Matayo 17 - Kinyarwanda Bibiliya Ntagatifu

Yezu yihindura ukundi

¹ Hashize iminsi itandatu, Yezu ajyana na Petero, na Yakobo, na Yohani umuvandimwe we ukwabo mu mpinga y’umusozi muremure.

² Nuko yihindurira ukundi mu maso yabo: uruhanga rwe rubengerana nk’izuba, imyambaro ye yererana nk’urumuri.

³ Ubwo Musa na Eliya bababonekera, baganira na we.

⁴ Petero ni ko guterura abwira Yezu, ati «Nyagasani, kwibera hano ntako bisa; niba ubishaka ngiye kuhaca ibiraro bitatu, kimwe cyawe, ikindi cya Musa, n’ikindi cya Eliya.»

⁵ Akivuga ibyo, igihu kibengerana kirabatwikira; ijwi riturukamo rivuga riti «Uyu ni Umwana wanjye nkunda cyane unyizihira; nimumwumve!»

⁶ Abigishwa babyumvise, bitura hasi bubitse amaso, bafite ubwoba bwinshi.

⁷ Nuko Yezu arabegera, abakoraho, arababwira ati «Nimubaduke, mwitinya!»

⁸ Bubuye amaso, ntibagira undi babona kereka Yezu wenyine.

⁹ Bamanuka umusozi, Yezu arabihanangiriza ati «Ntimugire uwo mubwira ibyo mumaze kubona, kugeza ubwo Umwana w’umuntu azaba amaze kuzuka mu bapfuye.»

Intumwa zibaza Yezu ibya Eliya

¹⁰ Nuko abigishwa baramubaza bati «Ni kuki abigishamategeko bavuga ko Eliya ari we ugomba kubanza kuza?

¹¹ Arabasubiza ati «Ni koko, Eliya azaza kandi atunganye byose;

¹² ariko mbabwire: Eliya yaraje, nyamara ntibamumenye, ahubwo bamugiriye nabi uko bishakiye. N’Umwana w’umuntu bazamubabaza batyo.»

¹³ Nuko abigishwa bamenya ko ari Yohani Batisita yababwiraga.

Umunyagicuri uhanzweho na roho mbi

¹⁴ Bageze iruhande rw’inteko y’abantu, umuntu yegera Yezu, amupfukamira agira ati

¹⁵ «Nyagasani, babarira umwana wanjye urwaye igicuri, akaba ameze nabi. Kenshi yiroha mu muriro, ubundi mu mazi.

¹⁶ Namuzaniye abigishwa bawe ntibashobora kumukiza.»

¹⁷ Yezu arasubiza ati «Mbe bantu b’iki gihe, b’abemera gato kandi b’inkozi z’ibibi, nzabana namwe kugeza ryari? Nzabiyumanganya mpereze hehe? Nimumunzanire hano.»

¹⁸ Nuko Yezu acyaha iyo roho mbi, imuvamo, ako kanya arakira.

¹⁹ Nuko abigishwa begera Yezu, baramubaza bati «Ni iki gituma twebwe tutashoboye kuyirukana?»

²⁰ Arababwira ati «Ni uko mufite ukwemera guke. Koko ndababwira ukuri: iyo mugira ukwemera kungana n’impeke y’ururo, mwabwiye uyu musozi muti ’Va aha ngaha, ujye hariya’, ukahajya; kandi nta cyashobora kubananira.» (21 . . . )

Yezu avuga ubwa kabiri ko azapfa akazuka

²² Umunsi umwe bateraniye mu Galileya, Yezu arababwira ati «Umwana w’umuntu agiye gushyirwa mu maboko y’abantu,

²³ bakazamwica, ariko akazazuka ku munsi wa gatatu.» Ibyo birabashavuza cyane.

Yezu na Petero batanga umusoro w’Ingoro y’Imana

²⁴ Bageze i Kafarinawumu, abasoresha b’Ingoro begera Petero, baramubaza bati «Mbese Umwigisha wanyu ntatanga ituro ry’Imana?»

²⁵ Arabasubiza ati «Araritanga.» Igihe bageze imuhira, Yezu aramutanguranwa, aramubwira ati «Simoni, ubyumva ute? Abami b’isi bahabwa na bande imisoro cyangwa amaturo? Babihabwa n’abana babo cyangwa se na rubanda?»

²⁶ Amushubije ati «Ni rubanda», Yezu arongera ati «Nuko rero abana ntibabitegekwa.

²⁷ Nyamara, kugira ngo tudaha urugero rubi bariya bantu, jya ku nyanja urohe ururobo. Ifi ya mbere uri bufate, uyasamure; urayisangamo igiceri, ukijyane, maze ukibaheho ituro ryanjye n’iryawe.»