Matayo 11 - Kinyarwanda Bibiliya Ntagatifu

¹ Yezu amaze guha abigishwa be cumi na babiri ayo mabwiriza, aherako ajya kwigisha no kwamamaza Inkuru Nziza mu migi yabo.

Yohani Batisita atuma kuri Yezu

² Yohani, aho yari mu buroko, amaze kumva ibyo Kristu akora, yohereza babiri mu bigishwa be kumubaza bati

³ «Mbese uri Wawundi ugomba kuza, cyangwa dutegereze undi?»

⁴ Yezu arabasubiza ati «Nimugende mutekerereze Yohani ibyo mwumva n’ibyo mubona:

⁵ impumyi zirabona, abacumbagira baragenda, ababembe barakira, ibipfamatwi birumva, abapfuye barazuka, n’abakene barigishwa Inkuru Nziza.

⁶ Hahirwa utazagushwa n’ibyo nkora!»

⁷ Izo ntumwa zitirimutse, Yezu abwira rubanda ibya Yohani, ati «Mwagiye kureba iki mu butayu? Urubingo se ruhubanganywa n’umuyaga?

⁸ Mwagiye kureba iki? Umuntu se wambaye imyenda y’agatangaza? . . . Abambaye iy’agatangaza se ko batuye mu ngoro z’abami!

⁹ Nk’ubwo se, mwagiye kureba iki? Umuhanuzi se? Koko rero ndabibabwiye, ndetse atambutse umuhanuzi.

¹⁰ Ni we banditseho ngo ’Dore nohereje intumwa yanjye imbere yawe, kugira ngo izagutegurire inzira.’»

¹¹ Ndababwira ukuri: mu bana babyawe n’abagore, ntihigeze kuboneka uruta Yohani Batisita; nyamara umuto mu Ngoma y’ijuru, aramuruta.

¹² Guhera igihe cya Yohani Batisita kugeza ubu, Ingoma y’ijuru iraharanirwa, ab’ibyihare ni bo bayikukana.

¹³ Ni uko Abahanuzi bose kimwe n’Amategeko bavuze kugeza kuri Yohani.

¹⁴ Kandi niba mushaka kunyemera, ni we Eliya wagombaga kuza.

¹⁵ Ufite amatwi yo kumva niyumve!

¹⁶ Mbese ab’iki gihe nabagereranya na bande? Bameze nk’abana bicaye ku bibuga, bagahamagara abandi,

¹⁷ bati ’Twavugije umwironge, maze ntimwabyina! Duteye indirimbo z’amaganya, ntimwarira!’

¹⁸ Koko rero Yohani yaje atarya, atanywa, bati ’Yahanzweho!’

¹⁹ Naho Umwana w’umuntu aje arya kandi anywa, bati ’Ni igisambo, ni umusinzi, ni incuti y’abasoresha n’abanyabyaha!’ Nyamara ubuhanga bw’Imana bwagaragajwe n’ibikorwa byayo.»

Umuvumo w’imigi yegereye inkombe z’ikiyaga

²⁰ Nuko atangira gutonganya imigi yabonye ibitangaza bye byinshi, ikarenga ntiyihane, avuga ati

²¹ «Iyimbire, Korazini! Iyimbire, Betsayida! Kuko ibitangaza byabakorewemo, iyo bikorerwa muri Tiri no muri Sidoni, baba barisubiyeho kuva kera, bakambara ibigunira bakisiga ivu.

²² Ni cyo gituma mbibabwiye: ku munsi w’urubanza muzahanwa kurusha Tiri na Sidoni.

²³ Naho wowe, Kafarinawumu, ubona ko uzakuzwa kugera mu bicu? Uzarohwa mu kuzimu. Kuko ibitangaza byagukorewemo, iyo bikorerwa muri Sodoma, iba ikiriho n’ubu.

²⁴ Ni cyo gituma ku munsi w’urubanza uzahanwa kurusha igihugu cya Sodoma.»

Inkuru Nziza ihishurirwa abaciye bugufi

²⁵ Icyo gihe Yezu yungamo ati «Dawe, Mutegetsi w’ijuru n’isi, ngushimiye ko ibyo wabihishe abanyabwenge n’abahanga, ukabihishurira abaciye bugufi.

²⁶ Koko, Dawe, ni ko wabyishakiye.

²⁷ Byose nabyeguriwe na Data, kandi nta we uzi Mwana keretse Data, nta n’uzi Data, keretse Mwana n’uwo Mwana ashatse kumuhishurira.

²⁸ Nimungane mwese, abarushye n’abaremerewe, jye nzabaruhura.

²⁹ Nimwikorere umutwaro wanjye, kandi mundebereho, kuko ngira umutima ugwa neza kandi nkoroshya; muzamererwa neza mu mitima yanyu.

³⁰ Koko rero umutwaro wanjye uroroshye, n’ibyo mbakorera ntibiremereye.»