Matayo 10 - Kinyarwanda Bibiliya Ntagatifu

Yezu atora ba Cumi na babiri

¹ Amaze guhamagara abigishwa be cumi na babiri, abaha ububasha bwo kuganza roho mbi no kuzirukana, n’ubwo gukiza icyitwa indwara n’icyitwa ubumuga cyose.

² Dore amazina y’izo ntumwa cumi n’ebyiri: uwa mbere ni Simoni witwa Petero, na Andereya murumuna we; Yakobo mwene Zebedeyi, na Yohani murumuna we;

³ Filipo na Baritolomayo, Tomasi na Matayo umusoresha; Yakobo mwene Alufeyi na Tadeyo;

⁴ Simoni w’i Kana, na Yuda Isikariyoti wa wundi wamugambaniye.

Yezu yohereza ba Cumi na babiri mu butumwa

⁵ Abo cumi na babiri Yezu abohereza mu butumwa, kandi abihanangiriza agira ati «Ntimwerekeze mu karere k’abanyamahanga kandi ntimwinjire mu migi y’Abanyasamariya;

⁶ ahubwo musange intama zazimiye z’umuryango wa Israheli.

⁷ Aho munyura, muvuge ko Ingoma y’ijuru yegereje.

⁸ Mukize abarwayi, muzure abapfuye, ababembe mubakize, mwirukane roho mbi. Mwahawe ku buntu, mutange ku buntu.

⁹ Ntimwitwaze zahabu, feza cyangwa ibiceri mu mikandara yanyu;

¹⁰ ntimujyane kandi uruhago rw’urugendo, amakanzu abiri, cyangwa inkweto, habe n’inkoni, kuko umukozi akwiye ifunguro.

¹¹ Aho mugeze mu mugi cyangwa mu rusisiro, mujye mubaririza umuntu ukwiriye kubakira, maze mugume iwe kugeza igihe muzagendera.

¹² Nimugera iwe, mumwifurize amahoro.

¹³ Niba urwo rugo ruyakwiye, amahoro yanyu azarutahemo; niba rutayakwiye, amahoro yanyu azabagarukira.

¹⁴ Nibanga kubakira no kumva amagambo yanyu, muve muri urwo rugo cyangwa muri uwo mugi, mukunguta umukungugu wo ku birenge byanyu.

¹⁵ Ndababwira ukuri: ku munsi w’urubanza, Sodoma na Gomora bizadohorerwa kurusha uwo mugi.

Intumwa zizatotezwa

¹⁶ Dore, mbohereje nk’intama mu birura; murabe rero inyaryenge nk’inzoka, mube n’intaryarya nk’inuma.

¹⁷ Muritondere abantu, kuko bazabagabiza inkiko zabo, kandi bakabakubitira mu masengero yabo.

¹⁸ Bazabajyana imbere y’abatware n’abami, ari jye muzira, kugira ngo mumbere abagabo mu maso yabo, n’imbere y’abanyamahanga.

¹⁹ Igihe rero bazabagabiza inkiko, ntimuzakurwe umutima n’ibyo muzavuga n’uburyo muzabivuga; icyo muzavuga muzakibona icyo gihe,

²⁰ kuko atari mwe muzavuga, ahubwo ni Roho wa So uzabavugiramo.

²¹ Umuvandimwe azatanga uwo bava inda imwe, ngo bamwice, umubyeyi n’umwana we bibe uko; bazahinduka abababyaye, babicishe.

²² Muzangwa na bose muzira izina ryanjye, ariko uzakomera kugeza ku ndunduro, uwo ni we uzarokoka.

²³ Nibabahiga mu mugi uyu n’uyu, muhungire mu wundi. Ndababwira ukuri: Ntimuzarinda guhetura imigi yose ya Israheli, Umwana w’umuntu ataraza.

²⁴ Umwigishwa ntasumba umwigisha we, n’umugaragu ntasumba shebuja.

²⁵ Ahubwo umwigishwa nabe nk’umwigisha, n’umugaragu amere nka shebuja, maze ibyo bibe bihagije. Niba nyir’urugo baramwise Belizebuli, bazavuga iki ku bo mu rugo rwe?

Ntimuzatinye kubashirikira ikinyoma!

²⁶ Ntimukabatinye rero, kuko nta kintu gihishe kitazagaragara, nta n’igihishiriwe kitazamenyekana.

²⁷ Icyo mbabwiriye mu mwijima, muzakivugire ahabona; icyo mbongorereye ahiherereye, muzagitangarize ahirengeye.

²⁸ Ntimugatinye abica umubiri, ariko badashobora kwica ubugingo; ahubwo mutinye Ushobora kuroha ubuzima n’umubiri icyarimwe mu nyenga y’umuriro.

²⁹ Mbese ibishwi bibiri ntibigura igiceri? Nyamara nta kigwa hasi muri byo, So atabishaka!

³⁰ Naho mwe, imisatsi yo ku mutwe wanyu yose irabaze!

³¹ Ntimugatinye rero: mwebwe murushije agaciro ibishwi byinshi.

³² Umuntu wese uzanyemera mu maso y’abantu, nanjye nzamwemera imbere ya Data uri mu ijuru;

³³ naho uzanyihakana mu maso y’abantu, nanjye nzamwihakana mu maso ya Data uri mu ijuru.

Yezu atera ubwivangure mu bantu

³⁴ Ntimugire ngo nazanywe no gukwiza amahoro ku isi; sinaje gukwiza amahoro, ahubwo nazanye inkota.

³⁵ Koko naje gushyamiranya umuhungu na se, umukobwa na nyina, umukazana na nyirabukwe:

³⁶ maze abanzi b’umuntu bakazaba abo mu rugo rwe.

Gukurikira Yezu biruta byose

³⁷ Ukunda se cyangwa nyina kunduta, ntakwiriye kuba uwanjye. Ukunda umuhungu cyangwa umukobwa we kunduta, ntakwiriye kuba uwanjye.

³⁸ Udatwara umusaraba we ngo ankurikire, ntakwiriye kuba uwanjye.

³⁹ Uwihambira ku bugingo bwe azabubura, naho uzahara ubugingo bwe ari jye agirira, azabuhorana.

Ingororano y’abazakira abavandimwe babo neza

⁴⁰ Ubakiriye neza, ni jye aba yakiriye, n’unyakiriye aba yakiriye Uwantumye.

⁴¹ Uwakiriye neza umuhanuzi kuko ari umuhanuzi, azahabwa ingororano y’umuhanuzi; n’uwakiriye intungane neza kuko ari intungane, azahabwa ingororano y’intungane.

⁴² Uzaba yarahaye icyo kunywa umwe muri aba baciye bugufi, n’aho rwaba uruho rw’amazi afutse, kuko ari umwigishwa wanjye, ndababwira ukuri: ntazabura ingororano ye.»