Mariko 6 - Kinyarwanda Bibiliya Ntagatifu

Yezu n’abantu b’i Nazareti

¹ Yezu ava aho ngaho, ajya mu karere k’iwabo, abigishwa be baramukurikira.

² Isabato igeze, atangira kwigishiriza mu isengero. Abenshi ngo bamwumve baratangara cyane, bati «Biriya avuga byose abikura he? Buriya buhanga afite, na biriya bitangaza akora, abikomora he?

³ Uriya si wa mubaji tuzi, mwene Mariya; akaba umuvandimwe wa Yakobo, na Yozeto, na Yuda, na Simoni? Na bashiki be ntitubatunze?» Ibyo bibabera intandaro yo kumwanga.

⁴ Yezu arababwira ati «Nta handi umuhanuzi asuzugurwa, uretse mu gihugu cye, muri bene wabo, no mu rugo iwabo.»

⁵ Ntiyashobora kuhakorera igitangaza na kimwe, uretse gukiza abarwayi bakeya abaramburiraho ibiganza.

⁶ Maze atangazwa no kutemera kwabo. Yazengurukaga insisiro zihegereye yigisha.

Yezu yohereza ba Cumi na babiri mu butumwa

⁷ Nuko ahamagara ba bandi Cumi na babiri, abohereza babiri babiri mu butumwa, abaha n’ububasha kuri roho mbi.

⁸ Abategeka kutagira icyo bajyana mu rugendo, kereka inkoni yonyine; nta mugati, nta ruhago, nta biceri mu mukandara,

⁹ keretse kwambara inkweto z’urugendo. Ati «Ariko ntimwambare amakanzu abiri.»

¹⁰ Yungamo ati «Urugo muzinjiramo rwose, muzarugumemo kugeza igihe muhaviriye.

¹¹ Nimugera ahantu ntibabakire kandi ntibabumve, mujye muhava mubanje gukunguta umukungugu uri ku birenge byanyu, bibabere ikimenyetso kibashinja.»

¹² Nuko baragenda, batangaza ko abantu bagomba kugarukira Imana.

¹³ Birukana roho mbi nyinshi, kandi basiga abarwayi benshi amavuta, barabakiza.

Herodi yibaza Yezu uwo ari we

¹⁴ Nuko umwami Herodi yumva bavuga ibya Yezu, kuko izina rye ryari rimaze kwamamara, bavuga ngo «Yohani Batisita yazutse mu bapfuye! Ni cyo gituma yifitemo ububasha bwo gukora ibitangaza.»

¹⁵ Abandi bakavuga ngo «Ni Eliya.» Abandi kandi ngo «Ni umuhanuzi nk’abandi bahanuzi ba kera.»

¹⁶ Herodi abyumvise aravuga ati «Ni Yohani, umwe naciye umutwe, none akaba yarazutse!»

Urupfu rwa Yohani Batisita

¹⁷ Koko rero Herodi yari yatumye abantu bo gufata Yohani no kumubohera mu buroko, abitewe na Herodiya, umugore wa murumuna we Filipo, Herodi yari yaracyuye.

¹⁸ Kuko Yohani yari yarabwiye Herodi ati «Ubujijwe gutunga umugore wa murumuna wawe.»

¹⁹ Herodiya na we yahoraga ahigira Yohani agashaka no kumwicisha, ariko ntabishobore,

²⁰ kubera ko Herodi yatinyaga Yohani bigatuma amurengera, abitewe n’uko yari azi ko ari umuntu w’intabera kandi w’intungane. Iyo yabaga yamwumvise yabunzaga imitima cyane, nyamara yakundaga kumwumva.

²¹ Nuko haza kuba umunsi mukuru, ubwo Herodi yari yahimbaje isabukuru y’ivuka rye, maze atumira abatware be, n’abakuru b’ingabo ze hamwe n’abanyacyubahiro bo mu Galileya.

²² Umukobwa wa Herodiya araza arabyina, ashimisha Herodi n’abatumirwa be. Nuko umwami abwira umukobwa ati «Nsaba icyo ushaka cyose, ndakiguha.»

²³ Aramurahira ati «Icyo unsaba cyose ndakiguha, kabone n’iyo cyaba icya kabiri cy’igihugu cyanjye.»

²⁴ Umukobwa arasohoka abaza nyina ati «Nsabe iki?» Undi aramusubiza ati «Saba umutwe wa Yohani Batisita.»

²⁵ Umukobwa agaruka bwangu asanga umwami, amusaba avuga ati «Ndashaka ko umpa nonaha umutwe wa Yohani Batisita ku mbehe.»

²⁶ Umwami biramushavuza cyane, ariko kubera indahiro ye n’abo yari yatumiye, yanga kwivuguruza.

