Matayo 22 - Kinyarwanda Bibiliya Ntagatifu

Umugani w’ubukwe

¹ Yezu yongera kubabwirira mu migani, ati

² «Ingoma y’ijuru imeze nk’umwami wacyuje ubukwe bw’umuhungu we;

³ agatuma abagaragu be guhamagara abatumiwe mu bukwe, ariko banga kuza.

⁴ Nuko yongera gutuma abandi bagaragu, kugira ngo babwire abatumiwe bati ’Dore nateguye amazimano; ibimasa byanjye n’amatungo yanjye y’imishishe byabazwe, byose byatunganye, nimuze mu bukwe.»

⁵ Ariko bo ntibabyitaho barigendera, umwe mu murima we, undi mu bucuruzi bwe;

⁶ maze abandi bafata abagaragu babagirira nabi, barabica.

⁷ Umwami ararakara, yohereza ingabo ze zirimbura abo babisha, kandi zitwika umugi wabo.

⁸ Hanyuma abwira abagaragu be, ati ’Iby’ubukwe byateguwe, ariko abatumiwe ntibari babikwiye.

⁹ Nimugende rero mu mayirabiri, mutumire mu bukwe abantu bose muhura.’

¹⁰ Abo bagaragu bakwira amayira, bakoranya abo babonye bose, ari ababi, ari n’abeza, maze inzu y’ubukwe yuzura abatumirwa.

¹¹ Nuko umwami arinjira ngo arebe abari ku meza, maze ahabona umuntu utambaye iby’ubukwe.

¹² Aramubwira ati ’Mugenzi wanjye, waje ute hano udafite umwambaro w’abakwe?’ Undi araceceka.

¹³ Nuko umwami abwira abahereza, ati ’Nimumubohe amaguru n’amaboko, mumujugunye hanze mu mwijima, aho azaririra kandi agahekenya amenyo.’

¹⁴ Koko hahamagarwa benshi, hagatorwa bake.»

Umusoro wa Kayizari

¹⁵ Abafarizayi baragenda, bajya inama yo gufatira Yezu ku magambo avuga.

¹⁶ Nuko bamutumaho abigishwa babo n’Abaherodiyani. Baramubaza bati «Mwigisha, tuzi ko uvuga ukuri kandi ukigisha inzira y’Imana nta cyo wikanga, kuko udatinya amaso y’abantu.

¹⁷ Nuko rero tubwire uko ubyumva: ese guha Kayizari umusoro, biremewe cyangwa si byo?»

¹⁸ Ariko Yezu wari uzi ubugome bwabo, arabasubiza ati «Mwa ndyarya mwe, igituma munyinja ni iki?

¹⁹ Nimunyereke igiceri mutangaho umusoro.» Bamuhereza idenari.

²⁰ Nuko arababaza ati «Iri shusho n’ibyanditseho ni ibya nde?»

²¹ Bati «Ni ibya Kayizari.» Nuko Yezu arababwira ati «Ibya Kayizari, mubisubize Kayizari, n’iby’Imana, mubisubize Imana!»

²² Babyumvise baratangara, bamusiga aho barigendera.

Ikibazo cyerekeye izuka ry’abapfuye

²³ Uwo munsi nanone, Abasaduseyi ba bandi bahakana iby’izuka ry’abapfuye baramwegera, baramubaza bati

²⁴ «Mwigisha, Musa yaravuze ati ’Umuntu napfa ari incike, uwo bava inda imwe ajye acyura uwo mupfakazi, kugira ngo acikure nyakwigendera.’

²⁵ Iwacu rero habayeho abavandimwe barindwi. Uwa mbere ashaka umugore, hanyuma apfa bucike, umugore we amusigira uwo bava inda imwe.

²⁶ Uwa kabiri na we bimugendekera bityo, n’uwa gatatu biba uko, kugeza ku wa karindwi.

²⁷ Amaherezo, na wa mugore aza gupfa.

²⁸ Igihe cy’izuka uwo mugore azaba uwa nde muri abo bavandimwe barindwi, ko bose bamutunze?»

²⁹ Yezu arabasubiza ati «Murayoba kuko mutazi Ibyanditswe, ntimumenye n’ububasha bw’Imana.

³⁰ Igihe cy’izuka nta we uzagira umugore, nta n’uzagira umugabo, ahubwo bazamera nk’abamalayika mu ijuru.

³¹ Naho iby’izuka ry’abapfuye, ntimwasomye aho Imana ibabwira iti

³² ’Ndi Imana ya Abrahamu, Imana ya Izaki, n’Imana ya Yakobo’? Nta bwo rero Imana ari iy’abapfuye, ahubwo ni iy’abazima!»

³³ Maze rubanda bari babyumvise batangazwa n’inyigisho ze.

Itegeko riruta ayandi

³⁴ Abafarizayi bumvise ko yazibye akanwa k’Abasaduseyi, barakorana.

³⁵ Maze umwe muri bo wari umwigishamategeko amubaza amwinja, ati

³⁶ «Mwigisha, itegeko riruta ayandi ni irihe?»

³⁷ Aramubwira ati «Uzakunde Nyagasani, Imana yawe, n’umutima wawe wose, n’amagara yawe yose, n’ubwenge bwawe bwose.

³⁸ Iryo ni itegeko riruta ayandi kandi ni ryo rya mbere.

³⁹ Irya kabiri risa na ryo: Urajye ukunda mugenzi wawe nk’uko wikunda.

⁴⁰ Muri ayo mategeko uko ari abiri, habumbiyemo andi yose n’ibyo Abahanuzi bavuze.»

Kristu asumba Dawudi

⁴¹ Abafarizayi bamaze gukorana, Yezu arababaza ati

⁴² «Icyo mutekereza kuri Kristu ni iki? Ni mwene nde?» Bati «Ni mwene Dawudi.»

⁴³ Arongera ati «Bite se ko Dawudi, abwirijwe na Roho w’Imana, amwita Umutegetsi, avuga ati

⁴⁴ ’Nyagasani yabwiye Umutegetsi wanjye, ati: Icara iburyo bwanjye kugeza igihe abanzi bawe mbahindura imisego y’ibirenge byawe.’

⁴⁵ Uwo rero Dawudi yita Umutegetsi we, yaba umwana we ate?»

⁴⁶ Ntihagira ubasha kumusubiza n’ijambo na rimwe; kandi kuva uwo munsi, nta n’uwongeye gutinyuka kugira icyo amubaza.