Matayo 27 - Kinyarwanda Bibiliya Ntagatifu

Yezu ajyanwa kwa Pilato

¹ Igitondo gitangaje, abatware b’abaherezabitambo bose n’abakuru b’umuryango bajya inama yo kwicisha Yezu.

² Bamaze kumuboha baramushorera, bamushyira Pilato wari Umutware mukuru w’igihugu.

Urupfu rwa Yuda

³ Nuko Yuda wari wamugambaniye abonye ko bamuciriye urubanza rwo gupfa, yumva yigaye maze agarurira abatware b’abaherezabitambo n’abakuru b’umuryango bya biceri mirongo itatu bya feza, arababwira ati

⁴ «Nacumuye, ngambanira amaraso y’umuntu w’umwere.» Baramusubiza, bati «Bidutwaye iki? Ni wowe uzigorerwa!»

⁵ Nuko bya biceri abijugunya imbere y’Ingoro, ava aho, ajya kwimanika.

⁶ Abatware b’abaherezabitambo bafata bya biceri, baravugana bati «Ntibikwiye ko bishyirwa hamwe n’amaturo yandi, kuko byaguzwe amaraso y’umuntu.»

⁷ Nuko, bamaze kujya inama, babigura umurima w’umubumbyi, ngo bajye bahahamba abagenzi.

⁸ Ni cyo gituma uwo murima witwa «umurima w’amaraso», kugeza na n’ubu.

⁹ Nuko huzuzwa ibyo umuhanuzi Yeremiya yavuze, ati «Bakiriye ibiceri mirongo itatu bya feza, ari byo kiguzi cy’uwagurishijwe n’abana ba Israheli,

¹⁰ kandi babitanga ku murima w’umubumbyi, nk’uko Nyagasani yabintegetse.»

Yezu imbere ya Pilato

¹¹ Yezu ajyanwa imbere y’umutware mukuru w’igihugu. Umutware aramubaza ati «Ni wowe Mwami w’Abayahudi?» Yezu aravuga ati «Urabyivugiye.»

¹² Abatware b’abaherezabitambo n’abakuru b’umuryango bamurega byinshi, ariko we ntagire icyo asubiza.

¹³ Nuko Pilato aramubaza ati «Ntiwumva ibyo byose bagushinja?»

¹⁴ Nuko ntiyagira ijambo na rimwe amusubiza, umutware biramutangaza cyane.

¹⁵ Buri munsi mukuru Umutware yari yaramenyereye kurekurira rubanda imfungwa imwe bishakiye.

¹⁶ Ubwo hari imfungwa y’igihangange yitwaga Barabasi.

¹⁷ Pilato abwira rubanda rwakoranye ati «Uwo mushaka ko mbarekurira ni nde, Barabasi cyangwa Yezu bita Kristu?»

¹⁸ Nyamara yari azi ko bamutanze babitewe n’ishyari.

¹⁹ Mu gihe yari yicaye mu rukiko aca urubanza, umugore we amutumaho, ati «Uramenye ntiwivange mu by’uwo muntu w’intungane, dore naraye ndose byinshi byambabaje bitewe na we.»

²⁰ Ariko abatware b’abaherezabitambo n’abakuru b’umuryango bemeza rubanda ko basaba Barabasi, naho Yezu bakamwicisha.

²¹ Nuko rero Umutware yongera kubabaza ati «Muri abo bombi uwo mushaka ko mbarekurira ni uwuhe?» Baramusubiza bati «Barabasi !»

²² Pilato arababwira ati «Naho se Yezu bita Kristu, mugenze nte?» Bose barasubiza bati «Nabambwe ku musaraba!»

²³ We, ati «Ikibi se yakoze ni ikihe?» Ariko barushaho gusakuza, bati «Nabambwe ku musaraba!»

²⁴ Nuko Pilato abonye ko nta cyo byunguye, ahubwo ko urusaku rurushaho kwiyongera, afata amazi akarabira imbere ya rubanda, avuga ati «Ndi umwere w’ayo maraso, muzigorerwe.»

²⁵ Rubanda rwose rurasubiza ruti «Amaraso ye araduhame, twe n’abana bacu.»

²⁶ Nuko abarekurira Barabasi; naho Yezu, amaze kumukubitisha ibiboko, aramubegurira ngo abambwe ku musaraba.

Yezu atamirizwa amahwa

²⁷ Nuko abasirikare b’Umutware mukuru bajyana Yezu mu gikari cy’ingoro ye, bamukoranyirizaho igombaniro ryose.

²⁸ Baramwambura, bamwambika igishura gitukura,

²⁹ hanyuma baboha ikamba ry’amahwa, barimutamiriza mu mutwe, bamufatisha n’urubingo mu kiganza cy’iburyo. Bagatera ivi imbere ye, bakamushungera bavuga bati «Urakarama, Mwami w’Abayahudi!»

³⁰ Nuko bakamuvunderezaho amacandwe, bagafata rwa rubingo bakarumukubita mu mutwe.

³¹ Bamaze kumukwena, bamwambura igishura, bamwambika imyambaro ye, maze bamujyana kumubamba ku musaraba.

