Matayo 14 - Kinyarwanda Bibiliya Ntagatifu

Yohani Batisita acibwa umutwe

¹ Icyo gihe Herodi, umutware w’intara ya Galileya, yumva iby’ubwamamare bwa Yezu.

² Nuko abwira ibyegera bye, ati «Uriya muntu ni Yohani Batisita, ni we wazutse mu bapfuye! Ni cyo gituma afite ububasha bwo gukora ibitangaza.»

³ Koko Herodi yari yarafashe Yohani, aramuboha aranamufungisha, abitewe na Herodiya, umugore w’umuvandimwe we Filipo.

⁴ Kuko Yohani yamubwiraga, ati «Ntibyemewe ko umutunga.»

⁵ Herodi asigara ashaka kumwica, ariko agatinya rubanda rwabonaga ko Yohani ari umuhanuzi.

⁶ Ku munsi wo kwibuka ivuka rya Herodi, umukobwa wa Herodiya abyinira mu ruhame, Herodi aranyurwa.

⁷ Ni bwo arahiriye kumuha icyo ari bumusabe cyose.

⁸ Nuko uwo mukobwa amaze kugirwa inama na nyina, aravuga ati «Ngaho mpera aha ngaha ku mbehe, umutwe wa Yohani Batisita.»

⁹ Umwami ni ko kubabara, ariko kubera indahiro yagiriye imbere y’abatumirwa be, ategeka ko bawumuha.

¹⁰ Yohereza ujya gucira Yohani umutwe mu nzu y’imbohe.

¹¹ Umutwe bawuzana ku mbehe, bawuha wa mukobwa, awushyira nyina.

¹² Nuko abigishwa ba Yohani baraza batwara umurambo we, barawuhamba. Hanyuma bajya kubimenyesha Yezu.

Yezu agaburira abantu ibihumbi bitanu

¹³ Yezu amaze kubyumva, ajya mu bwato, agana ahantu h’ubutayu hitaruye; rubanda rubimenye ruva mu migi, rumukurikira ku maguru.

¹⁴ Amaze kwambuka, abona abantu benshi, abagirira impuhwe; akiza ibimuga byabo.

¹⁵ Bugorobye, abigishwa be baramwegera, bati «Aha hantu ntihatuwe, kandi umunsi uciye ikibu; none sezerera aba bantu bajye mu ngo kwigurira ibyo barya.»

¹⁶ Ariko Yezu we arababwira ati «Bikwirirwa bajyayo; nimubahe ibyo kurya mwebwe ubwanyu.»

¹⁷ Baramusubiza bati «Dufite hano imigati itanu n’amafi abiri gusa.»

¹⁸ Arababwira ati «Nimubinzanire hano.»

¹⁹ Amaze gutegeka ko bicaza abantu mu byatsi, afata ya migati itanu na ya mafi abiri, areba ku ijuru, ashimira Imana; hanyuma amanyura ya migati ayiha abigishwa be, na bo bayiha rubanda.

²⁰ Bose bararya barahaga. Nuko barundarundira hamwe ibisigaye, byuzura inkangara cumi n’ebyiri!

²¹ Nyamara abariye bari ibihumbi bitanu, batabariyemo abagore n’abana.

Yezu agenda ku mazi

²² Nuko Yezu aherako ategeka abigishwa be kujya mu bwato no kumutanga hakurya, igihe agisezerera rubanda.

²³ Amaze kubasezerera, azamuka umusozi kugira ngo asengere ahiherereye. Umugoroba ukuba ari wenyine.

²⁴ Naho ubwato bwari bugeze kure y’inkombe, buhungabanywa n’imivumba, kuko umuyaga wabuturukaga imbere.

²⁵ Nuko bujya gucya, aza abasanga agenda hejuru y’inyanja.

²⁶ Abigishwa babonye agenda hejuru y’inyanja, bakuka umutima, bati «Ni Baringa!» Bashya ubwoba, ni ko kuvuza induru.

²⁷ Ako kanya Yezu arababwira, ati «Nimuhumure, ni jye; mwigira ubwoba!»

²⁸ Petero ni ko kumusubiza ati «Nyagasani, niba ari wowe, tegeka ko ngusanga ngenda ku mazi.»

²⁹ Yezu ati «Ngwino.» Nuko Petero ava mu bwato agenda ku mazi asanga Yezu.

³⁰ Ariko abonye ko umuyaga uteye inkeke, agira ubwoba atangira kurohama, nuko atera hejuru ati «Nyagasani, nkiza!»

³¹ Ako kanya Yezu arambura ukuboko, aramusingira, ati «Wa mwemera gato we, ni iki cyatumye ushidikanya?»

³² Nuko bageze mu bwato, umuyaga urahosha.

³³ Abari mu bwato bamupfukamira bavuga bati «Koko uri Umwana w’Imana!»

Yezu akiza abarwayi mu gihugu cya Genezareti

³⁴ Bamaze kwambuka, bagera mu karere ka Genezareti.

³⁵ Abantu b’aho bamumenye, bakwiza inkuru muri ako karere kose; ni ko kumuzanira abarwayi babo bose.

³⁶ Baramwinginga ngo abareke bakore ku ncunda z’igishura cye gusa, nuko abazikozeho bose bagakira.