Mariko 7 - Kinyarwanda Bibiliya Ntagatifu

Yezu ajya impaka n’abafarizayi

¹ Abafarizayi na bamwe mu bigishamategeko bari baturutse i Yeruzalemu, bateranira iruhande rwa Yezu.

² Babona bamwe mu bigishwa be barisha intoki zanduye, ari byo kuvuga zidakarabye.

³ Koko rero, Abafarizayi n’Abayahudi bose ntibarya batabanje gukaraba ibiganza kugeza ku nkokora, bakurikije akamenyero k’abakurambere,

⁴ n’iyo bavuye mu materaniro, ntibarya batabanje kwitera amazi. Hariho kandi n’indi migenzo myinshi bakurikiza by’akarande, nko koza ibikombe, ibibindi, n’amasahani . . .

⁵ Nuko rero, Abafarizayi n’abigishamategeko baramubaza bati «Ni iki gituma abigishwa bawe badakurikiza umuco w’abakurambere, bakarisha intoki zanduye?»

⁶ Arabasubiza ati «Izayi yabahanuye neza, mwa ndyarya mwe! Nk’uko byanditswe ngo ’Uyu muryango unyubahisha akarimi gusa, naho imitima yabo indi kure.

⁷ Icyubahiro bampa ni amanjwe: inyigisho bigisha ni amategeko y’abantu gusa.’

⁸ Murenga ku itegeko ry’Imana, mukibanda ku muco w’abantu.»

⁹ Maze arababwira ati «Murubahuka mugakuraho itegeko ry’Imana mwitwaza gukurikiza umucokarande wanyu.

¹⁰ Dore Musa yaravuze ati ’Jya wubaha so na nyoko’, kandi ati ’Uzatuka se cyangwa nyina, azacirwa urwo gupfa.’

¹¹ Naho mwe mukavuga ngo ’Umuntu wese ubwira se cyangwa nyina ati: Ibintu najyaga kuzagufashisha ni «Korbani», ari byo kuvuga ituro ry’Imana,

¹² mumwemerera kutagira icyo afashisha se cyangwa nyina;

¹³ bityo mukavuguruza ijambo ry’Imana mwitwaza umucokarande. Kandi mukora n’ibindi byinshi bisa n’ibyo.»

Ibihumanya umuntu

¹⁴ Yongera guhamagara rubanda, arababwira ati «Nimutege amatwi mwese, kandi munyumve neza!

¹⁵ Nta kintu kijya mu muntu giturutse inyuma kimuhumanya, ahubwo ikivuye mu muntu ni cyo kimuhumanya.

¹⁶ Ufite amatwi yo kumva niyumve!»

¹⁷ Amaze kwinjira mu nzu yitaruye rubanda, abigishwa be bamusobanuza uwo mugani.

¹⁸ Arabasubiza ati «Namwe mubuze ubwenge bigeze aho? Ntimwumva se ko nta kintu na kimwe cyinjira mu muntu giturutse inyuma gishobora kumuhumanya,

¹⁹ kuko kitinjira mu mutima we, ahubwo kijya mu nda, kigasohoka kijya gutabwa mu rwobo.» Bityo yemeza ko ibiribwa byose bidahumanya.

²⁰ Arongera ati «Ikivuye mu muntu ni cyo kimuhumanya.

²¹ Kuko mu mutima w’abantu ariho haturuka imigambi mibi: ubusambanyi, ubujura, ubwicanyi,

²² ubuhabara, umururumba, ubugome, uburyarya, ingeso mbi, ishyari, gutukana, ubwirasi, n’amafuti.

²³ Ibyo bintu byose bibi biva mu mutima, ni byo bihumanya umuntu.»

Ukwemera k’umugore w’umunyamahanga

²⁴ Ahagurutse aho, Yezu ajya mu gihugu cya Tiri. Nuko yinjira mu nzu, adashaka ko hagira ubimenya, ariko ntiyashobora kuhaguma bitamenyekanye.

²⁵ Ako kanya, umugore wari ufite umwana w’umukobwa wahanzweho na roho mbi yumvise bamuvuga, araza amupfukama imbere.

²⁶ Uwo mugore yari umunyamahanga, kavukire k’i Fenisiya ho muri Siriya, nuko amusaba kwirukana iyo roho mbi yari mu mukobwa we.

²⁷ Yezu aramubwira ati «Reka abana babanze bahage, kuko bidakwiye gufata umugati w’abana ngo bawujugunyire ibibwana.»

²⁸ Umugore aramusubiza ati «Ni koko, Nyagasani! Ariko n’ibibwana birya utuvungukira abana bataye mu nsi y’ameza.»

²⁹ Aramubwira rero ati «Ngiriye iryo jambo uvuze, ngaho genda, roho mbi ivuye mu mukobwa wawe.»

³⁰ Uwo mugore arataha, asanga umwana arambaraye ku buriri, koko roho mbi yamuvuyemo.

Yezu akiza igipfamatwi

³¹ Yezu ava mu gihugu cya Tiri yambukiranya igihugu cya Sidoni, agaruka ku nyanja ya Galileya, yerekeje kuri Dekapoli.

³² Nuko bamuzanira igipfamatwi kidedemanga, baramwinginga ngo amuramburireho ibiganza.

³³ Amuvana muri rubanda, amujyana ahitaruye, ashyira intoki ze mu matwi ye, nuko acira amacandwe ayamukoza ku rurimi.

³⁴ Hanyuma yubura amaso ayerekeje ku ijuru, asuhuza umutima ati «Efata», bikavuga ngo «Zibuka.»

³⁵ Ako kanya, amatwi ye arazibuka, n’ururimi rwe ruragobodoka, maze atangira kuvuga neza.

³⁶ Maze Yezu abihanangiriza kutagira uwo babibwira, nyamara uko abihanangiriza, akaba ari ko barushaho kubyamamaza.

³⁷ Bagatangara cyane bakavuga bati «Byose yabikoze neza; atuma ibipfamatwi byumva n’ibiragi bivuga.»