy’uko wakize.»

Yezu akiza umugaragu w’umutegeka w’abasirikare

⁵ Yezu abaye akinjira muri Kafarinawumu, umutegeka w’abasirikare aramwegera, aramwinginga, avuga ati

⁶ «Nyagasani, umugaragu wanjye aryamye mu nzu iwanjye; ni ikimuga kitinyagambura kandi arababaye cyane».

⁷ Yezu aramubwira ati «Ndaje mukize».

⁸ Uwo mutegeka aravuga ati «Nyagasani, sinkwiye ko wakwinjira mu nzu yanjye, ariko uvuge ijambo rimwe gusa maze umugaragu wanjye akire.

⁹ N’ubwo nanjye ndi umuntu utegekwa, mfite abasirikare; nabwira umwe nti ’Genda’, akagenda; undi nti ’Ngwino’, akaza; n’umugaragu wanjye nti ’Kora iki’, akagikora.»

¹⁰ Yezu abyumvise, aratangara maze abwira abamukurikiye, ati «Ndababwira ukuri, muri Israheli nta muntu nigeze nsangana ukwemera nk’uku.

¹¹ Ndabibabwiye: benshi bazava aho izuba rituruka n’aho rirengera, basangire na Abrahamu na Izaki na Yakobo mu Ngoma y’ijuru,

¹² naho abana b’Ingoma bazatabwa hanze mu mwijima: aho bazaririra kandi bagahekenya amenyo.»

¹³ Hanyuma Yezu abwira uwo mutegeka w’abasirikare, ati «Genda, uko wemeye abe ari ko ugirirwa.» Nuko wa mugaragu akira ako kanya.

Yezu akiza nyirabukwe wa Petero

¹⁴ Yezu ngo agere kwa Petero, asanga nyirabukwe aryamye, yahinduwe.

¹⁵ Amukoze ku kiganza, ubuganga bumwamukamo, arabyuka aramuzimanira.

¹⁶ Bugorobye, bamuzanira abahanzweho na roho mbi nyinshi; nuko azirukana azikabukira, maze akiza abarwayi bose,

¹⁷ kugira ngo huzuzwe ibyo umuhanuzi Izayi yavuze ati «Yatwunamuye mu ntege nke zacu, yigerekaho n’indwara zacu.»

Ibya ngombwa ku batorwa n’Imana

¹⁸ Yezu abonye ko ashagawe n’abantu benshi, ategeka ko bafata ku nkombe yo hakurya.

¹⁹ Umwigishamategeko aramwegera ati «Mwigisha, nzagukurikira aho uzajya hose.»

²⁰ Yezu aramusubiza ati «Imihari igira amasenga, n’inyoni zo mu kirere zikagira ibyari; naho Umwana w’umuntu we ntagira aho yegeka umutwe.»

²¹ Undi wo mu bigishwa aramubwira ati «Nyagasani, reka mbanze njye guhamba data.»

²² Yezu aramusubiza ati «Nkurikira, ureke abapfu bahambe abapfu babo.»

Yezu acubya umuhengeri

²³ Yezu aherekejwe n’abigishwa be, bajya mu bwato.

²⁴ Ni bwo habyutse umuhengeri mwinshi mu nyanja, imivumba irenga ubwato. Nyamara we yari asinziriye.

²⁵ Baramwegera baramukangura, bavuga bati «Nyagasani, dutabare, turashize!»

²⁶ Arababwira ati «Muratinya iki, mwa bemera gato mwe?» Hanyuma arahaguruka, ategeka umuyaga n’inyanja, maze haratuza cyane.

²⁷ Nuko abo bantu baratangara, baravuga bati «Uyu ni muntu ki, imiyaga n’inyanja byumvira!»

Yezu akiza abantu babiri bahanzweho na roho mbi

²⁸ Amaze gufata inkombe yo hakurya mu gihugu cy’Abanyagadara, abagabo babiri bahanzweho na roho mbi baturuka mu irimbi, baza bamusanga; bari ibintu by’ibinyamaswa, ntihagire utinyuka kunyura iyo nzira.

²⁹ Nuko barasakuza bati «Uradushakaho iki, Mwana w’Imana? Wazanywe no kuduturumbanya igihe kitaragera?»

³⁰ Hirya y’aho rero hakaba umukumbi w’ingurube zarishaga.

³¹ Roho mbi ni ko kwinginga Yezu, ziti «Niba utwirukanye, twohereze muri uriya mukumbi w’ingurube.»

³² Arazibwira ati «Nimuzijyemo!» Nuko ziva muri abo bantu, zijya muri za ngurube, maze uwo mukumbi wose ukonkoboka mu manga n’umuriri mwinshi, wiroha mu nyanja, urarohama.

³³ Abashumba barahunga, basubira mu mugi, bavuga ibyabaye byose, n’ibyerekeye abahanzweho.

³⁴ Nuko abatuye umugi bose basanga Yezu; ngo bamubone, baramwinginga ngo abavire mu gihugu.