Ibambwa rya Yezu

³² Basohotse bahura n’Umunyasireni witwa Simoni, bamuhatira gutwara umusaraba wa Yezu.

³³ Bageze ahantu hitwa Gologota, bikavuga ku Kibihanga,

³⁴ bamuha divayi ivanze n’indurwe ngo anywe; asomyeho yanga kuyinywa.

³⁵ Bamaze kumubamba ku musaraba bigabanya imyambaro ye bakoresheje ubufindo.

³⁶ Nuko bicara aho baramurinda.

³⁷ Hejuru y’umutwe we bahashyira urubaho rwanditseho icyo azize, ngo «Uyu ni Yezu Umwami w’Abayahudi.»

³⁸ Icyo gihe hari ibisambo bibiri byari bibambanywe na we, kimwe iburyo, ikindi ibumoso.

³⁹ Abahisi bakamutuka bazunguza umutwe,

⁴⁰ bavuga bati «Wowe usenya Ingoro y’Imana, ukongera kuyubaka mu minsi itatu, ikize ubwawe niba uri Umwana w’Imana, maze umanuke ku musaraba!»

⁴¹ Abatware b’abaherezabitambo na bo bakamuseka, n’abigishamategeko, n’abakuru b’umuryango, bati

⁴² «Yakijije abandi, none ntashoboye kwikiza ubwe! Harya ngo ni Umwami wa Israheli, ngaho namanuke ku musaraba tumwemere!

⁴³ Yiringiye Imana; nimukize rero ubu niba imukunze! Kuko yavuze ati ’Ndi Umwana w’Imana.’»

⁴⁴ N’abambuzi babambanywe na we bakamukwena batyo.

Urupfu rwa Yezu

⁴⁵ Kuva ku isaha ya gatandatu kugeza ku isaha ya cyenda hacura umwijima ku isi yose.

⁴⁶ Ahagana ku isaha ya cyenda, Yezu avuga mu ijwi riranguruye, ati «Eli, Eli, lama sabaktani?» Bivuga ngo «Mana yanjye, Mana yanjye, icyatumye untererana ni iki?»

⁴⁷ Bamwe mu bari aho bamwumvise, baravuga bati «Aratabaza Eliya!»

⁴⁸ Ako kanya umwe muri bo yiruka ajya gufata icyangwe, akivika muri divayi irura, maze agitunga ku rubingo, aramuhereza ngo anywe.

⁴⁹ Ariko abandi baramubwira bati «Reka turebe niba Eliya aza kumukiza!»

⁵⁰ Yezu yongera kurangurura ijwi cyane, nuko araca.

⁵¹ Ni bwo umubambiko wo mu Ngoro y’Imana utanyutsemo kabiri, kuva hejuru kugeza hasi; isi ihinda umushyitsi, ibitare biriyasa.

⁵² Imva zirakinguka, n’imibiri y’abatagatifu benshi bapfuye irazuka.

⁵³ Yezu amaze kuzuka, na bo bava mu mva zabo, bajya mu Murwa Mutagatifu, maze babonekera abantu benshi.

⁵⁴ Umutegeka hamwe n’abasirikare be barindanaga Yezu, babonye umutingito w’isi n’ibyari bibaye, bagira ubwoba bwinshi, baravuga bati «Uyu koko yari Umwana w’Imana!»

Ihambwa rya Yezu

⁵⁵ Aho hari abagore benshi bareberaga kure; abo ni abari barakurikiye Yezu kuva mu Galileya bamukorera.

⁵⁶ Barimo Mariya Madalena, na Mariya nyina wa Yakobo na Yozefu, na nyina wa bene Zebedeyi.

⁵⁷ Bugorobye, haza umuntu w’umukire w’i Arimatiya, witwa Yozefu, na we akaba yari umwigishwa wa Yezu.

⁵⁸ Asanga Pilato, amusaba umurambo wa Yezu. Nuko Pilato ategeka ko bawumuha.

⁵⁹ Yozefu ajyana umurambo wa Yezu, awuhambira mu mwenda utanduye;

⁶⁰ maze awurambika mu mva nshya yari yaricukuriye mu rutare, hanyuma akingisha ibuye rinini umuryango w’imva, aragenda.

⁶¹ Aho hari Mariya Madalena na Mariya wundi bicaye imbere y’imva.

Abarinzi b’imva

⁶² Umunsi w’umwiteguro w’isabato urangiye, bukeye bwawo, abatware b’abaherezabitambo n’Abafarizayi bateranira kwa Pilato,

⁶³ baramubwira bati «Mutegetsi, twibutse ko wa munyakinyoma akiriho yavuze ati ’Nzazuka iminsi itatu ishize!’

⁶⁴ Nuko rero, tegeka ko barinda imva kugeza ku munsi wa gatatu, hato abigishwa be bataza kumwiba, bakabwira rubanda bati ’Yazutse mu bapfuye!’ maze icyo kinyoma cya nyuma kikaruta icya mbere.»

⁶⁵ Pilato arabasubiza ati «Dore abarinzi; nimugende, murinde imva uko mubyumva.»

⁶⁶ Nuko rero baragenda, badanangira imva, bashyira ikimenyetso kuri rya buye, maze bahasiga abazamu.