²⁷ Ako kanya umwami yohereza umwe mu ngabo ze, amutegeka kuzana umutwe wa Yohani. Uwo mugabo aragenda, amucira umutwe mu buroko.

²⁸ Nuko azana umutwe ku mbehe, maze awuha uwo mukobwa, umukobwa na we awuha nyina.

²⁹ Abigishwa ba Yohani babyumvise, baraza bajyana umurambo we, baramuhamba.

Intumwa zigaruka; Yezu agaburira abantu ibihumbi bitanu mu butayu

³⁰ Intumwa zihindukiye, ziteranira iruhande rwa Yezu maze zimumenyesha ibyo zari zakoze byose n’ibyo zari zigishije byose.

³¹ Nuko arazibwira ati «Nimuze ahitaruye, hadatuwe, maze muruhuke gatoya.» Koko rero abazaga n’abagendaga bari benshi, bigatuma batabona n’umwanya wo kurya.

³² Nuko bajya mu bwato bambukira ahantu hadatuwe bagira ngo biherere.

³³ Abenshi mu bababonye bagenda barabamenya, nuko baza ku maguru baturuka mu migi yose bahirukira, ndetse barahabatanga.

³⁴ Yezu amaze kwambuka abona iyo mbaga nyamwinshi y’abantu, abagirira impuhwe, kuko bari bameze nk’intama zitagira umushumba, atangira kubigisha byinshi.

³⁵ Umunsi uciye ikibu, abigishwa be ni bwo bamwegereye, maze baramubwira bati «Aha hantu ntihatuwe, kandi umunsi uciye ikibu;

³⁶ none sezerera aba bantu bajye mu ngo no mu nsisiro za hafi kwigurira ibyo barya.»

³⁷ Arabasubiza ati «Nimubahe ibyo kurya mwebwe ubwanyu.» Baramubwira bati «Urashaka ko tujya kugura imigati y’amadenari magana abiri, ngo tubahe barye?»

³⁸ Arabasubiza ati «Mufite imigati ingahe? Nimujye kureba.» Babimenye baravuga bati «Dufite itanu, n’amafi abiri.»

³⁹ Nuko abategeka kwicaza bose mu bwatsi butoshye, mu dutsiko udutsiko.

⁴⁰ Bicara ari inteko z’abantu ijana n’iz’abantu mirongo itanu.

⁴¹ Amaze gufata ya migati itanu na ya mafi abiri, areba hejuru, ashimira Imana. Hanyuma amanyura ya migati, ayiha abigishwa be kugira ngo babagaburire. Na ya mafi abiri ayabagabanya bose.

⁴² Bose bararya barahaga.

⁴³ Nuko bakoranya ibisate by’imigati byasigaye n’iby’amafi, buzuza inkangara cumi n’ebyiri.

⁴⁴ Nyamara abari bariye bari abagabo bageze ku bihumbi bitanu.

Yezu agenda hejuru y’inyanja

⁴⁵ Nuko ako kanya ategeka abigishwa be kujya mu bwato no kumutanga hakurya, hafi ya Betsayida, we asigara asezerera abantu.

⁴⁶ Amaze kubasezerera azamuka umusozi, ajya gusenga.

⁴⁷ Umugoroba ukubye, ubwato buba bugeze mu nyanja hagati, we akiri imusozi wenyine.

⁴⁸ Abona abigishwa be bananijwe no kugashya, kubera umuyaga wahuhaga ubarwanya. Nuko bujya gucya, aza abasanga agenda hejuru y’inyanja, ndetse ashaka no kubacaho.

⁴⁹ Babonye agenda hejuru y’inyanja, bakeka ko ari baringa bavuza induru.

⁵⁰ Bose bari bamubonye, bagira ubwoba. Yezu ni ko kubavugisha ati «Nimuhumure ni jye, mwigira ubwoba.»

⁵¹ Nuko abasanga mu bwato, maze umuyaga urahosha. Barushaho gutangara,

⁵² kuko batari bumvise iby’imigati; imitima yabo yari ikinangiye.

Yezu akiza abarwayi mu karere ka Genezareti

⁵³ Bamaze kwambuka, bagera i Genezareti, maze bashyikira ku nkombe.

⁵⁴ Bakiva mu bwato, abantu baramumenya,

⁵⁵ nuko bazenguruka ako karere kose, maze batangira kumuzanira abarwayi mu ngobyi, aho bumvaga yageze hose.

⁵⁶ N’aho Yezu yinjiraga hose, ari mu nsisiro, mu migi no mu midugudu, bashyiraga abarwayi ku kibuga, maze bakamusaba ngo abareke bakore ku ncunda z’umwambaro we. Nuko abamukozeho bose bagakira.